ފުރަތަމަ މޮޅާއެކު އިންޑިއާއަށް އުއްމީދެއް

މިހާރު ކުރިއަށްދާ ޓީ20 ވޯލްޑް ކަޕުގައި ބުދަ ދުވަހުގެރޭ ކުޅުނު މެޗުން އަފްޣާނިސްތާން އަތުން އިންޑިއާ ފުރަތަމަ މޮޅު ހޯދައިފިއެވެ.

މި މުބާރާތުގެ މެޗުތައް ޔުނައިޓެޑް އަރަބި އެމިރޭޓްސް (ޔޫއޭއީ) ގައި ކުޅެމުން އަންނައިރު، މި ފަހަރުގެ މުބާރާތުގައި ކުޅުނު ފުރަތަމަ މެޗުން އިންޑިއާ ވަނީ ވާދަވެރި ޕާކިސްތާން އަތުން 10 ވިކެޓުން ބަލިވެފައެވެ. މިއީ ވޯލްޑް ކަޕެއްގައި ޕާކިސްތާން އަތުން އިންޑިއާ ބަލިވި ފުރަތަމަ ފަހަރެވެ. އަދި ދެވަނަ މެޗުން އިންޑިއާ ބަލިވީ ނިއު ޒީލެންޑާ ވާދަކޮށް އަށް ވިކެޓުންނެވެ.

އެއާއެކު ބުދަ ދުވަހުގެރޭ ކުޅުނު މެޗުން އިންޑިއާއަށް މޮޅުވުން މަޖުބޫރިވެފައި އޮއްވައި، އެ މެޗުން އެ ގައުމު މޮޅުވީ އަފްޣާނިސްތާން އަތުން ފަސޭހަކަމާއެކު 66 ލަނޑުންނެވެ.

މި މެޗުގެ ޓޮސް ދިމާވުމުން އަފްޣާނިސްތާނުން ނިންމީ ހޮވުމަށެވެ. އެއާއެކު އިންޑިއާ އެންމެ ފުރަތަމަ ކުޅެން އަރައި، 20 އޯވަރު ހަމަވިއިރު ދެ ކުޅުންތެރިން ނުބައިވެގެން ވަނީ 210 ލަނޑު ހަދާފައެވެ. އެ ގައުމުން އެންމެ ރަނގަޅަށް ކުޅުނީ 47 ބޯޅައިން 74 ލަނޑު ހެދި ރޯހިތު ޝަރްމާ އާއި އާއި 48 ބޯޅައިން 69 ލަނޑު ހަމަކުރި ރާހުލްއެވެ.

ޖަވާބުގައި އަފްޣާނިސްތާން ކުޅެން އަރައި، 20 އޯވަރު ހަމަވިއިރު ހަތް ކުޅުންތެރިން ނުބައިވެގެން ހެދުނީ 144 ލަނޑެވެ. އެ ގައުމުން އެންމެ ރަނގަޅަށް ކުޅުނީ ނުބައިނުވެ 22 ބޯޅައިން 42 ލަނޑު ހެދި  ކަރީމް ޖަނަތާއި 32 ބޯޅައިން 35 ލަނޑު ހަމަކުރި މުޙައްމަދު ނާބީއެވެ.

މި މޮޅާއެކު ގްރޫޕް ދޭއްގެ ހަތަރުވަނައަށް އިންޑިއާ ޖެހިލިއިރު، އެ ޓީމާއި ފަސްވަނައިގައި އިތް ނެމިބިއާއަށް ވަނީ ދެ ޕޮއިންޓް ލިބިފައެވެ. މި ގްރޫޕުގެ އެއްވަނައިގައި އޮތީ އަށް ޕޮއިންޓާއެކު ސެމީގެ ޖާގައެއް ކަށަވަރުކޮށްފައިވާ ޕާކިސްތާނެވެ. އަދި ދެވަނައިގައި އޮތް އަފްޣާނިސްތާނާއި ތިންވަނައިގައި އޮތް ނިއު ޒީލެންޑަށް ވަނީ ހަތަރު ޕޮއިންޓް ލިބިފައެވެ.

ބުދަ ދުވަހު ކުޅުނު މެޗުން ނިއު ޒީލެންޑް މޮޅުވީ ސްކޮޓްލެންޑް އަތުން 16 ލަނޑުންނެވެ. އެއާއެކު ޕޮއިންޓެއް ނުލިބި ގްރޫޕުގެ ފުލުގައި އޮތް ސްކޮޓްލެންޑް ވަނީ މުބާރާތުން ކަޓާފައެވެ.