ވިލުފުށީގައި އަޅަން ހަމަޖެހިފައިވާ ހޮސްޕިޓަލްގެ ފަންޑިން އެއްބަސްވުމުގައި ވަރަށް އަވަހަށް ސޮއިކުރާނެ: ރައީސުލްޖުމްހޫރިއްޔާ
ހޮސްޕިޓަލާއި އެއާރޕޯޓާއި ބަނދަރު ފުންކުރުމާއި ގިރާ ސަރަޙައްދު ހިމާޔަތްކުރުމާއި ގުޅޭގޮތުން މަޝްވަރާ ކުރެވުނު
ރައީސުލްޖުމްހޫރިއްޔާ ވިލުފުށި ކައުންސިލާއި ބައްދަލުކުރެއްވުން
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، ތ ވިލުފުށީ ކައުންސިލާއި ބައްދަލުކުރައްވައި އެ ރަށުގެ ތަރައްޤީއަށް ކައުންސިލާއި ރައްޔިތުން ބޭނުންވާ އެންމެ މުހިންމު ކަންކަމާގުޅޭ ގޮތުން މަޝްވަރާކުރައްވައިފިއެވެ.
މި ބައްދަލުކުރެއްވުމުގައި ވިލުފުށީ ކައުންސިލުން ވަނީ އެރަށުގައި އަޅަން ހަމަޖެހިފައިވާ ހޮސްޕިޓަލާ ބެހޭގޮތުންނާއި، އެއާރޕޯޓް އެޅުމާއި ބަނދަރު ފުންކުރުމާއި ގިރާ ސަރަޙައްދު ހިމާޔަތްކުރުމާއި އަދި ޞިއްޙީ ދާއިރާއާ ތަޢުލީމީ ދާއިރާ އާއި ރަށުގެ އިޖްތިމާޢީ އިޤްތިޞާދީ ތަރައްޤީއަށް އެރަށުގެ ކައުންސިލާ ރައްޔިތުން ބޭނުންވާ ކަންކަން ފާހަގަ ކުރައްވާފައެވެ. މީގެ އިތުރުން ރަށުގެ ތަރައްޤީއަށް ކުރިޔަށްގެންދިއުމަށް ހަމަޖެހިފައިވާ ބައެއް މަޝްރޫޢުތަކާ ގުޅޭގޮތުން މި ބައްދަލުކުރެއްވުމުގައި ކައުންސިލަރުން މަޝްވަރާކުރެއްވިއެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާ ވަނީ ކޮވިޑްގެ ޙާލަތާއެކު ކުރިމަތިވި ބަޖެޓުގެ ދަތިކަމާއެކު ބައެއް މަޝްރޫޢުތައް މަޑުޖައްސާލަން ޖެހުނުކަން ފާހަގަކުރައްވާފައެވެ. ނަމަވެސް އަންނަ އަހަރުގެ ބަޖެޓުގައި ވިލުފުށީގެ ގިނަ މަޝްރޫޢުތަކެއް ހިމެނިފައިވާކަން ފާހަގަކުރައްވައި ކައުންސިލުން ފާހަގަކުރެއްވި މަޝްރޫޢުތަކުގެ އެންމެފަހުގެ މަޢުލޫމާތުތައް ރައީސުލްޖުމްހޫރިއްޔާ ކައުންސިލަރުންނާ ޙިއްޞާކުރެއްވިއެވެ. އެގޮތުން އެރަށުގައި އަޅަންހަމަޖެހިފައިވާ ހޮސްޕިޓަލްގެ ފަންޑިން އެއްބަސްވުމުގައި ވަރަށް އަވަހަށް ސޮއިކުރުމަށް ހަމަޖެހިފައިވާކަން ހާމަކުރައްވައި އެއާރޕޯޓާއި، ބަނދަރު ފުންކުރުންފަދަ މަސައްކަތްތައް ކުރިޔަށްގެންދިއުމަށް ސަރުކާރުން ރާއްވަވާފައިވާ ގޮތްތަކުގެ މަޢުލޫމާތުވެސް ކައުންސިލަރުންނާ ރައީސުލްޖުމްހޫރިއްޔާ ޙިއްޞާ ކުރެއްވިއެވެ. އަދި މީގެ އިތުރުން ކައުންސިލަރުން ފާހަގަކުރެއްވި ކަންކަމުގައި ސަރުކާރުގެ ކަމާގުޅޭ އިދާރާތަކާ މަޝްވަރާ ކުރައްވާނެ ކަމުގައި އެމަނިކުފާނު ވިދާޅުވިއެވެ.
ވިލުފުށީ ކައުންސިލާއެކު ރައީސުލްޖުމްހޫރިއްޔާ ބޭއްވި މި ބައްދަލުކުރެއްވުމުގައި ރައީސުލްޖުމްހޫރިއްޔާގެ އޮފީހުގެ ޗީފް އޮފް ސްޓާފް، އަލްއުސްތާޒު ޢަލީ ޒާހިރުގެ އިތުރުން ރައްޔިތުންގެ މަޖިލީހުގެ ވިލުފުށީ ދާއިރާގެ މެންބަރު ޙަސަން ޢަފީފު ބައިވެރިވެވަޑައިގެންނެވިއެވެ.
