ބަޝީރު ސްޕޯޓްސް އެކަޑަމީން އިންތިޒާމުކޮށްގެން މިމަހުގެ 27 ވަނަ ދުވަހު ފެށުމަށް ހަމަޖެހިފައިވާ ބީއެސްއޭ ވޭވް އެލްމިނިއަމް ފުޓްސަލް ޗެލެންޖަށް ބޮޑު ތަރުހީބެއް ލިބިފައިވާ ކަމަށް އެ އެކަޑަމީން ބުނެފިއެވެ.

ބީއެސްއޭއިން މައުލޫމާތު ދިންގޮތުގައި މިމުބާރާތުގައި ބައިވެރިވުމަށް ހުޅުވާލީ އެންމެ ފުރަތަމަ ފޯމް ހުށަހަޅާ 16 ޓީމަށް ފުރުސަތުދޭގޮތަށެވެ. އެގޮތުން ފޯމް ހުށަހެޅުމަށް ހުޅުވާލިތާ ދެ ދުވަހުގެ ތެރޭގައި ވަނީ 16 ޓީމު ހަމަވެފައެވެ. ބަޝީރު އެކަޑަމީން މައުލޫމާތުދިން ގޮތުގައި މިމުބާރާތުގައި ޖުމްލަ މިހާތަނަށް 25 ޓީމަކުން ފޯމް ހުށަހަޅާފައިވީނަމަވެސް ފުރުސަތު ދެވޭނީ އެންމެ ފުރަތަމަ ފޯމް ހުށަހެޅި 16 ޓީމަށެވެ.

އެފަރާތުން ހާމަކުރާ ގޮތުގައި މިމުބާރާތުގެ މަގުސަދަކީ ކުޅުދުއްފުށީގެ ޒުވާނުންގެ މެދުގައި އެކުވެރިކަން ބަދަހިކޮށް އިޖްތިމާއީ ރޫހާއި ކުޅިވަރުގެ ރޫހު އާލާ ކުރުމެވެ. އަދި ކުޅުދުއްފުށީގައި ފުޓްބޯޅަ ކުރިއެރުވުމާއި މުބާރާތްތަކުގައި ވާދަކުރުމުގެ ފުރުސަތު ލިބިފައިނުވާ ގިނަ ޒުވާނުންނަށް އެފުރުސަތު ހޯދާ ދިނުމެވެ.

މިމުބާރާތުގައި ބައިވެރިވުމަށް ޓީމް އެންޓްރީ ފޯމާއެކު 1000 ރުފިޔާގެ ޗަންދާއެއް ވެސް ދައްކަން ޖެހެ އެވެ. މިމުބާރާތުގެ ގުރުއަތުލުން ކުރިއަށް ގެންދިއުމަށް ހަމަޖެހިފައިވަނީ މިމަހުގެ 24 ވަނަ ދުވަހު އެވެ. އަދި މުބާރާތުގެ ޓީމް ލިސްޓަށް އުނިއިތުރު ގެނެވޭނެ އެންމެ ފަހު ތާރީޚަކީ މިމަހުގެ 22ވަނަ ދުވަހެވެ. އުނިއިތުރު ގެންނަން ބޭނުންނަމަ އިދާރީ ފީގެ ގޮތުގައި 100 ރުފިޔާ ދައްކަން ޖެހެއެވެ.

މިމުބާރާތުގެ މެޗުތައް ކުޅެވޭނީ 4 ގްރޫޕަކަށް ބަހާލައިގެންނެވެ. އަދި 2019 ވަނަ އަހަރު ސެމީއަށް ދިޔަ ޓީމުތައް އެ އޮންނަ އުސޫލުގެ ތެރެއިން ސީޑް ކުރެވޭނެ އެވެ. އަދި މެޗުތައް ކުޅުމަށް ހަމަޖެހިފައިވަނީ ފީފާގެ އެންމެ ފަހުގެ ފުޓްސަލް ގަވާއިދުގެ ދަށުންނެވެ. މުބާރާތުގެ ޗެމްޕިއަން ޓީމަށް 10000 ރުފިޔާގެ އިނާމުގެ އިތުރުން މިލްކުވާ ތައްޓާއި ރަން މެޑަލް ލިބޭނެ އެވެ. ރަނަރަޕް ޓީމަށް ރިހި މެޑަލްގެ އިތުރުން 3000 ރުފިޔާ ލިބޭނެ އެވެ. މުބާރާތުގައި ދެން ހޮވާ މަގާމުތަކަކީ އެންމެ މޮޅު ފަސް ކުޅުންތެރިންނާއި، އެންމެ ގިނަ ގޯލު ޖެހި ކުޅުންތެރިޔާ އާއި ،މުބާރާތުގެ އެންމެ މޮޅު ކުޅުންތެރިޔާގެ އިތުރުން ކޮންމެ މެޗެއްގެ އެންމެ މޮޅު ކުޅުންތެރިޔާ އެވެ.

މިއީ އެ އެކަޑަމީން މިގޮތަށް ބާއްވާ ދެވަނަ މުބާރާތެވެ.