ޓްވިޓަރގެ ސީއީއޯގެ މަގާމުން ޖެކް ޑޯރސީ ދުރުވެއްޖެ
ޓްވިޓާގެ ސީއީއޯގެ މަގާމާ ޑޯރސީ ހަވާލުވީ 2015 ވަނަ އަހަރު
ޓްވިޓަރގެ ކޯ-ފައުންޑަރ ޖެކް ޑޯރސީ
ޓްވިޓަރގެ ކޯ-ފައުންޑަރ ޖެކް ޑޯރސީ އެކުންފުނީގެ ސީއީއޯގެ މަގާމުން ދުރުވާން ނިންމަވައިފިއެވެ.
ޑޯރސީ މަގާމުން ދުރުވާން ނިންމެވުމާއެކު ޓްވިޓަރގެ ސީއީއޯގެ މަގާމަށް އައްޔަންކުރައްވާފައިވަނީ އެ ކުންފުނީގެ ބޯޑް މެމްބަރ، އަދި ކުރީގެ ޗީފް ޓެކްނޮލޮޖީ އޮފިސަރ ޕާރަގް އަގްރަވާލްއެވެ.
ޓްވިޓާގެ ސީއީއޯގެ މަގާމުން ވަކިވެފައިވާކަން އިއުލާކުރައްވައި ޑޯރސީ ވަނީ ސްޓޭޓްމެންޓެއް ނެރުއްވާފައެވެ. އެ ސްޓޭޓްމެންޓުގައި އޭނާ ކުންފުނި ދޫކޮށްލަން ނިންމާފައިވާ ސަބަބެއް ސާފުކޮށް ބަޔާންކުރައްވާފައެއް ނުވެއެވެ. ޓްވިޓަރގެ ސީއީއޯގެ މަގާމު ޕާރަގް ވަރަށް ފުރިހަމައަށް އަދާކުރައްވާނެކަމުގެ ޔަގީންކަން އެބައޮތް ކަމަށާއި، ޕާރަގް ވަނީ ފާއިތުވި 10 އަހަރު ތެރޭގައި ބޮޑެތި މަސައްކަތްތަކެއް ކުރައްވާފައިވާކަމަށް ވިދާޅުވިއެވެ. އެކަމަށް ޝުކުރުވެރިވާކަމަށާއި، މިއީ ޕާރަގް ޓްވިޓަރގެ ހިންގުމާ ހަވާލުވާންވީ ވަގުތުކަމަށް ވިދާޅުވިއެވެ.
ޑޯރސީ ވިދާޅުވީ ޓްވިޓަރގެ ސީއީއޯގެ މަގާމުން ދުރުވާން ނިންމި ނިންމުމަކީ އޭނާގެ އަމިއްލަ ނިންމެވުމެއް ކަމަށާއި، އަދި އުނދަގޫ ނިންމެވުމެއް ކަމަށެވެ.
އެހެންނަމަވެސް އޭނާ އަދިވެސް ހުންނެވީ އޭނާގެ ޑިޖިޓަލް ޕޭމެންޓް ކުންފުނި "ސްކޮއެރ"ގެ ސީއީއޯގެ މަގާމުގައެވެ.
