ހިޔާ ފްލެޓުތަކަށް ފެން ބިލް ފޮނުވުމުގައި މައްސަލަތައް ދިމާވަމުންދަނީ އެތަނުގައި ހުރި ފެން މީޓަރުތަކުގެ ސަބަބުން ކަމަށާއި، އެ މައްސަލަ ހައްލުކުރަން މަސައްކަތްތަކެއް ކޮށްފައިވާކަމަށް މާލެ ވޯޓަރ އެންޑް ސްވެރޭޖް ކޮމްޕެނީ (އެމްޑަބްލިއުއެސްސީ)އިން ބުނެފިއެވެ.

ހިޔާ ފްލެޓުތަކުގެ ފެން ބިލްތަކަށް ދިމާވާ މައްސަލަތަކާ ގުޅޭގޮތުން ރާއްޖެޓީވީއަށް ދެއްވި އިންޓަރވިއުއެއްގައި އެމްޑަބްލިއުއެސްސީގެ މެނޭޖިންގ ޑިރެކްޓަރ ހަސަން ޝާހު ވިދާޅުވީ، ހިޔާ ފްލެޓުތަކުގައި މިހާރު ބަހައްޓާފައިހުރި ފެން މީޓަރުތަކަކީ އެމްޑަބްލިއުއެސްސީން އެތަނުގައި ބަހައްޓާފައި ހުރި ފެން މީޓަރުތަކެއް ނޫން ކަމަށެވެ. އެ ފެން މީޓަރުތަކަކީ ކުރީ ސަރުކާރުން އެތަނުގައި ބަހައްޓާފައި ހުރި ފެން މީޓަރުތަކެއް ކަމަށް ޝާހު ވިދާޅުވިއެވެ.

މިތަނުން ބައެއް މީޓަރުތަކަކީ މައްސަލަ ޖެހިފައިހުރި މީޓަރުތަކެއް ކަމަށް ޝާހު ވިދާޅުވިއެވެ. އެކަން އެޗްޑީސީގެ ސަމާލުކަމަށްވެސް ގެނެސްފައިވާކަމަށް ޝާހު ވިދާޅުވިއެވެ. މީޓަރުތަކުން ނަގާ ރީޑިންތަކަށް ރިއާޔަތްކޮށް ބިލް ހަދާއިރު، ބުއްދި ގަބޫލު ނުކުރެވޭ ވަރުގެ އަދަދުތައް ބިލަށް އަރާ ކަމަށް ޝާހު ވިދާޅުވިއެވެ. ކޮންޓްރެކްޓަރު އަޅުވާފައި ހުރި މީޓަރުތަކުގައި އެއްގޮތް ސީރިއަލް ނަންބަރު ހުރުމުގެ ސަބަބުން، އެމްޑަބްލިއުއެސްސީގެ ޑޭޓާބޭސްއަށް އެޅުމުގައި ދަތިތަކެއް ދިމާވާކަމަށް ޝާހު ވިދާޅުވިއެވެ.

މިގޮތުން ބައެއް މީޓަރުތަކަށް 6 ލައްކަ ނުވަތަ 7 ލައްކަ ރުފިޔާވެސް އަރާފައިވާކަމަށާއި، އަދި ބައެއް މީޓަރުތަކަށް 3،500އާ 4،000 ރުފިޔާވެސް އަރާފައިވާކަމަށް ޝާހު ވިދާޅުވިއެވެ. އެހެންކަމުން ގޭބީސީތަކުން ފެން ބޭނުންކުރާ މިންވަރު މޮނިޓަރ ކުރުމަށްފަހު 3،500އާ 4،000 ރުފިޔާއާ ދެމެދުގެ އަދަދު އަރާ މީޓަރުތަކަކީ މައްސަލަ ނުޖެހި ހުރި މީޓަރުތައް ކަމުގައި ކަނޑައެޅީ ކަމަށް ޝާހު ވިދާޅުވިއެވެ.

