މަސްލަހަތު ފުށުއަރާތީ ޒިޔަތުގެ ދިފާއީ ވަކީލުކަން ކުރެއްވި ޔާމީނަށް، ކްރިކް ރިޒާގެ ދިފާއީ ވަކީލަކަށްވުމުގެ ފުރުސަތު ގެއްލިއްޖެ
މި މައްސަލަ ބައްލަވަނީ އިސް ގާޒީ އަހުމަދު ޝަކީލް
އަޙުމަދު ކްރިކް ރިޒާ (ވ)- މި މައްސަލައިގައި އޭނާގެ މައްޗަށް 2 ދައުވާއެއް އުފުލާފައިވޭ
ރ ފުއްގިރި ޚިޔާނާތުގެ މައްސަލައިގައި ދައުވާ އުފުލާފައިވާ މއ. ކުރިކީލަހިޔާ އަހުމަދު ކްރިކް ރިޒާގެ މައްޗަށް ކުރާ ދައުވާގެ އަޑުއެހުމެއް އާދީއްތަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި މައްސަލައިގައި އޭނާގެ މައްޗަށް 2 ދައުވާއެއް އުފުލާފައިވެއެވެ. އެއީ މަނީލޯންޑަރިންގެ ކުށުގެ ދައުވާއަކާއި ރިޝްވަތު ހިފުމުގައި މެދުވެރިއަކަށްވުމުގެ ކުށުގެ ދައުވާއެކެވެ.
މި މައްސަލައިގައި އާދިއްތަ ދުވަހު އޮތީ ޝަރީއަތުގެ ކުރިން ހުށައަޅާ ހުށައެޅުންތަކާއި، އެއަށް ރައްދު ދިނުމުގެ ބައެވެ. ނަމަވެސް ދައުލަތުން ވަނީ އޭގެ ކުރިން ކްރިކް ރިޒާގެ ވަކީލާއި ގުޅިގެން ހުށައަޅާފައިވާ އިއުތިރާޒަށް ގޮތެއް ކަނޑައަޅުއްވައި ދެއްވުމަށް އެދިފައެވެ.
އެކަމާ ގުޅޭގޮތުން މައްސަލަ ބައްލަވާ ގާޒީ އަހުމަދު ޝަކީލް ވިދާޅުވީ، ވަކީލު އަހުމަދު ޔާމީނަށް ވަކާލާތު ކޮށްދެއްވިދާނެ ކަމާމެދު ދައުލަތުން އިއުތިރާޒު ކޮށްފައިވަނީ މި މައްސަލަތަކުގައި ދައުލަތުން ހެއްކެއްގެ ގޮތުގައިވެސް އޭނާ ހުށައަޅާފައިވާތީއާއި، އޭނާއަކީ އަބްދުﷲ ޒިޔަތުގެ މައްސަލައިގައިވެސް ދިފާއީ ގޮތުން ވަކާލާތު ކުރައްވާފައިވާ ވަކީލެއް ކަމަށް ވުމުން ކަމަށެވެ. މިއީ "ކޮންފްލިކްޓް އޮފް އިންޓްރެސްޓް" އުފެދޭނެ ކަމެއްކަން ފާހަގަ ކުރެއްވިއެވެ.
ފަންނުގެ ގާނޫނަށް ރިއާޔަތް ކުރައްވައި ގާޒީ ޝަކީލުވެސް ވަނީ މިއީ މަސްލަހަތު ފުށުއަރާނެ ކަމެއްކަން ފާހަގަ ކުރައްވާފައެވެ. އަދި ވަކީލު ޔާމީނު މައްސަލައިން އެކަހެރިވެވަޑައިގަތުމަށް އަންގަވައި ގާޒީ ވަނީ ޝަރީއަތުގެ އަޑުއެހުމުން އޭނާ ބޭރު ކުރައްވާފައެވެ.
ކްރިކް ރިޒާގެ ދެވަނަ ވަކީލު އިސްމާއީލް ވިޝާމް ވަނީ ގާޒީގެ ނިންމެވުން ލިއުމުން ބޭނުންވާކަމަށް ވިދާޅުވެފައެވެ. އަދި ވަކީލު ޔާމީން ޝަރީއަތުން ބޭރުވުމުން، އަޑުއެހުމަށް ތައްޔާރުވުމަށް އިތުރު ވަގުތު ބޭނުންވާކަން ވަކީލު ވިޝާމް ފާހަގަ ކުރެއްވިއެވެ.
ނަމަވެސް ގާޒީ ޝަކީލު ވިދާޅުވީ، ވަކީލު ޔާމީނާއި ގުޅޭގޮތުން ދައުލަތުން ހުށައެޅި ހުށައެޅުމަށް ގޮތެއް ނިންމުން މި އަޑުއެހުމުގައި އޮންނާނެކަން ދިފާއަށްވެސް އެނގޭނެ ކަމަށާއި، މިހާރުވެސް މި މައްސަލައިގެ ޝަރީއަތުގެ ކުރިން ހުށައަޅާ ހުށައެޅުންތަކަށް ގިނަ އަޑުއެހުންތަކެއް ތާވަލުކޮށް ކެންސަލްވެފައިވާ ކަމަށެވެ. އެކަމާ ގުޅޭގޮތުން ވަކީލު ވިދާޅުވީ، ކޯޓަށް ހާޒިރު ކުރުމުގެ ކުރިންވެސް ޝަރީއަތުން ވަކި ގޮތެއް ނިންމާފައިނުވާތީ އަޑުއެހުމަށް ވަދެވޭނެ ކަމަށް މައުލޫމާތު ލިބުނު ކަމަށެވެ. އަދި ވަކީލު ޔާމީނަކީ މި މައްސަލައިގެ "ޕްރައިމް" ވަކީލުކަން ފާހަގަ ކުރައްވައި ވިޝާމް ވިދާޅުވީ، މުޅި މައްސަލައިގެ ދިފާއު ބިނާ ކުރުމާއި، މައްސަލަ ތައްޔާރު ކުރުމުގެ އެންމެ އިސްކޮށް އުޅުއްވީ ވަކީލު ޔާމީންކަމަށް ވުމުން، އިތުރު ވަކީލަކާއެކު ކުރިއަށް ދިއުމަށް ވަގުތުކޮޅެއް ބޭނުންވާ ކަމުގައެވެ. ގާޒީ ޝަކީލު ވަނީ ބުރާސްފަތި ދުވަހުގެ ނިޔަލަށް އެ ފުރުސަތު ދެއްވުމަށް ނިންމަވާފައެވެ.
ރ ފުއްގިރި ޚިޔާނާތުގެ މައްސަލައިގައި ކްރިކް ރިޒާގެ އިތުރުން، ކުރީގެ ރައީސް ޢަބްދުﷲ ޔާމީނާއި، އިތުރު ދެ ކުންފުންޏެއްގެ މައްޗަށްވެސް ދައުވާ އުފުލާފައިވެއެވެ. އެއީ ސަން ކޮންސްޓްރަކްޝަން އެންޑް އިންޖިނިއަރިން ޕްރައިވެޓް ލިމިޓެޑާއި، ސަން އިންވެސްޓްމަންޓް ޕްރައިވެޓް ލިމިޓެޑްގެ މައްޗަށެވެ.
