ޕާސްޕޯޓް ހިފަހައްޓާފައިވަނީ ތަންފީޒުކުރަންޖެހޭ ހުކުމްތައް ހުރުމުން
ގައިއިދީން އަނބުރާ މުޖުތަމައަށް ގެނެސް، ޖަލުތައް އިސްލާހު ކުރުމަށް ގިނަ މަސައްކަތްތަކެއް ވަނީ ފަށާފައި
މައާފުދިނުމާއި އަދަބު ލުއިކޮށްދިނުމުގެ ގާނޫނުގެ ދަށުން ގޭ ބަންދަށް ނުވަތަ ރަށު ބަންދަށް ދޫކޮށްފައިވާ މީހުންގެ ތެރެއިން، އެ މީހުންގެ މައްޗަށް ޝަރުތުކޮށްފައިވާ ކަންކަން ފުރިހަމަ ކޮށްފައިވާ މީހުންގެ ޕާސް ޕޯޓް ހިފެހެއްޓިފައި ނުވާކަމަށް ހޯމް މިނިސްޓަރ ޢިމްރާން ޢަބްދުﷲ ވިދާޅުވެއްޖެއެވެ.
މިނިސްޓަރ މިހެން ވިދާޅުވީ، މައާފުދިނުމާއި އަދަބު ލުއިކޮށްދިނުމުގެ ގާނޫނުގެ ދަށުން ޑީ.ޕީ.އާރު.އެސްއިން ގޭބަންދަށް ދޫކޮށް، ވަކި މުއްދަތެއްގައި ގޭބަންދުގައި ހުރުމަށްފަހު ރަށު ބަންދަށް ނުވަތަ ޖަލުން ރަށު ބަންދަށް ދޫކޮށްފައިވާ މީހުންގެ ތެރޭގައި، ޕާސްޕޯޓު ހިފަހައްޓާފައިވާ، ނުވަތަ ރަށު ބަންދަށް ދޫކުރުމަށްފަހު އިތުރު މުއާމަލާތެއް ނުހިންގާ 10 އަހަރަށްވުރެ ގިނަ ދުވަސްވެފައިވާ ފަރާތްތައް ހިމެނޭ ކަން ފާހަގަކޮށް، މިކަމަށް ހައްލެއް ނުލިބި ލަސްވެގެންދަނީ ކީއްވެގެންތޯ މަޖިލީހުގެ ނައިބު ރައީސް އީވާ ޢަބްދުﷲ ކުރެއްވި ސުވާލަށް ލިޔުމުން ޖަވާބު ދެއްވަމުންނެވެ.
ޖަވާބުގައި މިނިސްޓަރ ވިދާޅުވީ، އެ ގާނޫނުގެ ދަށުން ހަދާފައި ގަވައިދުގެ ތެރެއިން ދޫކޮށްފައިވާ މީހުންގެތެރެއިން، އެ މީހުންނަށް ކޮށްފައިވާ ޝަރުތުތަކާ ޚިލާފުވުމުގެ ސަބަބުން ހުކުމަށް އަލުން ރުޖޫއަކުރަންޖެހޭ މީހުން ހިމެނޭ ގޮތަށް، ހުކުމް ތަންފީޒު ކުރަންޖެހޭ މީހުންގެ ތެރެއިން، އެކި ސަބަބުތަކާހެދި މުޖުތަމަށް ދޫވެފައިވާ މީހުންގެ ޕާސްޕޯޓް ހިފަހައްޓާފައިވާނެ ކަމަށެވެ. އެފަދަ ކަމެއް ނެތް މީހުންގެ ޕާސްޕޯޓް ހިފަހައްޓާފައި ނުވާނެކަމަށެވެ. ޕާސްޕޯޓް ހިފަހައްޓާފައިވާ މީހުންގެ ތެރޭގައި ޑްރަގް ފަރުވާ ފުރިހަމަ ނުކުރުމާއި، ދަރަނި އަދާ ނުކޮށްގެން ޣައިރު ހާޒިރުގައި ހުކުމްކޮށްފައިވާ މީހުން ހިމެނޭ ކަމަށެވެ. މި އެންމެންގެ ޕާސްޕޯޓް ހިފަހައްޓާފައިވަނީ ތަންފީޒުކުރަންޖެހޭ ހުކުމްތައް ހުރުމުން ކަމަށް މިނިސްޓަރ ވިދާޅުވިއެވެ.
އެހެންނަމަވެސް މި މީހުންގެ ތެރޭގައި އިތުރު ކުށަކަށް އަރައި ނުގަނެ، ގިނަ ދުވަސްވެފައިވާ މީހުން ހިމެނޭ ކަމަށާއި، އެމީހުންގެ މައްޗަށް އިއްވާފައިވާ ހުކުމް ތަންފީޒު ކުރުމަކީ އެންމެ މަސްލަހަތު ހިމެނޭ ގޮތްކަމަށް ނުުފެންނަ ކަމަށެވެ. އެހެންކަމުން އެ މީހުންނަށް އަދުލުވެރި ހައްލެއް ހޯއްދެވުމަށް މަސައްކަތް ކުރަމުން އަންނަ ކަމަށް މިނިސްޓަރ ވިދާޅުވިއެވެ.
މަޝްވަރާތަކުގެ ތެރެއިން އެކަށީގެންވާ ދާއިމީ ހައްލެއް ލިބިފައި ނުވާކަމަށް މިނިސްޓަރ ވިދާޅުވިއެވެ. އެހެންނަމަވެސް ގާނޫނީ އޮނިގަނޑުގެ ތެރެއިން މިހާރުވެސް ހައްލުކުރެވޭނެ ކަންކަން ދެނެގަތުމުގެ މަސައްކަތް ކުރައްވަމުން އަންނަ ކަމަށެވެ.
