ހަމްދޫކް އަލުން މަގާމާ ހަވާލުވެ އޭނާ ހައްޔަރުކުރި ފުލުހުން ބޭރުކޮށްފި
29 ނޮވެމްބަރު 2021 | ހޯމަ 08:05ސިޔާސީ އެހެން ކުށްވެރިންވެސް މިހާރު ވަނީ ދޫކޮށްލާފައި
ސޫދާންގެ ބޮޑުވަޒީރު
އަބްދުﷲ ހަމްދޫކް ސޫދާންގެ ބޮޑުވަޒީރުކަމާ އަލުން ހަވާލުވުމަށްފަހު އޭނާ ހައްޔަރުކުރި ފުލުހުންގެ އިސްވެރިން މަގާމުން ދުރުކޮށްފިއެވެ.
މިދިޔަ އޮކްޓޫބަރ މަހުގެ 25 ވަނަ ދުވަހު ސޫދާންގެ އަސްކަރިއްޔާއިން ހަމްދޫކްއާއެކު އެގައުމުގެ އިތުރު މިނިސްޓަރުންތަކެއް ވަނީ ހައްޔަރުކޮށްފައެވެ. ނަމަވެސް ސިފައިން ގެނައި ބަޣާވާތައް ފަހު ޕްރެޝަރު ބޮޑުވުމުން އިތުރު އެއްވެސް ގޮތެއް ނެތިގެން ވެރިކަމުގެ ބާރުތައް އަނެއްކާވެސް ވަނީ ހަމްދޫކާއި ހަވާލުކޮށްފައެވެ. އަދި ސޫދާންގެ ސިފައިނާއި މަޝްވަރާކުރުމަށްފަހު ހަމްދޫކުގެ އިތުރުން ހައްޔަރުކުރި ހުރިހާ ސިޔާސީ ކުށްވެރިންވެސް މިހާރު ވަނީ ދޫކޮށްލާފައެވެ.
ހަމްދޫކް ހައްޔަރުކުރުމާ ގުޅިގެން ސޫދާންގެ ގިނަ އާމުންތަކެއް އޭރު ދިޔައީ މުޒާހަރާ ކުރަމުންނެވެ. މި ހަމަނުޖެހުންތަކުގެ ތެރޭގައި 42 މީހުން މަރުވެފައިވާ ކަމަށް ރިޕޯޓުތައް ބުނެއެވެ.
2019 ވަނަ އަހަރު ސޫދާންގެ ރައީސް އުމަރު އަލް ބަޝީރު ވެރިކަމުން ދުރުކުރި ފަހުން ސޫދާންގައި ވަނީ ސިޔާސީ ބޮޑު ހަމަނުޖެހުންތަކެއް އުފެދިފައެވެ. އޭގެ ފަހުން އެގައުމުގެ ވެރިކަން ކުރަމުން އަންނަނީ މަދަނީ ސިޔާސީ ބޭފުޅުންނާއި ސިފައިން ބައިވެރިވެގެން އުފައްދާފައިވާ ކައުންސިލަކުންނެވެ. ކައުންސިލްގައި ތިއްބަވާ ސިފައިން ގެންދަވަނީ ވެރިކަމުގައި ސިފައިންގެ ހިއްސާ ކުޑަކަމަށް ބުނެ ޝަކުވާ ކުރަމުންނެވެ. ބަޣާވާތް ކުރީވެސް ސިފައިން ބޭނުންވާ ގޮތަށް ގިނަ ކަންކަން ނުކުރެވޭ ކަމަށް ބުނެއެވެ.
