ތ. ބުރުނީ ގޮނޑުދޮށް ހިމާޔަތްކުރުމުގެ މަޝްރޫޢުގެ މަސައްކަތް ފެށުމަށް ތައްޔާރުވެފައިވާ ކަމަށް، އެ މަސައްކަތް ކުރުމަށް ހަވާލުވެފައިވާ ކުންފުނި، މޯލްޑިވްސް ޓްރާންސްޕޯރޓް އެންޑް ކޮންސްޓްރަކްޝަން ކޮމްޕެނީ (އެމް.ޓީ.ސީ.ސީ)ން ހާމަކޮށްފިއެވެ.

އެމް.ޓީ.ސީ.ސީން ހާމަކޮށްފައިވާ ގޮތުގައި އެ މަސައްކަތް ފެށުމަށްޓަކައި މިއަދު ވަނީ ޕްރޮޖެކްޓް ސައިޓް މޮބަލައިޒް ކުރެވިފައެވެ. މި މަޝްރޫޢުގެ ދަށުން 21،181،80 ކިއުބިކް މީޓަރުގެ ވެލި، ގިރާ ސަރަހައްދަށް އެޅުމާއި، 220 މީޓަރުގެ ރިވެންޓުމެންޓް ޖެހުމާއި، 369 މީޓަރުގެ ބޭރުތޮށިލުމުގެ މަސައްކަތް ހިމެނޭ ކަމަށްވެސް އެމް.ޓީ.ސީ.ސީން ހާމަކުރެއެވެ.

މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރއިން އެމް.ޓީ.ސީއާ ހަވާލުކުރި މި މަޝްރޫޢަކީ 28.87 މިލިޔަން ރުފިޔާގެ މަޝްރޫޢެކެވެ. މި މަސައްކަތް ނިންމުމަށް ހަމަޖެހިފައިވަނީ 240 ދުވަހުގެ ތެރޭގައެވެ.

އެމް.ޓީ.ސީ.ސީން ބުނީ، މިވަގުތުވެސް ރާއްޖޭގެ އެކި ކަންކޮޅުތަކުގައި، އެމް.ޓީ.ސީ.ސީގެ 63 މަޝްރޫޢެއްގެ މަސައްކަތް ކުރެވެމުންދާ ކަމަށެވެ. މީގެ ތެރެއިން 7 މަޝްރޫޢަކީ ގޮނޑުދޮށް ހިމާޔަތްކުރުމުގެ މަޝްރޫޢެވެ. އަދި ވޭތުވެދިޔަ 3 އަހަރު ތެރޭގައި ގޮނޑުދޮށް ހިމާޔަތްކުރުމުގެ 6 މަސައްކަތެއް ނިންމާލާފައިވާ ކަމަށްވެސް އެމް.ޓީ.ސީ.ސީން ހާމަކުރެއެވެ.