އޯވަރޑްރޯ ކުރެވޭ މިންވަރު 3.5 ބިލިއަން ކަމަށް ކަނޑައަޅައި، މުއްދަތު އިތުރު ކޮށްދެއްވުމަށް އަމީރު އެދިވަޑައިގެންފި
ސެކިއުރިޓައިޒްކޮށް 50 އަހަރުގެ އިމޮޓައިޒިން ބޮންޑަކަށް ބަދަލުކުރުމަށް އެދިވަޑައިގެންނެވި
ފިނޭންސް މިނިސްޓަރ އިބްރާޙިމް އަމީރު
އޯވަރޑްރޯ ކުރެވޭ މިންވަރު 3.5 ބިލިއަން ކަމަށް ކަނޑައަޅައި، މުއްދަތު އިތުރު ކޮށްދެއްވުމަށް ފިނޭންސް މިނިސްޓަރ އިބްރާހީމް އަމީރު އެދި ވަޑައިގެންފިއެވެ.
ރައްޔިތުންގެ މަޖިލީހުގެ މާލިއްޔަތު ކޮމިޓީގައި މިކަމާ ގުޅޭގޮތުން ވާހަކަފުޅު ދައްކަވަމުން އަމީރު ވިދާޅުވީ، އޯޑީގެ މުއްދަތު އިތުރު ކުރުން މި ދަނޑިވަޅަށް ވަރަށް މުހިއްމު ކަމަށެވެ. އޯޑި ކުރަން ހުށަހެޅިއިރު ތިން ކަމެއް މިނިސްޓަރ ވަނީ ހުށަހަޅުއްވާފައެވެ. ފުރަތަމަ ކަމެއްގެ ގޮތުގައި ހުށަހެޅުއްވީ، 2023ވަނަ އަހަރުގެ ޑިސެމްބަރު މަހުގެ 31 ވަނަ ދުވަހުގެ ނިޔަލަށް ޕަބްލިކް އެކައުންޓް އޯވަރޑްރޯ ވެފައި ހުރި މިންވަރު ސެކިއުރިޓައިޒްކޮށް އެމްއެމްއޭއިން ސަރުކާރަށް އިޝޫ ކޮށްފައިވާ 50 އަހަރުގެ އިމޮޓައިޒިން ބޮންޑަކަށް ބަދަލުކުރުމެވެ.
ދެވަނަ ކަމެއްގެ ގޮތުގައި ހުށަހެޅުއްވީ، 2022 ޖެނުއަރީ 1 ވަނަ ދުވަހުން ފެށިގެން 2023 އެޕްރީލް 26ވަނަ ދުވަހާ ހަމައަށް އޯވަރޑްރޯ ކުރެވޭ އެންމެ މަތީ މިންވަރަކީ 3.5 ބިލިއަން ރުފިޔާ ކަމަށް ކަނޑައެޅުމެވެ.
ތިންވަނަ ކަމެއްގެ ގޮތުގައި ހުށަހެޅެއްވީ، މި ތާރީޚުގައި އޯވަރޑްރޯ ވެފައި ހުންނަ ކޮންމެ ދުވަހަކު އޯވަރޑްރޯ ވެފައިވާ ބެލެންސް އަހަރަކަށް 0.1 އިންސައްތަ ރޭޓުން އެމްއެމްއޭއިން އިންޓަރެސްޓް ޗާޖް ކުރުމަށް ހަމަޖެއްސުމެވެ.
މިނިސްޓަރ ވިދާޅުވީ، ރިސްކުތަކެއް ހުރި ނަމަވެސް ފާއިތުވި ދުވަސްތަކުގައި އޯޑީ ކޮށްގެން އިގްތިސާދު ބެލެންސް ކުރުމަށް މުހިއްމު ކަމެއް ކަމަށެވެ. އަމީރު ވިދާޅުވީ، އަންނަ އަހަރު ފަތުރުވެރިކަން ރަނގަޅުވެ، ބޭރު ފައިސާ ވަންނަ މިންވަރު އިތުރުވުމުން ރިސްކު ކުޑަކުރެވިގެންދާނެ ކަމަށް ގަބޫލު ކުރައްވާ ކަމަށެވެ.
މިނިސްޓަރ ވިދާޅުވީ، އިސްތިސްނާގެ މުއްދަތު އިތުރު ނުކުރާނަމަ 26 ބިލިއަނަށް ބަޖެޓް ކުޑަކުރަން ޖެހޭނެ ކަމަށެވެ. ބަޖެޓް ކުޑަކުރާއިރު މިހާރު ސަރުކާރުން ކުރުމަށް ރާވާފައިވާ މަޝްރޫއުތައް މަދުކޮށް، ސަރުކާރުން އަލަށް ރާވާފައިވާ ކަަންކަން މަޑު ޖައްސާލަން ޖެހޭނެ ކަަމަށެވެ. އިގްތިސާދު ހަމައަކަށް އެޅުވުމަށް މިހާރު ކުރަމުން އަންނަ ކަންކަން ކުރިއަށް ގެންދެވޭނީ މުއްދަތު އިތުރު ކޮށްދީގެން ކަމަށް އަމީރު ވިދާޅުވިއެވެ. އެހެންކަމުން އެ މުއްދަތު އިތުރު ކޮށްދެއްވުމަށް އެދިވަޑައިގަންނަވާ ކަމަށް އަމީރު ވިދާޅުވިއެވެ.
