އެމްޓީސީސީގެ "ކަށަވަރު ޕްރޮމޯ" ފަށައިފި

ބޮޑެތި ޑިސްކައުންޓްތަކަކާއެކު، އެމްޓިސީސީން "ކަށަވަރު ޕްރޮމޯ" ފަށައިފިއެވެ.

ކަށަވަރު ޕްރޮމޯއަކީ އެމްޓީސީސީން އެކުންފުނީގެ ކަސްޓަމަރުންނަށް އަމާޒުކޮށްގެން، ކޮންމެ އަހަރެއް ފަހުކޮޅު ބާއްވަމުން އަންނަ ސިލްސިލާ ޕްރޮމޯޝަނެކެވެ. ނަމަވެސް ކޮވިޑް-19ގެ ސަބަބުން މިދިޔަ އަހަރު މިޕްރޮމޯޝަން ކުރިއަށް ގެންގޮސްފައެއް ނުވެއެވެ.

މި ޕްރޮމޯޝަންގެ ދަށުން އެމްޓީސީސީން ވިއްކާ ޔަންމާރ އަދި ސުޒުކީ އިންޖީނުގެ ސްޕެއަރ ޕާޓްސް، ޕީޕީޖީ ކޯޓިންގސް، ކާސްޓްރޯލް އަޑީތެޔޮ، ފައިބަރު ސާމާނު، އިންޑަސްޓްރިއަލް ގޭސް އަދި މެރިން ލައިޓަށް ބޮޑެތި ޑިސްކައުންޓުތަކެއް ލިބިގެންދާނެއެވެ.

އެމްޓީސީސީގެ ސީއޯއޯ ޝާހިދު ޙުސައިން ވިދާޅުވީ، އޮޑިވެރިންނާއި، އިންޖިނިއަރުންނާއި، ޓޫރިޒަމް، އަދި މަސްވެރިކަމުގެ އިތުރުން، ޓްރާންސްޕޯޓު ދާއިރާގައި މަސައްކަތްކުރާ ފަރާތްތަކަށް ޚާއްސަ ކުރެވިގެން ބާއްވާ މިޕްރޮމޯޝަންގެ މައިގަނޑު އަމާޒަކީ، އެފަރާތްތަކަށް ލުއިފަސޭހަކޮށް ހެޔޮ އަގުތަކެއްގައި މިތަކެތި ލިބޭނެގޮތް ހަމަޖައްސައިދިނުން ކަމަށެވެ. އަދި މިޕްރޮމޯޝަންގެ ދަށުން މާލޭ ބަނދަރާއި، ތިލަފުށި، ގުޅި، ހިންމަފުށި އަދި ދިއްފުށީގެ ބޯޓު ޔާޑުގައި މަސައްކަތް ކުރާ ފަރާތްތަކަށް މައުލޫމާތު ހިއްސާ ކުރުމަށް އެމްޓީސީސީގެ ޓީމެއް އެތަންތަނަށް ދަތުރުކުރާނެ ކަމަށް ޝާހިދު ވިދާޅުވިއެވެ. މީގެ އިތުރުން އެމްޓީސީސީގެ ހޮޓްލައިން ނަންބަރ 1650 މެދުވެރިކޮށްވެސް މިޕްރޮމޯޝަންގެ މައުލޫމާތު ހޯދޭނެ ކަމަށް ޝާހިދު ވިދާޅުވިއެވެ.

މި ޕްރޮމޯޝަން ކުރިއަށް ދާނީ ނޮވެމްބަރ 17ން ފެށިގެން ޑިސެންބަރ 30ގެ ނިޔަލަށެވެ. އަދި ގުރުއަތުން ހޮވޭ ފަރާތަކަށް 89،000 ރުފިޔާގެ އަގުހުރި ސުޒުކީ އިންޖީނެއް ދިނުމަށް އެމްޓީސީސީން ވަނީ ނިންމާފައެވެ.