އެމްޓީސީސީއަށް މިވަގުތު ދިމާވެފައި އޮތް އެންމެ ބޮޑު ދަތިކަމަކީ ހުނަރުވެރި މުވައްޒަފުން ހޯދުން ކަމަށް އެކުންފުނިން ބުނެފިއެވެ.
އެމްޓީސީސީން ކުރިއަށްގެންދާ މަސައްކަތްތަކާ ގުޅޭގޮތުން ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން އެކުންފުނީގެ ކޮންސްޓްރަކްޝަން އެންޑް ޑްރެޖިންގ ޑިވިޝަންގެ ޖެނެރަލް މެނޭޖަރ ރަމްޒީ އަބޫބަކުރު ވިދާޅުވީ، އެކުންފުންޏަށް ބޭނުންވާ ހުނަރުވެރި މުވައްޒަފުން ނުލިބުމަކީ މިވަގުތު ދިމާވެފައިވާ އެންމެ ބޮޑު ހުރަސް ކަމުގައެވެ. އަދި ވަކިން ޚާއްސަކޮށް މަސައްކަތްތައް ކުރިއަށް ދާއިރު އެކަންތައް ބެލެހެއްޓުމަށް އެކަށީގެންވާ ސުޕަވައިޒަރުން ހޯދުމުގައި ގިނަ ދަތިތަކެއް ހުރިކަމަށް ރަމްޒީ ފާހަގަ ކުރެއްވިއެވެ.
ރަމްޒީ ވިދާޅުވީ ކުންފުންޏަށް ބޭނުންވާ މެޝިނަރީޒްއާ އެހެނިހެން އާލާތްތައް ހީނުކުރާހާ ގިނައިން ހޯދިފައިވާ ކަމަށެވެ. އަދި މިބަދަލުތަކާއެކު ކުންފުނީގެ އުފެއްދުންތެރިކަމަށް ބޭނުންވާ އާލާތްތައް 100 އިންސައްތަ އިތުރުކުރެވިފައިވާ ކަމަށެވެ. ނަމަވެސް މިވަގުތު ދިމާވެފައިވާ އެންމެ ބޮޑު ދަތިކަމަކީ މަސައްކަތްތައް ހިންގުމުގައި އިސްކޮށް ހަރަކާތްތރިވާނެ ރަނގަޅު މުވައްޒަފުން ނެތުން ކަމަށް ރަމްޒީ ވިދާޅުވިއެވެ.
މީގެ އިތުރުން އެމްޓީސީސީގެ މަސައްކަތައް ކުރިއަށް ގެންދިއުމުގައި އެންމެ ބޮޑު ގޮންޖެހުންތަކެއް ކުރިމަތިވެފައި ވަނީ ކޮވިޑް-19ގެ ސަބަބުންނެވެ. ނަމަވެސް މިހާލަތާއެކު މަސައްކަތްތައް ކުރިއަށް ގެންދަން ދަސްކޮށް އެކަމަށް ބޭނުންވާ ބަދަލުތައް މިހާރު ގެންނަމުން އަންނަ ކަމަށް ރަމްޒީ ވިދާޅުވިއެވެ. އެކަމަކު ބޭރުން ގެންނަ މުދާތައް ގެނައުމުގައި އަދިވެސް ދަތިތަކެއް ހުރިކަމަށް ރަމްޒީ ފާހަގަކުރެއްވިއެވެ.
މިސަރުކާރު އައުމުގެ ކުރިން އެމްޓީސީސީއަށް އަހަރެއްގެ މައްޗަށް އާމްދަނީގެ ގޮތުގައި ބިލިއަނެއްހާ ރުފިޔާ ލިބެއެވެ. ނަމަވެސް މިސަރުކާރު ހަވާލުވުމާއެކު އެމްޓީސީސީގެ މަސައްކަތްތައް ވަނީ ދެގުނައަށް ގިނަވެފައެވެ. އެގޮތުން މިއަހަރުގެ މިހާތަނަށް ގާތްގަނޑަކަށް ދެބިލިއަނެއްހާ ރުފިޔާގެ އާމްދަނީއެއް އެމްޓިސީސީން ވަނީ ހޯދާފައެވެ.
އެމްޓީސީސީން މިހާރުވެސް އަންނަނީ ރާއްޖޭގެ އެކި ކަންކޮޅުތަކުގައި ކުދިބޮޑު 63 ޕްރޮޖެކްޓް ކުރިއަށް ގެންދަމުންނެވެ. އޭގެތެރެއިން މިއަހަރު ނިމުމުގެ ކުރިން ހަތަރު ޕްރޮޖެކްޓެއްގެ މަސައްކަތް އެއްކޮށް ނިންމާލުމަށް އެމްޓީސީސީން ވަނީ އަމާޒު ހިފާފައެވެ. އެގޮތުން ބ.ފެހެންދޫއާ ހދ.ނެއްލައިދޫ ބަނދަރު ހެދުމުގެ މަސައްކަތާއި، ލ.ފޮނަދޫ މަގު ހެދުމުގެ ދެވަނަ ފިޔަވަހީގެ މަސައްކަތުގެ އިތުރުން، ސެންޓާރާ ތްރީ އައިލެންޑް ރިސޯޓް ޑިކްލެމޭޝަން އެންޑް ޝޯރް ޕްރޮޓެކްޝަން ޕްރޮޖެކްޓްގެ މަސައްކަތް މިއަހަރުގެ ތެރޭގައި ނިމޭނެ ކަމަށް ރަމްޒީ ވިދާޅުވިއެވެ.
