ރައްޔިތުންގެ މަޖިލީހުގެ ރައީސް، މުހައްމަދު ނަޝީދު ވަގުތީ ގޮތުން ހުންނެވުމަށް ތައްޔާރު ކުރެއްވި މ.މުރައިދޫގޭގެ މަސައްކަތް ނިމި، އެމަނިކުފާނު ހުންނެވުމަށް އެންމެ ފަހުގެ ތައްޔާރީތައް ނިންމުމަށް ރައްޔިތުންގެ މަޖިލީހާ ހަވާލުކޮށްފިއެވެ.

ރަސްމީކޮށް މަޖިލީހާ އެގެ ހަވާލު ނުކުރާ ކަމަށް މަޖިލީހުން ބުނި ނަމަވެސް ޕްލޭނިން މިނިސްޓްރީގެ ސްޓޭޓް މިނިސްޓަރ އަކްރަމް ކަމާލުއްދީން ރާއްޖެ އެމްވީއަށް ވިދާޅުވީ، މުރައިދޫގެ މަރާމާތު ކުރުމުގެ މަސައްކަތް ނިންމައި، ރައްޔިތުންގެ މަޖިލީހާ ހަވާލު ކުރުމަށްޓަކައި، ރައްޔިތުންގެ މަޖިލީހާއެކު ބައްދަލުވުންތަކެއް ބޭއްވި، އެންމެ ފަހުގެ ތައްޔާރީތައް ކުރުމަށްޓަކައި މަޖިލީހުގެ މުވައްޒަފުން މިހާރު ވަދެ އެ މަސައްކަތް ކުރަމުން އަންނަ ކަމަށެވެ. ރަސްމީ ލިޔެކިޔުންތައް ވީހާވެސް އަވަހަކަށް ހަވާލުކުރުުމުގެ މަސައްކަތް ކުރަމުން ގެންދާ ކަމަށް އަކްރަމް ވިދާޅުވިއެވެ.

ރައީސް ނަޝީދަށް އަމާޒުކޮށް މޭ 6 ވަނަ ދުވަހު ދިން ޓެރަރިސްޓް ހަމަލާއަށްފަހު ރާއްޖެއިން ބޭރުގައި ހުންނެވުމަށްފަހު އެމަނިކުފާނު ރާއްޖެ ވަޑައިގެންނެވީ އޮކްޓޫބަރ މަހުގެ 11 ވަނަ ދުވަހުއެވެ. މުރައިދޫ ގޭގެ މަރާމާތުގެ މަސައްކަތް ކުރިއަށްދާތީ، އެމަނިކުފާނު ހުންނެވީ ހޮޓެލް ޖެންގައެވެ.

އުއްތަމަފަނޑިޔާރު ދިރިއުޅުއްވުމަށް ހަމަޖައްސާފައިވާ ރެހެންދި އެޕާރޓްމެންޓްގެ މަސައްކަތް ނޮވެމްބަރު މަހުގެ 22 ވަނަ ދުވަހަށް ނިންމާލުމަށް މަސައްކަތް ކުރާކަމަށް ވެސް އަކްރަމް ވިދާޅުވިއެވެ.

ތިން ބާރުގެ ވެރިންގެ ތެރެއިން މަޖިލީހުގެ ރައީސާއި އުއްތަމަފަނޑިޔާރަށް ރަސްމީ ގޭގެ ހަމަޖައްސާ ގޮތަށް ގާނޫނަށް ބަދަލު ގެނައީ ރައީސް ނަޝީދު އަވަހާރަކޮށްލުމަށް ޓެރަރިސްޓް ހަމަލާއެއް ދިނުމާ ގުޅިގެންނެވެ. މިހާތަނަށް މަޖިލީހުގެ ރައީސާއި އުއްތަމަ ފަނޑިޔާރު ދިރިއުޅުއްވަމުން ގެންދެވީ އަމިއްލަފުޅު ގޭގައެވެ.

މަޖިލީހުގެ ރައީސާއި އުއްތަމަ ފަނޑިޔާރަށް ދާއިމީ ރަސްމީ ގެ އިމާރާތްކުރުމަށް ނިންމައި، އެ މަސައްކަތް ވެސް ޕްލޭނިން މިނިސްޓްރީން އަންނަނީ ކުރަމުންނެވެ.

މުރައިދޫގެ އެންމެ ފަހުން ބޭނުން ކޮށްފައިވަނީ ރައީސް އަބްދުﷲ ޔާމީންގެ ވެރިކަމުގައި އެމަނިކުފާނުގެ އެންމެ ދޮށީ ދެބޭފުޅުން ދިރިއުޅުއްވުމަށެވެ. ރެހެންދި ފްލެޓުން އުއްތަމަ ފަނޑިޔާރަށް ހަމަޖައްސާ އެޕާޓްމަންޓަކީ ޔާމީންގެ ވެރިކަމުގައި އޭރުގެ ނާއިބުރައީސް އަބްދުﷲ ޖިހާދުގެ ރަސްމީ ގޭގެ ގޮތުގައި ބޭނުން ކުރެއްވި ފްލެޓެވެ.