ދައުލަތް ދެމިގެން ދިޔުމަކީ ކޮބައިކަން އިދިކޮޅަށް އެނގެންޖެހޭ - އަސްލަމް
ކުރީގެ ސަރުކާރުން ރާވާ ކަންކަން ނުކުރުމުގެ އިޚްތިޔާރުވެސް ދެން އަންނަ ސަރުކާރަކަށް އޮވޭ
މުޙައްމަދު އަސްލަމް - މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ
ދައުލަތް ދެމިގެންދިޔުމަކީ ކޮބައިކަން އިދިކޮޅަށް އެނގެންޖެހޭ ކަމަށް މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުހައްމަދު އަސްލަމް ވިދާޅުވެއްޖެއެވެ.
އަސްލަމް މިހެން ވިދާޅުވީ، އަންގާރަ ދުވަހުގެ ރައްޔިތުންގެ މަޖިލީހުގެ ޖަލްސާގައި ނައިފަރުގެ ހައުސިންގ ޔުނިޓްތައް މިސަރުކާރުން ނިންމާފައިވާ ކަމަށް މިނިސްޓަރ ވިދާޅުވުމުން، އެއީ ރައީސް ޔާމީންގެ ސަރުކާރުން ބަޖެޓްގައި ހިމަނައި ޕްލޭން ކޮށްފައިވާ ޕްރޮޖެކްޓެއްކަމަށް ވިދާޅުވެ ނައިފަރު ދާއިރާގެ މެމްބަރު އަހުމަދު ޝިޔާމު މިނިސްޓަރަށް ރައްދު ދެއްވުމުންނެވެ.
މިނިސްޓަރ ވިދާޅުވީ، ކޮންމެ ސަރުކާރަކުންވެސް ކަންކަން ކުރުމަށް ރާވާ ކަމަށާއި، އެ ރާވާ ކަންކަން ނުކުރުމުގެ އިޚްތިޔާރުވެސް ދެން އަންނަ ސަރުކާރަކަށް އޮންނަ ކަމަށެވެ. ކޮންމެ ސަރުކާރެއްވެސް ރައްޔިތުންގެ ތާއީދާއެކު އަންނަނީ ބޮޑު މެންޑޭޓަކާއެކު ކަމަށެވެ. ރައީސް ނަޝީދުގެ ސަރުކާރުން، އެއަރޕޯޓް ތަރައްގީ ކުރުމަށް ޖީއެމްއާރާއެކު ކުރި އެގްރީމެންޓް، ރައީސް ޔާމީންގެ ސަރުކާރުން އުވާލީ ގޯސް ކޮށް ކަމަށް މިނިސްޓަރ ވިދާޅުވިއެވެ. އެއީ ކުރާ ޒާތުގެ ކަމެއް ނޫން ކަމަށާއި، ދައުލަތް ދެމިގެންދިޔުމުގެ ސިޔާސަތު އިދިކޮޅަށް ފަހުމުވާންޖެހޭ ކަމަށެވެ. ދައުލަތް ދެމިގެންދިޔުން އޮންނަ ކަމަށާއި، ބަދަލުވަނީ ސަރުކާރު ކަމަށެވެ.
ކުރީ ސަރުކާރުން ރާވާފައިވާ ކަންކަން ކޮށް ނިންމައި، މި ސަރުކާރުން ކުރި ކަމެއް ކަމުގައި ބުނަމުންދާކަމަށް ޝިޔާމް ވިދާޅުވި ވާހަކައަށް ރައްދު ދެއްވައި މިނިސްޓަރ އަސްލަމް ވިދާޅުވީ، ވޭތުވެ ދިޔަ ދައުރުގައި ބޮޑު ބައިގައި އެންމެ ހައުސިން ޕްރޮގްރާމެއްވެސް ނިންމާފައި ނެތް ކަމަށާއި، އަމިއްލައަށް ފެއްޓެވި ޕްރޮގްރާމެއް ނެތް ކަމަށެވެ. ނިމިފައި ހުރީ، ކުރިން 2008ވަނަ އަހަރު އުފެދުނު އެމްޑީޕީގެ ސަރުކާރުން ފެށި މަސައްކަތް ކަމަށެވެ. ކުރީ ސަރުކާރަށް ނިންމުނީ އެންމެ ހައުސިންގ ޕްރޮޖެކްޓެއް ކަމަށާއި، އެއީވެސް ތަކްލީފެއް ކަމަށެވެ.
އެމްޑީޕީގެ ކުރީ ސަރުކާރުން ފެށި މަސައްކަތްތައް ނިންމުމަށްފަހު، އެއީ ކުރީ ސަރުކާރުން ކުރި ކަމެއް ކަމަށް މެޑަލް ޖެއްސެވި ކަމަށް އަސްލަމް ވިދާޅުވިއެވެ.
