އައު ވޭރިއަންޓާއެކު ދެކުނު އެފްރިކާގެ 8 ގައުމެއްގެ މީހުން އެމެރިކާއަށް އެތެރެވުން މަނާކުރަނީ

ދެކުނު އެފްރިކާއިން ފެނިފައިވާ ކޮވިޑް-19ގެ އައު ވޭރިއަންޓް ކަމުގައިވާ އޮމިކްރޯންގެ ސަބަބުން ދެކުނު އެފްރިކާގެ 8 ގައުމަކުން އެމެރިކާއަށް މީހުން އެތެރެވުން މަނާކުރުމަށް އެގައުމުން ނިންމައިފިއެވެ.

ހޯމަ ދުވަހުން ފެށިގެން މިސިޔާސަތު ތަންފީޒުކުރަން ފަށާނެކަމަށް އެމެރިކާގެ ރައީސް ޖޯ ބައިޑަން ވިދާޅުވިއެވެ. އެމެރިކާއަށް މިގައުމުތަކުގެ މީހުން އައުން މަނާވިކަމުގައިވިޔަސް އެގައުމުތަކުން ފްލައިޓްތައް އެމެރިކާއަށް މިހާރު ކުރަމުންދާ ދަތުރުތައް ކުރާނެއެވެ. އަދި މި ސިޔާސަތު އެމެރިކާގެ ރައްޔިތުންނާއި އެމެރިކާގެ ޕާމަނަންޓް ރެޒިޑެންޓް ވިސާ ލިބިފައިވާ މީހުންނަށް ތަންފީޒެއް ނުވާނެއެވެ.

އެމެރިކާއަށް އެތެރެވުން މަނާކޮށްފައިވާ ދެކުނު އެފްރިކާގެ ގައުމުތަކަކީ ދެކުނު އެފްރިކާ، ބޮޓްސްވާނާ، ޒިމްބާބުއޭ، ނެމީބިއާ، ލެސޯތޯ، އެސްވަޓިނީ، މޮޒަމްބީގް އަދި މަލާވީއެވެ. ފާއިތުވި 14 ދުވަހު އެގައުމުތަކަށް ދަތުރުކޮށްފައިވާ އެމެރިކާ ނޫން ރައްޔިތުންނަށްވެސް އެމެރިކާއަށް އެތެރެއެއް ނުވެވޭނެއެވެ.

އައު ވޭރިއަންޓް އޮމިކްރޯން އާއެކު ބައިޑަން އަށް ވަނީ އެމެރިކާގައި ކޮވިޑް-19 ކޮންޓްރޯލް ކުރުމަށް އިތުރު ގޮންޖެހުންތަކާ ކުރިމަތިވެވަޑައިގެންފައެވެ. ވަކިން ޚާއްސަކޮށް ސިޔާސީ ގޮތުން ޚިޔާލު ތަފާތުވެގެން 10 ސްޓޭޓަކުން ވެކްސިން ޖެހުމާ ދެކޮޅު ހަދަމުންދާއިރު އާބާދީގެ ގިނަ ބަޔަކަށް ވެކްސިން ޖެހުމުގައި ބައިޑަން އަށް ވަނީ ނާކާމިޔާބީ އާ ކުރިމަތިވެވަޑައި ގެންފައެވެ. އަނެއްކޮޅުން ބައިޑަންވަނީ، ފަގީރު ގައުމުތަކަށް ވެކްސިން ފޯރުކޮށްދިނުމުގައި ފެއިލްވެފައިވާތީ ބައިނަލް އަގުވާމީ ފަރާތްތަކުގެ ފާޑުކިޔުން ތައްވެސް އަމާޒުވެފައެވެ.

އައު ވޭރިއަންޓާއެކު ބައެއް ގައުމުތަކުން ވަނީ ދަތުރުކުރުމުގައި އަވަސް ފިޔަވަޅުތަކެއް އަޅާފައެވެ.