އިންޑިއާއާއެކު ހަދާފައިވާ އެއްބަސްވުންތަކުގައި ގޯހެއް ނެތް ކަމަށް މަޖިލީހުން ފާސްކޮށްފި
29 ނޮވެމްބަރު 2021 | ހޯމަ 18:18ރިޕޯޓަށް، މަޑުއްވަރީ ދާއިރާގެ މެމްބަރ އާދަމް ޝަރީފް 13 އިސްލާހެއް ހުށަހެޅުއްވި
ރައްޔިތުންގެ މަޖިލީހުގެ ޖަލްސާއެއްގެ ތެރެއިން
ރާއްޖެއިން އިންޑިއާއާއެކު ހަދާފައިވާ އެއްބަސްވުންތަކުގައި އެއްވެސް ގޯހެއް ނެތް ކަމަށް ރައްޔިތުންގެ މަަޖިލީހުން ފާސްކޮށްފިއެވެ.
ރައްޔިތުންގެ މަޖިލީހުން މިގޮތަށް ފާސްކޮށްފައި މިވަނީ އިންޑިއާއާއެކު ގާއިމުކުރި ތިން އެއްބަސްވުމެއް ދިރާސާކުރުމަށް ރައްޔިތުންގެ މަޖިލީހުގެ ސަލާމަތީ ޚިދުމަތްތަކާއި ބެހޭ ކޮމިޓީ ނުވަތަ 241 ކޮމިޓީއަށް މަޑުއްވަރީ ދާއިރާގެ ޕީއެންސީ މެމްބަރ އާދަމް ޝަރީފް ހުށަހެޅުއްވި މައްސަލަ ދިރާސާކޮށް ނިންމި ގޮތުގެ ރިޕޯޓު ފާސްކުރުމަށް ނެގުނު ވޯޓުގައެވެ. މިރިޕޯޓް ފާސްކުރުމަށް 53 މެމްބަރުން ވޯޓު ދެއްވިއިރު، ރިޕޯޓް ފާސްކުރުމަށް ނުފެންނަކަމަށް 6 މެމްބަރުން ވޯޓު ދެއްވާފައިވެއެވެ. މިރިޕޯޓް ފާސްކޮށްފައިމިވަނީ މިކަން ދިރާސާކުރި 241 ކޮމިޓީން ރިޕޯޓް ދިރާސާކުރި ގޮތަށެވެ.
ރިޕޯޓަށް ތަޅުމުން ވަނީ 13 އިސްލާހެއް ހުށަހަޅާފައެވެ. 13 އިސްލާހުވެސް ހުށަހަޅުއްވާފައިވަނީ މަޑުއްވަރީ ދާއިރާގެ މެމްބަރ އާދަމް ޝަރީފެވެ. ނަމަވެސް މިއިން އެއްވެސް އިސްލާހެއް ފާސްވެފައެއްނުވެއެވެ.
އާދަމް ޝަރީފް ހުށަހެޅުއްވި އިސްލާހުތަކުގައި ވަނީ ކޮމިޓީގެ ނިންމުމުގެ ބައެއް އިބާރާތްތަކަށް ބަދަލު ގެނައުމަށާއި، ބައެއް މާއްދާތައް އިތުރު ކުރުމަށެވެ.
އެގޮތުން "އެކްޝަން ޕްލޭން ފޯ ޑިފެންސް ކޯޕަރޭޝަން ބިޓްވީން މޯލްޑިވްސް އެންޑް އިންޑިއާ"އަކީ 2016 ވަނަ އަހަރު އޭރުގެ ރައީސުލްޖުމްހޫރިއްޔާ އިންޑިޔާއަށް ކުރެއްވި ރަސްމީ ދަތުރުފުޅެއްގައި ވެފައިވާ އެއްބަސްވުމެއް ކަމަށް އޮންނަ އިބާރާތް އެކްޝަން ޕްލޭނަކަށް ބަދަލުކުރުމަށެވެ. އަދި ރިޕޯޓުގައި ވަނީ ޔޫޓީއެފް އެއްބަސްވުމުގެ ދަށުން ޑޯނިއާ މަތިންދާބޯޓާއެކު ހަރަކާތްތެރިވާ އިންޑިޔާގެ ފަރާތްތަކުގެ ކެއުމާއި ތިބުމާއި އަދި އެހެނިހެން ހަރަދުތައް ހަމަޖައްސަމުން ދަނީ އިންޑިޔާ ސަރުކާރުގެ ފަރާތުން ކަމަށެވެ. އިސްލާހުގައި ވަނީ "އިންޑިޔާގެ ފަރާތްތައް" މި ލަފްޒު "އެގައުމުގެ ސިފައިންނަށް" ބަދަލުކޮށްފައެވެ.
