އެމްޓީސީސީގެ ތާރިޚުގައި ހިންގޭ އެންމެ ބޮޑު މަސައްކަތް، ސެންޓާރާ ތްރީ އައިލެންޑް ރިސޯޓް ރިކްލެމޭޝަން އެންޑް ޝޯރ ޕްރޮޓެކްޝަން ޕްރޮޖެކްޓްގެ އަމަލީ މަސައްކަތް މިމަހުގެ ތެރޭގައި ނިމޭނެކަމަށް އެމްޓީސީސީން ބުނެފިއެވެ.

އެމްޓީސީސީން ކުރިއަށްގެންދާ ޕްރޮޖެކްޓްތަކާ ގުޅޭގޮތުން ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން އެކުންފުނީގެ ކޮންސްޓްރަކްޝަން އެންޑް ޑްރެޖިންގ ޑިވިޝަންގެ ޖެނެރަލް މެނޭޖަރ ރަމްޒީ އަބޫބަކުރު ވިދާޅުވީ، ސެންޓާރާ ރިސޯޓުގެ އަމަލީ މަސައްކަތް މިމަހުގެ 15 ވަނަ ދުވަހު ނިންމާލުމަށް މަސައްކަތް ކުރަމުން އަންނަ ކަމަށެވެ. އަދި މިމަސައްކަތް އެއްކޮށް ނިންމުމަށްފަހު މިމަހުގެ 25 ވަނަ ދުވަހު ޕްރޮޖެކްޓް ހޭންޑްއޮވާރ ކުރާނެ ކަމަށް ރަމްޒީ ވިދާޅުވިއެވެ. މި މަސައްކަތް ހޭންޑްއޯވަރ ކުރުމަށް ޚާއްސަ ބޮޑު ހަފްލާއެއް ބޭއްވުމަށް އެމްޓީސީސީން ވަނީ ނިންމާފައެވެ.

ސެންޓާރާ ރިސޯޓުގެ މަސައްކަތަކީ 100 އިންސައްތަ ބައިންލައަގްވާމީ ޕްރޮޖެކްޓެކެވެ. އެމްޓީސީސީން މިޕްރޮޖެކްޓް ހޯދީ ބޭރުގެ ކުންފުނިތަކަކާއި ވާދަކޮށް ބިޑް ކާމިޔާބު ކޮށްގެންނެވެ. ރަމްޒީ ވިދާޅުވީ މިއީ އެމްޓީސީގެ ފެންވަރު ދައްކާލަން ލިބޭނެ އެންމެ ބޮޑު މަސައްކަތަށް ވާއިރު، މިމަސައްކަތް ކާމިޔާބުކަމާއެކު ނިންމާލުމަކީ އެކުންފުންޏަށް ލިބޭނެ ވަރަށް ބޮޑު ކުރިއެރުމެއް ކަމަށެވެ.

ކޮވިޑް-19ގެ ހާލަތުގައި މިމަސައްކަތް ކުރިއަށް ގެންދިއުމަށް ތަފާތުއެކި ގޮންޖެހުންތަކަކާއި ކުރިމަތިލާން ޖެހުނު ނަމަވެސް އެހުރިހާ ދަތިތަކަކުން އަރައިގަނެ މިމަސައްކަތް ކުރިއަށް ގެންދެވުނު ގޮތާއި މެދު ވަރަށް ހިތްހަމަޖެހޭ ކަމަށް ރަމްޒީ ފާހަގަ ކުރެއްވިއެވެ. އަދި މިއީ ކުރިއަށް އޮތްތަނުގައި ކުންފުނި އިޝްތިހާރު ކުރުމަށްވެސް ލިބިގެންދާނެ ވަރަށް ބޮޑު ހިތްވަރެއް ކަމަށް ރަމްޒީ ވިދާޅުވިއެވެ.