ދެކުނު އެފްރިކާއިން ކޮވިޑްގެ އައު ވޭރިއަންޓެއް ފެނިއްޖެ

ކޮވިޑްގެ އައު ވޭރިއަންޓެއް ދެކުނު އެފްރިކާއިން ފެނިފައިވާކަމަށް އެގައުމުގެ ސައިންސްވެރިން ބުނެފިއެވެ.

އަދި މިހާތަނަށް މިވޭރިއަންޓްގެ ހޯދިފައިވަނީ މަދު އަދަދެއްގެ ކޭސްތަކެއް ކަމަށާއި, މިވޭރިއަންޓްގެ ބާރުގަދަކަން ހުރި މިންވަރު ދެނެގަތުމުގެ މަސައްކަތްކުރަމުން އަންނަކަމަށް ސައިންސްވެރިން ވަނީ ބުނެފައެވެ. ވޭރިއަންޓް ބީ.1.1.529އާ ގުޅޭގޮތުން ވާހަކަދައްކަމުން ސައިންސްވެރިން ބުނެފައިވަނީ މިވޭރިއަންޓްގައި 32 ސްޕައިކް ޕްރޮޓީން މިޔުޓޭޝަން އެކުލެވޭކަމަށެވެ.

އެހެންކަމުން މިމިޔުޓޭޝަން އަކީ ކަންބޮޑުވާ މިޔުޓޭޝަނެއްގެ ގޮތުގައި ބައެއް ސައިންސްވެރިން ވަނީ ފާހަގަކޮށްފައެވެ. އިންސާނުންގެ ހަށިގަނޑުގެ ސެލްތަކަށް ވަނުމަށް ވައިރަސް ބޭނުންކުރާ އެއްޗަކީ ސްޕައިކް ޕްރޮޓީންސްއެވެ. ވެކްސިން މަސައްކަތްކުރަމުންދަނީ މި ސްޕައިކްތައް ހޯދައި އެ ނިޔުޓްރަލައިޒްކުރުމަށެވެ. ޕްރޮޓީން ސްޕައިކްގެ މިޔުޓޭޝަންތަކަކީ މިހާތަނަށް އައިއިރު އެމްއާރުއެންއޭ ވެކްސިނަށް އެހާ ބޮޑަށް އަސަރުކުރާ މިޔުޓޭޝަންތަކެއް ނޫނެވެ. އެހެންކަމުން ފައިޒަރއާއި މޮޑާނާގެ ކޮވިޑް ވެކްސިން މިވޭރިއަންޓާ ދެކޮޅަށް އެންމެ އެދެވޭގޮތުގައި މަސައްކަތް ނުކޮށްފާނެކަމުގެ ބިރު ވަނީ ހީވެފައެވެ.

އެހެންނަމަވެސް އަދި މިވޭރިއަންޓްގެ ފެނިފައިވަނީ މަދު ކޭސްތަކެކެވެ. އެއީ ބޮޓްސްވާނާއިން 3 ކޭސް ފެނިފައިވާއިރު ދެކުނު އެފްރިކާއިން ފެނިފައިވަނީ 6 ކޭހެކެވެ. މީގެއިތުރުން ދެކުނު އެފްރިކާއިން ހޮންގކޮންގއަށް ދަތުރުކުރި މީހެއްގެ ފަރާތުންވެސް މި ވޭރިއަންޓް ފެނިފައިވެއެވެ.

ޔުނިވަރސިޓީ ކޮލެޖް ލަންޑަންގެ ޕްރޮފެސަރ އެއްކަމުގައިވާ ފްރާންކޮއިސް ވިދާޅުވީ، މިވަގުތު ޖެހޭނީ ވޭރިއަންޓަށް އަންނަ ބަދަލުތައް ގާތުން ބަލަމުން ދާންކަމަށެވެ. މިވޭރިއަންޓާމެދު ކަންބޮޑުވާން ޖެހޭނީ ކައިރި މުސްތަގުބަލެއްގައި މިވޭރިއަންޓްގެ ގިނަ ކޭސްތަކެއް ފެނިއްޖެނަމަ ކަމަށް ޕްރޮފެސަރ ވިދާޅުވިއެވެ.

މީގެއިތުރުން އެހާ ގިނަ މިޔުޓޭޝަންތަކެއް މިވޭރިއަންޓްގައި ހުރުމާގުޅޭގޮތުން ވާހަކަދައްކަވަމުން ޕްރޮފެސަރ ވިދާޅުވީ، އެގޮތަށް ވުމުގެ ސަބަބެއްކަމަށް، ބޮޑުބައްޔެއްގެ ސަބަބުން ދިފާއީ ނިޒާމު ވަރަށް ބަލިކަށި ވެފައިވާ މީހެއްގެ ހަށިގަނޑުގައި ވައިރަސް މިޔުޓޭޓްވެފައި ހުރުން ވެދާނެކަމަށެވެ. ޕްރޮފެސަރ ވިދާޅުވީ އެފަދަ މީހަކީ އެޗްއައިވީ އެއިޑްސް ޖެހި އެއްވެސް ފަރުވާ އެއް ނުކޮށް ހުރި މީހަކަށް ވުން އެކަށީގެންވާކަމަށެވެ.

ދެކުނު އެފްރިކާއިން ވަނީ އައު ވޭރިއަންޓާ ގުޅޭގޮތުން މަޝްވަރާކުރުމަށް ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ)ގެ ވައިރަސް އެވޮލިޔުޝަންއާ ގުޅޭ ގްރޫޕްތަކުގެ ބައްދަލުވުމެއް، ހުކުރު ދުވަހު ބޭއްވުމަށް އެދިފައެވެ.

ދެކުނު އެފްރިކާއަކީ މިދިޔަ އަހަރު ފެނުނު ބީޓާ ވޭރިއަންޓް ފެނުނު ގައުމެވެ. ބީޓާ ވޭރިއަންޓަކީ ކޮވިޑްގެ ވޭރިއަންޓް ތަކުގެ ތެރެއިން ވޭރިއަންޓް އޮފް ކޮންސަރންގައި ހިމެނޭ ހަތަރު ވޭރިއަންޓްގެ ތެރެއިން އެއް ވޭރިއަންޓެވެ. އަދި ކޮވިޑް-19ށް އުފައްދާފައިވާ ވެކްސިން ތަކުގެ އަސަރު، ކުޑަކޮށް ކުރާކަމަށް ފާހަގަކުރެވިފައިވާ ވޭރިއަންޓެއްވެސް މެއެވެ.