އާދަމް ޝަރީފް ހުށަހެޅުއްވި މައްސަލައާ ގުޅިގެން 241 ކޮމިޓީން ދިރާސާކުރީ، އުތުރު ތިލަފަޅު (ޔޫޓީއެފް)ގައި ސިފައިންގެ ޑޮކްޔާޑަކާއި ބަނދަރެއް ހަދަން އިންޑިއާއާއެކު ސޮއިކުރި އެއްބަސްވުމާއި، 2016 ވަނަ އަހަރު އެކުލަވާލި ޑިފެންސް ކޯޕަރޭޝަން އެއްބަސްވުމާއި، ރާއްޖޭގެ ހައިޑްރޯގްރާފީ ދިރާސާކުރަން އިންޑިއާއާއެކު ހެދި އެއްބަސްވުމެވެ.
ކޮމިޓީން އެއްބަސްވުންތައް ދިރާސާކުރިއިރު ޑިފެންސް މިނިސްޓަރު މާރިޔާ އަހުމަދު ދީދީއާއި ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލް، ކޮމިޓީގެ ބައްދަލުވުމަކަށް ވަޑައިގެން އެއްބަސްވުންތަކުގެ ތަފްސީލް މައުލޫމާތު ދެއްވިއެވެ. އަދި ކޮމިޓީން އެދުމުން މާރިޔާ ވަނީ އެ އެއްބަސްވުންތައް ކޮމިޓީގެ މެމްބަރުންނާވެސް ހިއްސާ ކުރައްވާފައެވެ. އެއްބަސްވުމުގެ ކޮޕީ މެމްބަރުންނަށް ވަކިން ދެއްވާފައި ނުވަނީ އެއީ ސިއްރު އެއްބަސްވުންތަކަށް ވާތީއެވެ. ކޮމިޓީން ރިޕޯޓް ފާސްކުރި ދުވަހު 241 ކޮމިޓީގައި ތިއްބަވާ އިދިކޮޅު ޕީޕީއެމް/ޕީއެންސީ މެމްބަރުން ކަމުގައިވާ މައްސަލަ ހުށަހެޅުއްވި މަޑުއްވަރީ ދާއިރާގެ މެމްބަރ އާދަމް ޝަރީފް އަދި ގުރައިދޫ ދާއިރާގެ ޕީޕީއެމް މެމްބަރ ޣައްސާން މައުމޫން ކޮމިޓީ ބައްދަލުވުމަށް ވަޑައިނުގަންނަވައެވެ.
ކޮމިޓީ ރިޕޯޓަށް ބަހުސްކުރައްވަމުން އިދިކޮޅު މެމްބަރުން ވަނީ އެއްބަސްވުމުގެ ކޮޕީއެއް ނުފެންނަކަމަށް ވިދާޅުވެ ވާހަކަދައްކަވާފައެވެ. ކޮމިޓީ ބައްދަލުވުމުގައި އެޅުވީ ޕްރެޒެންޓޭޝަނެއް ކަމަށާއި، އެއްބަސްވުން ނުފެންނަކަމަށް އިދިކޮޅު މެމްބަރުން ވިދާޅުވެ ވާހަކަ ދައްކަވަން ފެއްޓެވުމުން ރިޔާސަތުގައި އިންނެވި މަޖިލީހުގެ ރައީސް، ރައީސް މުހައްމަދު ނަޝީދު ވަނީ ތަކުރާރުކޮށް އެމެމްބަރު އަރިހު، ޕްރެޒެންޓޭޝަންގެ ގޮތުގައި އެއްބަސްވުން ފެނިވަޑައިނުގަންނަވާތޯ ސުވާލުކުރައްވާފައެވެ. ދިވެހި ދައުލަތުގެ ނިޝާން ޖަހައި، ކަމާބެހޭ ފަރާތްތަކުން ސޮއިކޮށްފައިވާ އެއްބަސްވުމެއް ޕްރެޒެންޓޭޝަންގައި ނުދައްކާތޯ ތަކުރާރުކޮށް ސުވާލުކުރައްވާފައެވެ.
އެސުވާލަށް ޖަވާބު ދެއްވަމުން އިދިކޮޅުން ބުނަމުންދިޔައީ އެއްބަސްވުން ނުފެންނަކަމަށެވެ.
