ލޯކަލް އޮތޯރިޓީ ކުންފުނިތަކާއި ކައުންސިލްތަކުން ހިއްސާވާ އަމިއްލަ ވިޔަފާރިތަކަށް ކެޕިޓަލްގެ ގޮތުގައި ނުވަތަ އެނޫންވެސް ގޮތަކުން ކައުންސިލްތަކުން ޚަރަދުކުރަންވާނީ ފިނޭންސް މިނިސްޓްރީން ކަނޑައަަޅާ އުސޫލަކުން ކަމަށް ބަޔާންކޮށް ދައުލަތުގެ މާލިއްޔަތުގެ ގާނޫނަށް އިސްލާހު ގެނެސްފިއެވެ.
ދާންދޫ ދާއިރާގެ މެމްބަރ ޔައުގޫބް އަބްދުﷲ ހުށަހަޅުއްވާފައިވާ މިއިސްލާހުގެ ބިލަކީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނާއި ފުށުއަރާ ގާނޫނުތައް އިސްލާހު ކުރުމަށް ދީފައިވާ 6 މަސްދުވަސްތެރޭގައި އެއިސްލާހުތައް ގެނައުމަށް ހުށަހަޅާފައިވާ ބިލެކެވެ. މިބިލް ދިރާސާކޮށްފައިވަނީ މާލިއްޔަތު ކޮމިޓީ އާއި ލާމަރުކަޒީ ކޮމިޓީގެ ޖޮއިންޓް ކޮމިޓީއަކުންނެވެ.
މިބިލަށް ގެނެސްފައިވާ އިސްލާހުތަކުގެ ތެރޭގައި ލޯކަލް އޮތޯރިޓީ ކުންފުނިތަކުގެ ބީލަމުގެ ކަންކަން ހިންގާނެ އުސޫލު ކަނޑައެޅުމުގެ ބާރު މިނިސްޓަރަށް ދިނުން ހިމެނެއެވެ.
މީގެއިތުރުން ދައުލަތުގެ ފައިސާ މެނޭޖްކުރުމުގައި ދައުލަތުގެ ފައިސާ އެކަށީގެންވާ ހަރުދަނާ ގޮތެއްގައި މެނޭޖްކުރުމަށްޓަކައި ދައުލަތުގެ އޮފީސްތަކުން އަމަލުކުރަންޖެހޭ ގަވާއިދުތަކާއި އުސޫލުތައް މިނިސްޓަރަށް އެކުލަވާލެވިދާނެއެވެ. މިގޮތުން އެކުލަވާލާއިރު ސަރުކާރުގެ ކޭޝްފްލޯ އެކަށީގެންވާ ހަރުދަނާ ގޮތެއްގައި މެނޭޖްކުރުމަށާއި ސަރުކާރުގެ ބޭންކު އެކައުންޓްތަކުގެ ކޭޝް ބެލެންސް އެކަށީގެންވާ ހަރުދަނާ ގޮތެއްގައި މެނޭޖްކުރުމަށްޓަކައި ޓްރެޝަރީ ސިންގަލް އެކައުންޓްގެ ނިޒާމް ގާއިމުކޮށް ހިންގުމުގެ ގަވާއިދުތަކާއި އުސޫލުތައް އެކުލަވާލެވިދާނެއެވެ.
މިބިލް ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި 56 މެމްބަރުންގެ އިއްތިފާގުންނެވެ.
