އައިޖީއެމްއެޗްގައި އުފަންވާ ކުދިންނަށް އެސްޓީއޯއިން އަލުން ހަދިޔާދޭން ފަށައިފި
2020 ވަނަ އަހަރުފެށި މި ޕްރޮގްރާމް މެދުކެނޑުނީ ކޮވިޑްގެ ސަބަބުން
އައިޖީއެމްއެޗްގައި އުފަންވާ ކުދިންނަށް ހަދިޔާދޭން ފެށީ 2020 ވަނަ އަހަރު
އައިޖީއެމްއެޗްގައި އުފަންވާ ކުދިންނަށް ހަދިޔާ ދިނުމުގެ ޕްރޮގްރާމް، މެދުކެނޑުމަކަށްފަހު އެސްޓީއޯއިން އަލުން ފަށައިފިއެވެ.
އެސްޓީއޯއިން ކުރިޔައްގެންދާ މި ކެމްޕެއިންގައި ގިފްޓް ހެމްޕާ ދެމުންދަނީ އިންދިރާ ގާންދީ މެމޯރިއަލް ހޮސްޕިޓަލްގައި އުފަންވާ ކުދިންގެ އާއިލާއަށެވެ.
މި ކެމްޕެއިން އެންމެ ފުރަތަމަ ފަށާފައި ވަނީ 2020 ވަނަ އަހަރުއެވެ. ނަމަވެސް ދުނިޔެއަށް ކުރިމަތިވި ކޮވިޑް ހާލަތާއި ގުޅިގެން މެދުކެނޑުމަށް ފަހު މި ކެމްޕެއިން އަލުން ފަށައިފައި ވާއިރު، މި ގިފްޓް ހެމްޕާގައި ހިމެނޭ މައިގަނޑު ޕްރޮޑަކްޓްތަކަކީ އެސްޓީއޯއިން ރާއްޖޭގެ ބާޒާރަށް އެތެރެ ކުރާ ޕިޔުރިޓީ ބްރޭންޑުން އަލަށް ތައާރަފް ކުރި ރީތިވާ ސާމާނުގެ އުފެއްދުންތަކެވެ. ޕިޔުރިޓީ ބްރޭންޑްގެ އުފެއްދުންތަކަކީ ކުޑަކުދިންގެ ނާޒުކު ހަންގަނޑަށް އަރާމު ލިއްބައިދޭ، ދުޅަހެޔޮ މާއްދާތައް އެކުލެވޭ އުފެއްދުމަކަށް ވުމާއެކު މި އުފެއްދުން ތަކަކީ ދިވެހިންގެ މެދުގައި މިހާރު މަގުބޫލު ވަމުން އަންނަ އިތުބާރުކުރެވޭ ބްރޭންޑެކެވެ.
އެސްޓީއޯގެ މަގްސަދަކީ އަލަށް އުފަންވާ ކުދިންނަށް ދެވޭ މި ގިފްޓް ހެމްޕާ ރާއްޖޭގެ ހުރިހާ ހޮސްޕިޓަލް ތަކެއްގައި އުފަންވާ ކުދިންގެ އާއިލާތަކަށް ލިބޭނެހެން މި ކެމްޕެއިން ފުޅާ ކުރުން ކަމަށް އެކުންފުނިން ބުނެއެވެ.
އެސްޓީއޯއިން ދާދި ފަހުން ވަނީ ޓްރީޓޮޕް ހޮސްޕިޓަލުގައި އަލަށް އުފަންވާ ކުދިންނަށްވެސް ގިފްޓް ހޭމްޕާ ދިނުމުގެ ޕްރޮގްރާމެއް ފަށާފައެވެ. އެޕްރޮގްރާމް ކުރިއަށްދާނި އެއް އަހަރު ދުވަހުގެ މުއްދަކަށެވެ.
