ބޫސްޓަރ ޑޯޒު ޖަހަން ބޭނުންވާ ފަރާތްތަކަށް ފުރުސަތު ހުޅުވާލައިފި

ކޮވިޑް-19ން ރައްކާތެރިވުމަށް ރާއްޖޭގައި ކުރިއަށް ގެންދާ ވެކްސިނޭޝަން ކެމްޕެއިނުގެ ތެރެއިން، ވެކްސިންގެ ތިންވަނަ ޑޯޒު (ބޫސްޓަރ ޑޯޒު) ޖަހަން ބޭނުންވާ ފަރާތްތަކަށް އެފުރުސަތު ހުޅުވާލައިފިއެވެ.

ވެކްސިންގެ ތިންވަނަ ޑޯޒް ޖެހޭނީ އޭޑީކޭ އަދި ހުޅުމާލެ ހޮސްޕިޓަލުން ކޮންމެ ހޮނިހިރު ދުވަހަކުން ބުރާސްފަތި ދުވަހަކަށެވެ. މިހާރު ރާއްޖޭގައި ތިންވަނަ ޑޯޒު ޖެހޭނީ ހަމައެކަނި ފައިޒާ ވެކްސިންގެއެވެ.

އެޗްޕީއޭއިން އާންމުކޮށްފައިވާ މައުލޫމާތުގައިވާ ގޮތުން މާލެ ސަރަހައްދުގައި ތިންވަނަ ޑޯޒުގެ ފައިޒާ ވެކްސިން ޖެހުމަށް ދާން ޖެހޭނީ އޭޑީކޭ، ހުޅުމާލޭ ހޮސްޕިޓަލް އަދި އައިޖީއެމްއެޗްއަށެވެ. އެސްޓްރަޒެނިކާ ވެކްސިން ޖެހުން އޮންނާނީ ދަމަނަވެށި، ހުޅުމާލޭ ހޮސްޕިޓަލް، އައިޖީއެމްއެޗް، ސެނަހިޔާ އަދި ވިލިމާލެ ހޮސްޕިޓަލުގައެވެ. ސިނަފޯމް ވެކްސިންގެ ތިންވަނަ ޑޯޒު ޖެހޭނީ ސެނަހިޔާއިން އެކަންޏެވެ.

ދުނިޔޭގެ ގިނަ ގައުމުތަކެއްގައި ކޮވިޑުން ރައްކާތެރިވުމަށް ވެކްސިންގެ ތިންވަނަ ޑޯޒެއް މިހާރު އަންނަނީ ޖަހަމުންނެވެ. ތިންވަނަ ޑޯޒު ދެނީ އުމުރުން ދުވަސްވީ މީހުންނާއި ދިގު މުއްދަތަކަށް ބޭސްކުރާ މީހުންނަށެވެ.

ރާއްޖޭގައި ކުރިއަށް ގެންދާ ވެކްސިނޭޝަން ކެމްޕެއިނުގެ ދަށުން 395،004 މީހަކު މިހާރު ވަނީ ވެކްސިންގެ ފުރަތަމަ ޑޯޒު ފުރިހަމަ ކޮށްފައެވެ. އަދި 360،584 މީހުން ވަނީ ވެކްސިންގެ ދެޑޯޒު ޖަހާފައެވެ.