ޝައްފާނުގެ މަރު: ނިހާދު، ޖައިލަމް، ނަބާހު އަދި އައިމަން އުމުރަށް ޖަލަށް
އެމީހުންގެ މައްޗަށް ކުށް ސާބިތުވާކަމަށް ވަނީ ނިންމާފައި
ޝައްފާންގެ މަރުގެ މައްސަލާގައިކްރިމިނަލް ކޯޓުގައި ވީޑިއޯ ކޮންފަރެންސް މެދުވެރިކޮށް ބޭއްވި އަޑުއެހުމެއްގެ ތެރެއިން
ތޫނު އެއްޗަކުން ހަމަލާދީ މަރާލާފައިވާ ށ. ފޭދޫ ހީނާމާގެ އިސްމާއިލް ޝައްފާން ޝަރީފްގެ މަރުގެ މައްސަލައިގައި ދައުވާ އުފުލާފައިވާ 4 މީހުން އުމުރަށް ޖަލަށް ލުމަށް ކްރިމިނަލް ކޯޓުން ޙުކުމް ކޮށްފިއެވެ.
ޝައްފާންގެ މަރުގެ މައްސަލައިގައި ދައުލަތުން ދައުވާ އުފުލާފައިވާ 4 މީހުންނަކީ ސ ހިތަދޫ ޗަމަން، ޙުސައިން ނިހާދު އަހްމަދު އާއި ކ.މާލެ މއ. ޓޮމާޓާ ފްލާވަރ ޙުސައިން ޖައިލަމްގެ އިތުރުން، ސ. މަރަދޫ މޫންލައިޓްގްލޯރީ، ޙަސަން ނަބާޙް އާއި ސ.ހިތަދޫ މަލަ، މުޙައްމަދު އައިމަން ޙަބީބުއެވެ. އޭގެ ތެރެއިން ނިހާދުއާއި ޖައިލަމްގެ މައްޗަށް އުފުލާފައިވަނީ ތޫނު އެއްޗެއް ބޭނުންކޮށްގެން ޤަސްތުގައި މީހަކު މެރުމުގެ ކުށުގެ ދައުވާއެވެ. އަދި ނަބާޙްއާއި އައިމަންގެ މައްޗަށް އުފުލާފައިވާ ދައުވާއަކީ ތޫނު އެއްޗެއް ބޭނުންކޮށްގެން ޤަސްތުގައި މީހަކު މަރާލުމުގައި ބައިވެރިވުމުގެ ކުށުގެ ދައުވާއެވެ.
މި މައްސަލައިގައި އާދިއްތަ ދުވަހު ކްރިމިނަލް ކޯޓުން ކުރި ޙުކުމުގައި ވަނީ އެމީހުންގެ މައްޗަށް ކުށް ސާބިތުވާކަމަށް ނިންމައި، އުމުރަށް ޖަލަށް ލުމަށް ޙުކުމް ކޮށްފައެވެ. ގާޒީ ޙަސަން ސައީދު ކުރެއްވި ޙުކުމުގައި ބުނެފައިވަނީ މިއީ ޖިނާއަތުގެ އެންމެ މަތީ ދަރަޖައިގެ ކުށެއް ކަމަށާއި، ކުށް ކޮށްފައިވަނީ އުމުރުން 15 އަހަރުގެ ކުޑަ ކުއްޖަކާ ދެކޮޅަށް ކަމަށެވެ. އަދި މިއީ އިންސާނެއްގެ ފުރާނަޔަށް އެއްވެސް ޙުރުމަތެއް ނުބަހައްޓައި ކުރި އަމަލެއްކަން ވަނީ ފާހަގަ ކުރައްވާފައެވެ. ގާޒީ ވަނީ އެމީހުން 25 އަހަރަށް ޖަލަށް ލުމަށް ޙުކުމް ކުރައްވާފައެވެ.
