ކޮވިޑް-19 ޖެހިގެން ފަރުވާ ހޯދަމުންދާ މީހުންގެ އަދަދު 1832ށް އަރައިފިއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)ން އާންމުކޮށްފައިވާ ތަފާސްހިސާބުތަކަށް ބަލާއިރު ފާއިތުވި 24 ގަޑިއިރު ރާއްޖެއިން ކޮވިޑަށް ޕޮޒިޓިވްވެފައިވަނީ 76 މީހުންނެވެ. އެއީ މާލެ ސަރަހައްދުން 15 މީހުންނާއި އަތޮޅުތަކުން 55 މީހުންނާއި އަދި ހިންގަމުންދާ ރިސޯޓްތަކުން 6 މީހުންނެވެ.

މިއާއެކު ރާއްޖެއިން ކޮވިޑަށް ޕޮޒިޓިވްވި މީހުންގެ އަދަދު ވަނީ 91,122ށް އަރާފައެވެ. މިހާތަނަށް ބަލިން ރަނގަޅުވެފައިވަނީ 89،029 މީހުންނެވެ. އަދި 14 މީހަކަށް ހޮސްޕިޓަލްތަކުގައި އެޑްމިޓްކޮށްގެން އަންނަނީ ފަރުވާދެމުންނެވެ.

މިހާތަނަށް 248 މީހަކު ވަނީ މިބަލީގައި ނިޔާވެފައެވެ.

ނޮވެމްބަރު މަސް ފެށިގެން މިހާތަނަށް އަތޮޅު ތެރޭގެ ކޭސްތައް ދުވަހެއް ދުވަހަކަށް އިތުރު ވަމުންދާކަމަށް އެޗްއީއޯސީން މައުލޫމާތު ދެއެވެ. އެގޮތުން މިހާރުވެސް 69 ރަށެއްގައި އެކްޓިވް ކޭސްތައް ހުރިކަމަށާއި، 8 މީހަކަށް އަތޮޅު ތެރެއިން އެޑްމިޓް ކޮށްގެން ފަރުވާދެމުންދާކަމަށް އެޗްއީއޯސީން މައުލޫމާތު ދެއެވެ. އަދި އެޗްޕީއޭގެ އުސޫލުތަކާ އެއްގޮތަށް މާސްކް އެޅުމަށް ފަރުވާކުޑަ ކުރެވޭތަން ފެންނަކަން ފާހަގަކޮށް އެޗްއީއޯސީން ވަނީ، މާސްކް އެޅުމާއި އިޖުތިމާއީ ގައިދުރުކަމަށް ސަމާލުކަން ދިނުމަށް އިލްތިމާސް ކޮށްފައެވެ.

ރާއްޖޭގައި މިފަހަކަށް އައިސް، ކޮވިޑް-19 ޖެހޭ މީހުންގެ އަދަދު ވަކި މިންވަރެއްގައި ހިފެހެއްޓިފައި ހުރިނަމަވެސް އަތޮޅުތަކުގައި ކޮވިޑް ޖެހޭ މީހުންގެ އަދަދު އަންނަނީ އިތުރުވަމުންނެވެ.

ކޮވިޑްގެ ކޭސްތައް މަދުވެފައިވީނަމަވެސް ބަލިން ރައްކާތެރިވުމަށް އަޅަންޖެހޭ ފިޔަވަޅުތަކަށް ސަމާލުކަންދިނުމަށް ކަމާބެހޭ ފަރާތްތަކުން އަންނަނީ އިލްތިމާސްކުރަމުންނެވެ.