އެކްސިޑެންޓުގައި އަނިޔާވި އަންހެން މީހާގެ ވާތު ފައި ބުރިކޮށްލައިފި
ޕިކަޕު އަންހެން މީހާގެ ގައިގައި ޖެހިފައިވަނީ ކޮންޓްރޯލުން ނެއްޓިގެން
އެކްސިޑެންޓުގައި ހިނގުމުގެ ކުރިން - އަންހެން މީހާ މަގު ހުރަސްކުރަނިކޮށް
މާލެސިޓީގައި ހިނގި ނުރައްކާތެރި އެކްސިޑެންޓުގައި އަނިޔާވި އަންހެން މީހާގެ ވާތު ފައި ބުރިކޮށްލައިފިއެވެ.
ފުލުހުން ބުނީ ނިކަގަސް މަގުން ބާ ޖަމާލުއްދީން ކައިރިން ހިނގައިފައި ދިޔަ އުމުރުން 47 އަހަރުގެ އަންހެނެއްގެ ގައިގައި ކޮންޓްރޯލުން ނެއްޓުނު ޕިކަޕެއް ޖެހި އެކްސިޑެންޓެއް ހިނގި ކަމުގެ ރިޕޯޓު ފުލުހުންނަށް ލިބިފައިވަނީ އަންގާރަ ދުވަހުގެރޭ 21:03 ހާއިރު ކަމަށެވެ. ފުލުހުން ބުނީ އަންހެން މީހާއަށް އޭޑީކޭގައި ފަރުވާ ދެމުން އަންނަ ކަމަށެވެ.
ފުލުހުން އިތުރަށް ބުނީ ޕިކަޕު ދުއްވަން އިނީ 59 އަހަރުގެ ދިވެހި ފިރިހިނެއް ކަމަށާއި އޭނާ އަކީ ޕިކަޕު ދުއްވުމުގެ ލައިސަންސް އޮންނަ މީހެއް ކަމަށެވެ.
އާންމުވެފައިވާ ވީޑިއޯ އިން ފެންނަ ގޮތުން އެ އަންހެން މީހާ މަގު ހުރަސްކޮށްފައި ދަނިކޮށް ޕިކަޕު ކޮންޓްރޯލުން ނެއްޓިގެން ގޮސް ވަނީ އަންހެން މީހާއާ އެކު ކުރިމަތީ ހުރި ފާރަށް އަރާފައެވެ. ހަމަ އެވަގުތު ޕިކަޕުގައި އިން މީހާ ވަނީ ނިކުމެ އެ އަންހެން މީހާއަށް އެހީތެރިކަން ފޯރުކޮށްދިނުމަށް މަސައްކަތް ކޮށްފައެވެ. އަދި ހާދިސާ ހިނގި ވަގުތު އެ ސަރަހައްދުގައި ތިބި އާންމުން ވެސް ވަނީ އެހީތެރިކަން ފޯރުކޮށްދީފައެވެ.
