އެމެރިކާގެ ނޫސްވެރިއަކު 11 އަހަރަށް ޖަލަށް ލުމަށް މިޔަންމާގެ ކޯޓަކުން ހުކުމްކޮށްފި

އެމެރިކާ ނޫސްވެރިއަކު 11 އަހަރަށް ޖަލަށް ލުމަށް މިޔަންމާ ކޯޓަކުން ހުކުމްކޮށްފިއެވެ.

ބީބީސީގައި ރިޕޯޓު ކޮށްފައިވާ ގޮތުން އެމެރިކާގެ ނޫސްވެރިޔާ ޑެނީ ފެންސްޓާ 11 އަހަރަށް ޖަލަށް ލުމަށް މިޔަންމާ ކޯޓުން ހުކުމް ކޮށްފައިވަނީ އެ ގައުމުގެ އިމިގްރޭޝަން ގާނޫނާ ޚިލާފުވިކަމުގެ ކުށުގައެވެ. އަދި އެ ގައުމުގެ އަސްކަރިއްޔާއާމެދު ނަފްތަރު އުފެއްދުމަށް މަސައްކަތް ކުރުމުގެ ތުހުމަތުވެސް އޭނާގެ މައްޗަށް ކޮށްފައިވެއެވެ.

އޭގެ އިތުރުން، ޓެރަރިޒަމްގެ ދައުވާވެސް އޭނާގެ މައްޗަށް އުފުލާފައިވާއިރު، އަލަށް އުފުލާފައިވާ ދައުވާތައް ސާބިތުވެއްޖަނަމަ އުމުރު ދުވަހުގެ ޖަލު ހުކުމެއް އަންނާނެކަމަށް ބޭރުގެ މީޑިއާތަކުން ވަނީ ރިޕޯޓު ކޮށްފައެވެ. އެ ދައުވާތަކުގެ އަޑުއެހުން 16 ނޮވެމްބަރުގައި ފެށުމަށް ވަނީ ތާވަލު ކޮށްފައެވެ.

މިޔަންމާގެ އޮންލައިން ނޫހެއް ކަމަށްވާ "ފްރޮންޓިޔަރ މިޔަންމާ" ގެ މެނޭޖިންގ އެޑިޓަރުކަން ކުރައްވަމުން ގެންދެވި ޑެނީ ހައްޔަރުކުރީ ޔަންގޮން އިންޓަނޭޝަނަލް އެއަރޕޯޓުންނެވެ. އެއީ މި އަހަރުގެ މެއި މަހުގެ ތެރޭގައެވެ. އޭނާއާއެކު އިތުރު ނޫސްވެރިންވެސް ހައްޔަރު ކޮށްފައިވާކަމަށް ބޭރުގެ ނޫސްތަކުން ރިޕޯޓު ކުރެއެވެ.

އަސްކަރީ ބަޣާވާތަކުން މިޔަންމާގެ ވެރިކަން ފުރޮޅާލާފައިވާއިރު، މިޔަންމާގެ އަސްކަރިއްޔާގެ ވެރިޔާ މިން އައުންގ ހެއިންގް އަމިއްލަފުޅަށް ގައުމުގެ ބޮޑުވަޒީރުކަމަށްވެސް ވަނީ ވަޑައިގެންފައެވެ.

އައު ބޮޑުވަޒީރުކަމާއެކު އައު ސަރުކާރެއްވެސް އުފައްދާފައިވާ ކަމަށް ދައުލަތުގެ މީޑިއާއިން ވަނީ ރިޕޯޓްކޮށްފައެވެ. އައު ސަރުކާރަކާއެކު އަސްކަރިއްޔާގެ އިސްވެރިޔާ ބޮޑުވަޒީރުކަމަށް އަމިއްލަފުޅަށް ވަޑައިގެންފައިވަނީ ރައްޔިތުންގެ ވެރިކަން ވައްޓާލައި ބާރުތައް ހިފެހެއްޓިތާ 6 މަސް ދުވަސް ފަހުންނެވެ.