ރާއްޖޭގެ މިހާރުގެ ކޮވިޑުގެ ހާލަތަށް ބަލާއިރު މާލެ ސަރަހައްދުން ފެންނަ ކޭސްތަކުގެ އަދަދު މަދުވިނަމަވެސް, އަތޮޅު ތެރޭގެ ރަށްތަކުން ކޮވިޑަށް ޕޮޒިޓިވްވާ މީހުންގެ ނިސްބަތް އަންނަނީ އިތުރުވަމުންނެވެ. މި ބަލިން ރައްކާތެރިވުމަށްޓަކައި ގައިދުރުކަން ބެހެއްޓުމާއި މާސްކް އެޅުމަށް އަބަދުވެސް ޑޮކްޓަރުން އަންނަނީ އިރުޝާދު ދެއްވަމުންނެވެ.

އެންމެފަހުން ބޭއްވި ނޫސްވެރިންގެ ބައްދަލުވުމުގައި ޑޮކްޓަރުން ވަނީ މިކަން ފާހަގަކުރައްވާފައެވެ. އެގޮތުން މިހާރު ކޭސްތަކުގެ އަދަދު މަދުވިނަމަވެސް ޑޮކްޓަރުން ދެއްވާ އިރުޝާދުތަކަށް ބޯލަނބައިގެން އުޅުމުން، ފަސޭހަ ހަލާތެއްގައި އުޅެވޭނެ ކަމަށް ވަނީ ވިދާޅުވެފައެވެ. މިދަނޑިވަޅުގައި ވެސް މާސްކް އެޅުން މުހިންމު ކަމަށާއި މަގުމަތީގައި އުޅޭ ވަގުތުގައާއި ގޭތެރޭގައި އުޅޭއިރު މާސްކް އަޅަން ވާނެ ކަމަށް ވަނީ ވިދާޅުވެފައެވެ. އަދި އެއީ ބަލިން ރައްކާތެރިވުމަށް އެޅޭ މުހިންމު ފިޔަވަޅެއް ކަމަށް ޑޮކްޓަރުން ގެންދަވަނީ ތަކުރާރުކޮށް ވިދާޅުވަމުންނެވެ.

ކަމާބެހޭ ފަރާތްތަކުން ތަކުރާރުކޮށް އިލްތިމާސް ކުރައްވަމުން ދަނީ، ވައިރަސް ފެތުރުން ކޮންޓްރޯލް ކުރުމަށް ފަރުދީ ޒިންމާ އަދާ ކުރުމަށެވެ. އިޖުތިމާއީ ގައިދުރުކަމަށް ޚާއްސަ ސަމާލުކަމެއްދީ، ބޭރުގައި އުޅޭއިރު، ތިމާއާއި އެހެން މީހުންގެ ރައްކަލަކަށް މާސްކް އެޅުމަށެވެ.

މި ފިޔަވަޅުތަކަށް ގިނަ ބަޔަކު ބޯލެނބި ނަމަވެސް، ފިޔަވަޅުތަކަށް ބޯނުލަނބައި އުޅުނު މީހުންވެސް މަދެއް ނޫނެވެ. މަސްމާރުކޭޓާއި ބާޒާރުމަތި ފަދަ ތޮއްޖެހިގެން މީހުން އުޅޭ ބައިބޯ ތަންތަނަށް ބަލާލި ނަމަވެސް، އިޖުތިމާއީ ގައިދުރުކަމަށް އެއްވެސް ސަމާލުކަމެއް ނުދެޔޭ ބުންޏަސް ދޮގަކަށް ނުވާނެއެވެ. އަދި މަގުމަތީގައި މާސްކް ނާޅާ މީހުންނާއި، ދަތްދޮޅީގައި މާސްކް އަޅާ މީހުން ގިނަކަން ފާހަގަކޮށްލެވެއެވެ.

ރާއްޖެ އަދިވެސް އޮތީ ކޮވިޑް-19އާ މެދު ސަމާލުވާންޖެހޭ ހާލަތުގައި ކަމަށާއި، މާސްކް އެޅުން ނިމުމަކަށް ގެނައުމުގެ ވިސްނުމެއް އަދި ނެތްކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން ވެސް ވަނީ ބުނެފައެވެ. ހެލްތު ޕްރޮޓެކްޝަން އޭޖެންސީ (އެޗްޕީއޭ)ގެ ޑިރެކްޓަރ ޖެނެރަލް މައިމޫނާ އަބޫބަކުރު ވިދާޅުވީ، މާސްކް އަޅައިގެން އުޅުމަކީ މިވަގުތު ވެސް ރައްކާތެރިކަމުގެ ގޮތުން ކޮންމެހެން ކުރަން ޖެހިފައިވާ ކަމެއް ކަމަށެވެ. ވަކިން ޚާއްސަކޮށް އެކި ރޯގާތައް މިވަގުތު ވެސް މުޖުތަމައުގެ ތެރޭގައި އުޅޭއިރު، މާސްކް އެޅުމަކީ އާންމު ރޯގާތަކުން ވެސް ދުރުކޮށްދޭނެ ކަމެއްކަން މައިމޫނާ ފާހަގަކުރެއްވިއެވެ. އަދި މިވަގުތު އާބާދީގެ ބޮޑު ބައެއް ވެކްސިން ފުރިހަމަކޮށްފައި ވީނަމަވެސް، މާސްކް އެޅުން މަޖުބޫރު ކުރުމަށް އަންގާފައިވާ އެންގުން ނިމުމަކަށް ގެނައުމުގެ ވިސްނުންފުޅެއް މިވަގުތު ނެތްކަމަށް މައިމޫނާ ވިދާޅުވިއެވެ.

މައިމޫނާ ވަނީ މާސްކް އެޅުމަކީ ބަލިން ރައްކާތެރިވުމުގެ ގޮތުން އެޅިދާނެ ފަސޭހަ ފިޔަވަޅެއްގެ ގޮތުގައި ސިފަ ކުރައްވާފައެވެ. އަދި އެއީ އެހާ އަވަހަށް ދޫކޮށްލުން ރަނގަޅު ފިޔަވަޅެއް ކަމަށް ގަބޫލު ނުކުރެއްވޭކަމަށް ވެސް އެކަމަނާ ވިދާޅުވިއެވެ.

އެހެންކަމުން އެންމެން ވެސް ވިސްނަންވީ ކަމެއް އެބައޮތެވެ. މާލެސަރަހައްދުން ފެންނަ ކޭސްތަކުގެ އަދަދު މަދުވިނަމަވެސް، އަދި ކޮވިޑުގެ ހާލަތު ސީރިއަސް ހާލަތަކަށް ނުދިޔަ ނަމަވެސް، ރައްކާތެރިކަމުގެ ގޮތުން އަޅަން ޖެހޭ އެންމެހާ ފިޔަވަޅުތައް އެޅުމަށެވެ. އަދިވެސް ހާލަތު ގޯސްވެދާނެ ކަމަށް ވިސްނައިގެން، ކަމާގުޅޭ ފަރާތްތަކުން މިދޭ އިރުޝާދުތަކަށް ބޯލެނބުމަށެވެ. މާސްކް އަޅައި، ގައިދުރުކަން ބަހައްޓައި، އަދިވެސް ރައްކާތެރިކަމުގެ ގޮތުން އަޅަން ޖެހޭ އެންމެހާ ފިޔަވަޅުތައް އެޅުމަށެވެ. ފަރުދީ ޒިންމާ އެންމެން ވެސް އަދާކުރުމަށެވެ. މާސްކް އެޅުން ދޫކޮށްލާ ހާލަތަކަށް އަދި ނުދެއެވެ.