ރައީސް ވިދާޅުވި ފަދައިން ގުރުއާނުގެ އިލްމީ ދިރާސާތައް ހެދުމަށް އިސްކަންދޭން ޖެހޭ: އުސްތާޒު ސަލީމް
ކީރިތި ގުރުއާނުގެ އިލްމަކީ ވަރަށް ތަނަވަސް ދާއިރާއަކަށް ފެތުރިފައިވާ އިލްމެއް
ކީރިތި ޤުރުއާނުގެ ޢިލްމަކީ ވަރަށް ތަނަވަސް ދާއިރާއަކަށް ފެތުރިފައިވާ ޢިލްމެއް ނަމަވެސް، އެ ޢިލްމުގެ ބޭނުން ހިފޭތަން ނުފެންނަ ކަމަށް ރައީސް ވިދާޅުވި
ރައީސް ވިދާޅުވި ފަދައިން ޤުރުއާނުގެ އިލްމީ ދިރާސާތައް ހެދުމަށް އިސްކަންދޭން ޖެހޭކަމަށް އިސްލާމިކް ޔުނިވަރސިޓީގެ ކުއްލިއްޔާ އޮފް އިސްލާމިކް ރިވީލްޑް ނޮލެޖު އެންޑް ހިއުމަން ސެންސަސްގެ ޑީން އުސްތާޒު އަހުމަދު ސަލީމް ވިދާޅުވެއްޖެއެވެ.
ކީރިތި ޤުރުއާނުގެ ޢިލްމަކީ ވަރަށް ތަނަވަސް ދާއިރާއަކަށް ފެތުރިފައިވާ ޢިލްމެއް ނަމަވެސް، އެ ޢިލްމުގެ ބޭނުން ހިފޭތަން ނުފެންނަ ކަމަށާއި، ކީރިތި ޤުރުއާނުގެ ޢިލްމީ ދިރާސާތައް ކުރަންޖެހޭކަމަށް ކީރިތި ޤުރުއާނާބެހޭ ޤައުމީ މަރުކަޒުގެ ދަސްވެނިވުމުގެ ހަފްލާގައި ހޮނިހިރު ދުވަހުގެ ރޭ ވާހަކަ ދައްކަވަމުން ރައީސް ވަނީ ވިދާޅުވެފައެވެ.
ސިކުނޑިތައް މުއްސަނދި ވެގެންދާނީ ކީރިތި ޤުރުއާނުގެ ޢިލްމީ ދިރާސާތައް ކޮށްގެން ކަމަށްވެސް ރައީސް ވިދާޅުވިއެވެ.
އެކަމާ ގުޅޭގޮތުން ރާއްޖެއެމްވީއާ ވާހަކަ ދައްކަވަމުން އުސްތާޒު ސަލީމް ވިދާޅުވީ، ޤުރުއާނުގެ އިލްމީ މުއުޖިޒާތްތަކާއި ބެހޭ ތަފްސީލީ ފޮތްތަކެއް ދިވެހި ބަހުން އެކުލަވާލެވިފައި ނެތް ކަމަށެވެ. އަދި ދިވެހި ބަހުގެ ތަފްސީރުވެސް ތަފްސީލީ ގޮތެއްގައި ނެތްކަން ފާހަގަ ކުރައްވައި ސަލީމް ވިދާޅުވީ، އެ މައުލޫމާތުތަކުގެ އަލީގައި މިޒަމާނުގައި ހެދިދާނެ ގިނަގުނަ އިލްމީ ދިރާސާތައް އެބަހުރި ކަމަށެވެ. އަދި އެކި ބަސްބަހުން އެފަދަ އިލްމީ ދިރާސާތައް އެކުލެވިފައި ހުރި ނަމަވެސް، ރާއްޖެއިން އެފަދަ ތަފްސީލީ ދިރާސާތަކެއް ހެދިފައި ނެތްކަން ފާހަގަ ކުރެއްވިއެވެ.
އުސްތާޒު ސަލީމް ވަނީ ކީރިތި ޤުރުއާނާ ބެހޭ މަރުކަޒުންވެސް އެކަމަށް އިސްކަން ދެއްވުން މުހިއްމުކަމަށް ވިދާޅުވެފައެވެ.
މިކަމާ ގުޅޭގޮތުން ކީރިތި ޤުރުއާނާ ބެހޭ މަރުކަޒުގެ ބަހެއް ހޯދާލުމަށް މަސައްކަތް ކުރިނަމަވެސް، އެކަން ކާމިޔާބުވެފައެއް ނުވެއެވެ.
ކީރިތި ޤުރުއާނާބެހޭ މަރުކަޒުގެ ދައުރު ފުޅާވާން ޖެހޭކަން ފާހަގަކުރައްވައި ރައީސް ވަނީ އެ މަރުކަޒުގެ ހަގީގީ ފައިދާ ލިބޭނީ ކީރިތި ޤުރުއާނުގެ ޢިލްމީ ދިރާސާތައް ކޮށްގެން ކަމަށް ވިދާޅުވެފައެވެ. މި ސަރުކާރުން ދީނީ ޢިލްމު ރާއްޖޭގައި ފެތުރުމަށް އެހީތެރިކަން ފޯރުކޮށްދެއްވާނެ ކަމަށްވެސް ރައީސް ވިދާޅުވިއެވެ.
