މުލަ މޯލްޑިވްސް އާއި މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) އިން ގުޅިގެން ބޭއްވި "މުލަ ބޮޑީބޯޑިން ޗެލެންޖް 2021" ގެ ޗެމްޕިއަންކަން މުޙައްމަދު ރީޝަން ރަޝީދު ހޯދައިފިއެވެ.

މި މުބާރާތަކީ މުލަ މޯލްޑިވްސްގެ ބްރޭންޑް އިފްތިތާހުކުރުމުގެ ގޮތުން ބޭއްވި މުބާރާތެކެވެ. މިދިޔަ ބުދަ ދުވަހުން ފެށިގެން ހުކުރު ދުވަހުގެ ނިޔަލަށް ރާޅުގަނޑު ސަރަހައްދުގައި ކުރިއަށްދިޔަ މި މުބާރާތުގައި އޯޕަން ކެޓެގަރީ އެކަނި ކުރިއަށްދިޔައިރު، މި މުބާރާތުގައި 28 ބޮޑީބޯޑަރުން ވަނީ ވާދަކޮށްފައެވެ.

މި މުބާރާތުގެ ޗެމްޕިއަންކަން ހޯދާފައިވަނީ ބޮޑީބޯޑިންގައި ކުރިއަރަމުން އަންނަ ރީޝަން ރަޝީދެވެ. އޭނާއަށް ވަނީ 10،000 ރުފިޔާގެ ފައިސާގެ އިނާމެއް ދީފައެވެ. ދެވަނައަށް ދިޔަ އިނާޝް ނައީމަށް 7،000 ރުފިޔާގެ ފައިސާގެ އިނާމެއް ދިންއިރު، ތިންވަނައަށް ދިޔަ އާމިން އުމަރު މޫސާއަށް ވަނީ 5،000 ރުފިޔާގެ ފައިސާގެ އިނާމެއް ދީފައެވެ. އަދި މި މުބާރާތުގެ ހަތަރުވަނައަށް ދިޔަ އަލީ ޖާވިދު (ޖާއްޓޭ) އަށް ވަނީ 3،000 ރުފިޔާގެ ފައިސާގެ އިނާމެއް ދީފައެވެ.

މީގެ އިތުރުން މި މުބާރާތުގެ އެންމެ އުއްމީދީ ބޮޑީބޯޑަރަކަށް ހޮވުނީ އިޔާން އަޙްމަދެވެ. އޭނާ ވަނީ މުލަ މޯލްޑިވްސްގެ އެމްބެސެޑަރަކަށް ހަމަޖައްސާފައެވެ.

މި މުބާރާތް ނިމުމުގެ ރަސްމިއްޔާތާއި މުލަ މޯލްޑިވްސް ބްރޭންޑް އިފްތިތާހުކުރުމުގެ ރަސްމިއްޔާތު ހުކުރު ދުވަހު ބޭއްވިއިރު، އެ ރަސްމިއްޔާތުގައި ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދު ވަނީ ބައިވެރިވެވަޑައިގެންފައެވެ. އަދި މި މުބާރާތް ނިމުމުން ރައީސުލްޖުމްހޫރިއްޔާގެ އަނބިކަނބަލުން ވަނީ މުބާރާތުން ވަނަވަނައަށް ހޮވުނު ބޮޑީބޯޑަރުންނަށް އިނާމު ހަވާލުކޮށްދެއްވާފައެވެ.