ދިވެހި ސިފައިންގެ ގާބިލުކަން އިތުރު ކުރުމަށް ދުނިޔޭގެ އެކި ގައުމުތަކުގައި ތަމްރީނުތައް!
19 ނޮވެމްބަރު 2021 | ހުކުރު 13:04މާފިލާފުށީގެ ކެޕޭސިޓީ އިތުރުކޮށް، އިތުރު ރެކްރޫޓުންގެ ބެޗެއް އެތަނުގައި ތަމްރީނު ކުރާނެ
ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް އަބްދުލް ރަޙީމް އަބްދުލް ލަތީފް ރާއްޖެޓީވީއަށް ދެއްވި އިންޓަރވިއު ތެރެއިން
ދިވެހި ސިފައިންގެ ޤާބިލުކަން އިތުރު ކުރުމަށް ދުނިޔޭގެ އެކި ޤައުމުތަކުގައި ޓްރެއިނިންގތައް ކުރިއަށް ގެންދެވޭކަމަށް އެމްއެންޑީއެފުން ބުނެފިއެވެ.
ސަރުކާރަށް 3 އަހަރު ފުރުމާއި ގުޅިގެން ރާއްޖެޓީވީއަށް ދެއްވި ޚާއްސަ އިންޓަރވިއުއެއްގައި އެމްއެންޑީއެފްގެ ވައިސް ޗީފް އޮފް ޑިފެންސް ބްރިގޭޑިއަރ ޖެނެރަލް އަބްދުލްރަޙީމް އަބްދުލްލަތީފް ވިދާޅުވީ، ވޭތުވެދިޔަ 3 އަހަރުވެސް އެމްއެންޑީއެފުން ގިނަ މަސައްކަތްތަކެއް ކުރެވިފައިވާ ކަމަށެވެ. ވަކިން ޚާއްސަކޮށް ދިވެހި ޤައުމާއި، އިސްލާމް ދީނާއި ރައްޔިތުންގެ ދިފާއުގައި ގިނަގުނަ މަސައްކަތްތަކެއް ކުރެވިފައިވާކަމަށް ބްރިގޭޑިއަރ ޖެނެރަލް އަބްދުލްރަޙީމް ވިދާޅުވިއެވެ.
ސިފައިންގެ ޤާބިލުކަން އިތުރު ކުރުމަށް އެމްއެންޑީއެފުން ކޮށްފައިވާ މަސައްކަތްތަކަށް އަލިއަޅުވާލައްވާ ވައިސް ޗީފް ވިދާޅުވީ، އެކުވެރި ޤައުމުތަކުން ގިނަ އަދަދެއްގެ ދިވެހި ސިފައިންނަށް ތަމްރީނު ދެވިފައިވާ ކަމަށެވެ. އެގޮތުން އިންޑިއާ، ޕާކިސްތާން، އޮސްޓްރޭލިއާ، ބަންގްލަދޭޝް، ޗައިނާ، މެލޭޝިއާ، ޖަޕާން، ނޭޕާލް، ސްރިލަންކާ، ޔޫކޭ، ޔޫއެސްއޭ ފަދަ އެތައް ޤައުމުތަކުން ދިވެހި ސިފައިން ވަނީ ތަމްރީނުތައް ހޯދާފައެވެ. އަދި މި ޤައުމުތަކުގައި މިހާރުވެސް ދިވެހި ސިފައިން އެކި ކަހަލަ ތަމްރީނުތައް ލިބިގަންނަމުން ގެންދާކަމަށް ވައިސް ޗީފް ވިދާޅުވިއެވެ.
