ރިސޯޓުތަކުގެ 99 އިންސައްތަ މުވައްޒަފުން ވެކްސިންގެ ފުރަތަމަ ޑޯޒު ޖަހައިފި

ރާއްޖޭގެ ރިސޯޓުތަކުގައި މަސައްކަތްކުރާ 99 އިންސައްތަ މުވައްޒަފުން ވެކްސިންގެ ފުރަތަމަ ޑޯޗު ފުރިހަމަކޮށްފި ކަމަށް ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކައިފިއެވެ.

ޓޫރިޒަމް މިނިސްޓްރީން އެންމެ ފަހުން ނެރުނު ހިސާބުތަކުން ދައްކާ ގޮތުގައި ރާއްޖޭގެ ރިސޯޓުތަކުގައި މަސައްކަތް ކުރާ މުވައްޒަފުންގެ ތެރެއިން 95 އިންސައްތަ މުވައްޒަފުން ވަނީ ވެކްސިންގެ ދެޑޯޒު ފުރިހަމަކޮށްފައެވެ. އަދި ވެކްސިންގެ ފުރަތަމަ ޑޯޒު ފުރިހަމަ ނުކޮށް އޮތީ އެންމެ އިންސައްތައެއްގެ މުވައްޒަފުންނެވެ.

ކޮންމެ ހަފްތާއަކު އެއްފަހަރު ނެރޭ ފަތުރުވެރިކަމުގެ ދާއިރާގައި މަސައްކަތްކުރާ މުވައްޒަފުންގެ ވެކްސިނޭޝަން އަޕްޑޭޓު މީގެ ކުރިން ނެރުނުއިރު ވެކްސިންގެ ދެވަނަ ޑޯޒު ފުރިހަމަކޮށްފައި ވަނީ 93 އިންސައްތަ މުވައްޒަފުންނެވެ.

ރާއްޖޭގައި މިވަގުތު އޮޕަރޭޓުކުރާ 152 ރިސޯޓެއް އޮތްއިރު، މިރިސޯޓުތަކުގައި ޖުމްލަ 41،431 މުވައްޒަފުން އަންނަނީ މަސައްކަތް ކުރަމުންނެވެ.

ޓޫރިޒަމް މިނިސްޓްރީގެ އަމާޒަކީ ރާއްޖޭގެ ފަތުރުވެރިކަމުގެ ދާއިރާގައި މަސައްކަތް ކުރާ މުވައްޒަފުންނަކީ ވެކްސިންގެ ދެޑޯޒު ފުރިހަމަކޮށް ރައްކާތެރިކަމުގެ ފިޔަވަޅު އަޅައިގެން ތިބި ބަޔަކަށް ހެދުމެވެ. އެއީ ރާއްޖެއަށް އަންނަ ފަތުރުވެރިންނާއި އެންމެ ގާތުން މަސައްކަތް ކުރާނެ ބަޔަކަށް ރިސޯޓު މުވައްޒަފުން ވާނެތީއެވެ. މީގެ އިތުރުން ރާއްޖޭގެ ފަތުރުވެރިކަމުގެ ސިނާއަތުގައި މަސައްކަތް ކުރާ ހުރިހާ މުވައްޒަފުން ވެކްސިން ޖަހައި، ދުނިޔޭގެ އެންމެ ފުރަތަމަ "ފުލީ ވެކްސިނޭޓެޑް ޓޫރިޒަމް" އަކަށް ރާއްޖެ ވުމަކީ ޓޫރިޒަމް މިނިސްޓްރީގެ ވަރަށް ބޮޑު އަމާޒެކެވެ.