ޝާހު ވިދާޅުވީ މައްސަލަ ނުޖެހި ހުރި މީޓަރުތަކަށް ބިލް ފޮނުވުމުގެ މަސައްކަތް ކުރަމުން ދާނެކަމަށެވެ. އަދި ބިލްތައް ދައްކަން ދަތިވާ ހާލަތުގައި އެމްޑަބްލިއުއެސްސީއަށް އެކަން އަންގައި، އެކި ބައިބައަށް ބަހައިގެން ބިލް ދެއްކުމުގެ އިންތިޒާމުވެސް ހަމަޖެއްސޭނެ ކަމަށެވެ. އަދި މައްސަލަ ދިމާވެފައިވާ މީޓަރުތަކަށް ދިމާވި މައްސަލަ ހައްލު ނުކޮށް ބިލް ނުފޮނުވާނެ ކަމަށެވެ. މައްސަލަ ދިމާވެފައިހުރި މީޓަރުތަކުގެ ގޮތުގައި 200 ވަރަކަށް މީޓަރު ފާހަގަކުރެވިފައިވާކަމަށް ޝާހު ވިދާޅުވިއެވެ.

މި މައްސަލަތަކާއި ގުޅޭގޮތުން އިތުރަށް ވާހަކަދައްކަަމުން ޝާހު ވިދާޅުވީ، ފެނުގެ މައި ނެޓްވޯރކުން ފެށިގެން ފެން މީޓަރުތަކާ ހަމައަށް އަޅާފައި އޮތީ އެމްޑަބްލިއުއެސްސީން ބޭނުންކުރާ ކަހަލަ ހޮޅިއެއް ނޫންކަމަށެވެ. އެހެންކަމުން އެހޮޅިއަށް ގެއްލުމެއް ލިބިއްޖެނަމަ، މަރާމާތު ކުރާނެ ޓޫލްސްވެސް އެކުންފުނީގައި ނެތުމުން، އެކަމަށް ހައްލު ހޯދުމުގެ މަސައްކަތްވެސް ކުރަން ޖެހިފައިވާކަން ފާހަގަ ކުރެއްވިއެވެ.

ޝާހު ވިދާޅުވީ، އެއް އެޕާޓުމަންޓުގައި މެއިންޓެނަންސް ކުރަން ބޭނުންވެއްޖެ ހިނދެއްގައި މުޅި ފްލޯރއިން ފެން ކަނޑާލައިގެން ނޫނީ އެމަސައްކަތްވެސް ކުރިއަށް ނުގެންދެވޭނެކަމަށެވެ. އަދި ރަނގަޅަށް ވޭލް ހަރުކުރެވިފައި ހުރިނަމަ، މުޅި ފްލޯރ އެއްކޮށް ފެން ކަނޑާނުލައި މަސައްކަތް ކުރިއަށް ގެންދެވޭނެ ކަމަށެވެ.

ބާކީ ހުރި ފޯލްޓީ މީޓަރުތަކާއި ހޮޅިލައިންގެ މައްސަލަތަކާ ގުޅޭ ގޮތުން އެޗްޑީސީއިން ލަފާދެނީ ކޮންޓްރެކްޓަރާ ގުޅުމަށްކަމަށް ޝާހު ވިދާޅުވިއެވެ. އަދި ކޮންޓްރެކްޓަރުގެ އެއްބާރުލުން ނުލިބޭ ހާލަތުގައި، އެކުންފުނީގެ އަމިއްލަ ޚަރަދުގައި ނަމަވެސް، ހިޔާގައި ދިރިއުޅޭ މީހުންނަށް ދިމާވާ މައްސަލަތަކަށް ހައްލެއް ހޯދައިދޭން ބޭނުންވާކަމަށާއި، އެ މީޓަރުތަކުގެ މައްސަލަ ހައްލު ނުކުރެވޭނަމަ އައު މީޓަރު އަޅުވާނެ ކަމަށް ޝާހު ވިދާޅުވިއެވެ.