އޭގެ އިތުރުން، މީގެ ކުރިން އިންޑިއާއާއި، ޕާކިސްތާނާއި ސްރީލަންކާގައި ރާއްޖޭގެ ޑިފެންސް އެޑްވައިޒަރުން ބައިތިއްބާފައިވީނަމަވެސް، އެމްއެންޑީއެފުން ފާއިތުވި 3 އަހަރު ވަނީ އެ ލިސްޓުުގައި މެލޭޝިއާއި، ޔޫކޭވެސް ހިމަނައި، ޑިފެންސް އެޑްވައިޒަރުން ބައިތިއްބާފައެވެ. މިއީ ހައްތަހާވެސް އަސްކަރީ ގޮތުން ގުޅިގެން މަސައްކަތްތައް ކުރަމުންދާ ޤައުމުތައްކަން ފާހަގަ ކުރައްވައި ވައިސް ޗީފް ވިދާޅުވީ، ޤައުމުތަކުގައި ޑިފެންސް އެޑްވައިޒަރުން ބެއިތިއްބުމުގެ ސަބަބުން ރާއްޖެއަށް އަސްކަރީ ގޮތުން ގިނަ މައުލޫމާތުތައް ލިބެމުންދާ ކަމަށެވެ.
ވައިސް ޗީފް އިތުރަށް ވިދާޅުވީ، ކޯސްޓްގާޑުގެ ޤާބިލުކަން އިތުރު ކުރުމަށް ކޯސްޓްގާޑަށް އިތުރު އުޅަނދު ހޯދުމުގެ މަސައްކަތްތަކެއް މިހާރުވެސް ކުރައްވަމުން ގެންދަވާ ކަމަށެވެ. އަދި މިހާރުވެސް އެކި ދާއިރާއިން އެމްއެންޑީއެފަށް ބޭނުންވާ އެކި އިކުއިޕްމަންޓުތައް އޯޑަރު ކޮށްގެން ގެނައުމުގެ މަގުމަތީގައިވާކަން އޭނާ ފާހަގަ ކުރެއްވިއެވެ. އަދި އެމްއެންޑީއެފްގެ ފަޔަރ އެންޑް ރެސްކިއު ޑިޕާޓްމަންޓަށް އިތުރު ވަސީލަތްތައް ހޯދުމަށް ކުރަމުންދާ މަސައްކަތްތަކުގެ އިތުރުން، އިތުރު އޮފިސަރުން އެ ރޮނގުން ރާއްޖެއިން ބޭރުން ތަމްރީނު ކުރުމުގެ މަސައްކަތްތައްވެސް ކުރަމުންދާކަމަށް ވިދާޅުވިއެވެ.
ރާއްޖޭގައިވެސް ތަފާތު އެކި ޓްރެއިނިންގތައް އޮފިސަރުން ދަނީ ފުރިހަމަ ކުރަމުންނެވެ. އެގޮތުން އެމްއެންޑީއެފްގެ ޖޮއިންޓް އެކްސަސައިޒްތައްވެސް އެކި ޤައުމުތަކާއެކު ކުރިއަށް ގެންގޮސްފައިވެއެވެ. އެގޮތުން އެމެރިކާ، އިނގިރޭސިވިލާތް، އިންޑިއާ، ސްރީލަންކާ ފަދަ ޤައުމުތަކާއެކު ރާއްޖޭގައިވެސް އެކްސަސައިޒްތައް ހިންގަމުން ގެންދަވާކަމަށް ވިދާޅުވިއެވެ. އަދި އައްޑޫ، ކައްދޫ، ގިރިފުށި އަދި މާފިލާފުށި ފަދަ ތަންތަނުގައި އެމްއެންޑީއެފްގެ ތަމްރީނުތައް ހުއްޓުމެއް ނެތި ކުރިއަށްދާކަންވެސް ފާހަގަ ކުރެއްވިއެވެ. އޭގެ ތެރެއިން މާފިލާފުށީގެ ކެޕޭސިޓީ އިތުރުކޮށް، އިތުރު ރެކްރޫޓުންގެ ބެޗެއް އެތަނުގައި ތަމްރީނު ކުރުމުގެ މަސައްކަތް ވަރަށް އަވަހަށް ފެށިގެންދާނެކަމަށްވެސް ވިދާޅުވިއެވެ.
