ސިޓީއާއެކު ޕީއެސްޖީވެސް ދެވަނަ ބުރަށް

ޔުއެފާ ޗެމްޕިއަންސް ލީގުގެ ދެވަނަ ބުރުގެ ޖާގައެއް މެންޗެސްޓާ ސިޓީ އާއި ޕީއެސްޖީން ހޯދައިފިއެވެ.

މި މުބާރާތުގައި ބުދަ ދުވަހުގެރޭ ކުޅުނު މެޗުން ސިޓީން ވަނީ ފަހަތުން އަރައި 2-1 ގެ ނަތީޖާއަކުން ޕީއެސްޖީ ބަލިކޮށްފައެވެ. އެކަމަކު ސިޓީއާއެކު ޕީއެސްޖީއަށް ގަދަ 16 ގެ ޖާގައެއް ލިބުނީ މި ގްރޫޕުގައި ބުދަ ދުވަހުގެރޭ ކުޅުނު މެޗުން ކުލަބު ބްރޫޖް އަތުން ފަސޭހަކަމާއެކު 5-0 ގެ ނަތީޖާއަކުން އާރްބީ ލައިޕްޒީގް މޮޅުވުމުންނެވެ.

އަމިއްލަ ދަނޑުގައި ކުޅުނު މެޗުގައި ސިޓީން މޮޅު ކުޅުމެއް ދެއްކިއިރު، މެޗުގެ ފުރަތަމަ ހާފުގައި ސިޓީން ވަނީ ގިނަ ހަމަލާތަކެއް ފޮނުވާލާފައެވެ. އެކަމަކު އެ ހަމަލާތައް ހުއްޓުވުމުގައި ޕީއެސްޖީގެ ޑިފެންޑަރުންނާއި އެ ޓީމުގެ ގޯލްކީޕަރު ކޭލޯ ނަވާސް ވަނީ މުހިންމު ދައުރެއް އަދާކޮށްފައެވެ. އަދި މި ހާފުގައި ސިޓީގެ ކެޕްޓަން އިލްކާއީ ގުންޑޮގާނަށް އޭރިއާ ތެރެއިން ހުސް ފުރުސަތެއް ލިބުނު ނަމަވެސް، އޭނާ ފޮނުވާލި ހަމަލާ އަމާޒުވީ ގޯލުގެ އަރިމަތީ ދަނޑިއަށެވެ.

މި މެޗުގެ ދެވަނަ ހާފުގައި އެންމެ ފުރަތަމަ ލަނޑު ޖަހައި ލީޑު ނެގީ ޕީއެސްޖީންނެވެ. މި ހާފު ފަށައިގެން ފަސްވަނަ މިނެޓުގައި އޭރިއާ ތެރެއިން ފޮނުވާލި ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ ކީލިއަން އެމްބާޕޭއެވެ. އެކަމަކު މެޗުގެ 63 ވަނަ މިނެޓުގައި ރަހީމް ސްޓާލިން ވަނީ ސިޓީއަށް ނަތީޖާ އެއްވަރުކޮށްދީފައެވެ. އަދި މި މެޗުން ސިޓީ މޮޅުކޮށްދިން ލަނޑު ބެނާޑޯ ސިލްވާ ތަނަވަސްކޮށްދިން ފުރުސަތަކުން މެޗުގެ 76 ވަނަ މިނެޓުގައި ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ގަބްރިއެލް ޖެސޫސްއެވެ.

މި ނަތީޖާއާއެކު ސިޓީ އާއި ޕީއެސްޖީއަށްވެސް ގަދަ 16 ގެ ޖާގައެއް ލިބުނުއިރު، ކުޅުނު ފަސް މެޗުން ލިބުނު 12 ޕޮއިންޓާއެކު ސިޓީއަށް ވަނީ ގްރޫޕް އޭގެ އެއްވަނަ ކަށަވަރުވެފައެވެ. ދެވަނައިގައި އޮތް ޕީއެސްޖީއަށް ފަސް މެޗުން ލިބިފައިވަނީ އަށް ޕޮއިންޓެވެ. އަދި ތިންވަނައިގައި އޮތް ލައިޕްޒީގާއި ފުލުގައި އޮތް ބްރޫޖަށް ފަސް މެޗުން ލިބިފައިވަނީ ހަތަރު ޕޮއިންޓެވެ.

މީގެ އިތުރުން ޗެމްޕިއަންސް ލީގުގެ ގްރޫޕް ސީގައި ހިމެނޭ ސްޕޯޓިން ލިޒްބަނުން ވަނީ ބުދަ ދުވަހުގެރޭ އަމިއްލަ ދަނޑުގައި ކުޅުނު މެޗުން 3-1 ގެ ނަތީޖާއަކުން ބޮރޫޝިއާ ޑޯޓްމުންޑް ބަލިކޮށް، ދެވަނަ ބުރުގެ ޖާގައެއް ހޯދާފައެވެ. އެއާއެކު މިހާތަނަށް ޖުމްލަ 11 ޓީމެއް ވަނީ ގަދަ 16 ގެ ޖާގަތައް ކަށަވަރުކޮށްފައެވެ.