މި މައްސަލައިގައި ޤިސާސް (މަރަށް މަރު) ހިފުމަށް ބަލާއިރު، މި މައްސަލާގައި ދަޢުވާލިބޭ ފަރާތްތައް (ނިޔާވި ކުއްޖާ)އަށް ޙަމަލާދީ ބައިވެރިވެފައިވާކަމަށް ތަޙުޤީޤާއި ޝަރީއަތުގެ މަޖިލީހުގައި އިންކާރުކޮށްފައި ވުމުންނާއި، ޙާދިސާ ލޮލަށް ފެނުނު ދެ ހެކިންގެ ތެރެއިން އެއް ހެކިވެރިޔާ ހެކިބަހުން ރުޖޫޢަވުމުންނާއި، އަނެއް ހެކިވެރިޔާ ޝަރީއަތުގެ މަޖިލީހުގައި ދަޢުވާލިބޭ ހަތަރު ފަރާތް ތަޙުޤީޤުގައި ފާހަގަ ކޮށްފައިވަނީ އޮޅުމަކުންކަމަށް ބުނެ ހެކިބަސްދީފައިވާކަން ގާޒީ ފާހަގަ ކުރެއްވިއެވެ.
ގާޒީ ވިދާޅުވީ، ހަރުދަނާ ޤަރީނާތަށް ހުރި ނަމަވެސް، އެންމެ މުހިއްމު ޝަފަހީ ދެހެކިންގެ ހެކިބަހާމެދު އޮޅުން އުފެދި، އެ ދެހެކިންގެ ހެކިބަސް ޝަރީޢަތަށް ލިބިފައިނުވާ ކަމަށެވެ. އެއާއެކު ޤިސާސްގެ ކުށް ސާބިތުކުރުމަށް އިސްލާމީ ޝަރީޢަތުގައި ކަނޑައަޅާފައިވާ އެއްވެސް ޝައްކެއް ނެތް މިންވަރަށް ނުވަތަ އެ އަމަލު ދަޢުވާލިބޭ ފަރާތްތައް ހިންގިކަމަށް މުޅިން ޔަޤީންވާ މިންވަރަށް ޤަސްދު މަރު ޝަރީއަތަށް ސާބިތުނުވާކަމަށް ގާޒީ ވިދާޅުވިއެވެ.
ތޫނު އެއްޗަކުން ހަމަލާދީ ޝައްފާނު މަރާލާފައިވަނީ ދެ ގްރޫޕެއްގެ ދެމެދުގައި ހިނގި ސިލްސިލާ މާރާމާރީތަކާ ގުޅިގެން ބަދަލުހިފުމުގެ ގޮތުން ކަމަށް އެ މައްސަލަތަކުގެ ތަހުގީގު ޓީމުން ބުނެފައިވެއެވެ.
މީގެ އިތުރުން 2018 އޮކްޓޫބަރު 11 ވަނަ ދުވަހުގެ ދަންވަރުގެ ވަގުތެއްގައި އިސްމާއިލް ޝައްފާން ޝަރީފް މަރާލީ އޭނާ ދިރިއުޅެމުން ދިޔަ ސަބުދެލިޔާ މަގު ގ. ރޯޒީ ކުރިމަތިން ބަޔަކު ތޫނު އެއްޗަކުން ހަމަލާދީއެވެ. އޭނާ ހޮސްޕިޓަލަށް ގެންދެވުނު އިރު ވެސް އޭނާ ދިރިހުރި ކަމުގެ ނިޝާނެއް ފެންނަން ނެތް ކަމަށް ތަހުގީގު ޓީމުން ބުނެފައިވެއެވެ. އޭނާގެ ގައިގެ 8 ތަނަކަށް ތޫނު އެއްޗަކުން ހަމަލާ ދީފައިވާ ކަމަށް ފުލުހުންގެ ތަހުގީގަށް ފާހަގަކުރެވިފައިވާ ކަމަށް ވެސް ބުނެފައިވެއެވެ.
