އައިޖީއެމްއެޗްގައި މަސައްކަތް ކުރަމުން ދިޔަ ފިލިޕީންސްގެ އަންހެން ނަރުހަކު މަރާލާފައިވާ ކަމުގެ ތުހުމަތާއެކު އޭނާގެ ހަށިގަނޑު ޕޯސްޓްމޯޓަމް ހަދާފައިވާއިރު، މިހާރު އެމީހާގެ ހަށިގަނޑު އާއިލާއާ ހަވާލުކުރުމަށް ފިލިޕީންސަށް ފޮނުވާލާފައިވާކަމަށް ފުލުހުން ބުނެފިއެވެ.

ޕޯސްޓްމޯޓަމް ހެދުމަށްފަހު ހަށިގަނޑު މާލެ ގެނެސްފައިވަނީ މިމަހުގެ 7 ވަނަ ދުވަހުއެވެ. ފުލުހުން ބުނީ، އާއިލާއާ ހަވާލުކުރުމަށް ފިލިޕީންސަށް ހަށިގަނޑު ފޮނުވާލާފައިވަނީ ބުދަ ދުވަހުގެ މެންދުރު ފަހުގެ ވަގުތެއްގައި ކަމަށެވެ. އޭނާއަކީ އައިޖީއެމްއެޗްގެ ޑައިލިސިސް ސެންޓަރުގައި މަސައްކަތް ކުރާ މޭރީ ގްރޭސް ނަމަކަށް ކިޔާ ނަރުހެކެވެ. އޭނާގެ މަރުގެ މައްސަލައިގައި ހައްޔަރުކުރީ އޭނާގެ ފިރިމީހާއެވެ. އެއީވެސް އައިޖީއެމްއެޗްގައި މަސައްކަތް ކުރަމުންދާ ނަރުހެކެވެ.

ނަރުސް މީހާ މަރާލި ކަމުގެ ތުހުމަތުގައި ހައްޔަރު ކުރީ 29 އަހަރުގެ ފިލިޕީންސްގެ ފިރިހެނެެއް ކަމަށް ފުލުހުންވަނީ ބުނެފައެވެ. މަރުގެ ތުހުމަތުގައި އޭނާ ހައްޔަރުކުރީ 27 އޮކްޓޯބަރު ވީ ބުދަ ދުވަހުއެވެ. އޭނާ ހައްޔަރުކޮށް ބަންދާ މެދު ގޮތެއް ނިންމުމަށް 28 އޮކްޓޯބަރުގައި ކްރިމިނަލް ކޯޓަށް ހާޒިރުކުރުމުން އެ ކޯޓުން އޭނާގެ ބަންދަށް 15 ދުވަސް ވަނީ ޖަހާފައެވެ. އޭގެފަހުން އަނެއްކާވެސް ބުދަ ދުވަހު، ބަންދުގެ މުއްދަތަށް އިތުރު 15 ދުވަސް ޖަހާފައިވާކަމަށް ފުލުހުން ބުނެއެވެ.

މި މަރާ ގުޅިގެން ފުލުހުން ތުހުމަތުތައް ކުރަން ފެށީ، ދަން ޖެހިފައި ހުރި ކަމަށް ބުނެ ނަރުސް މީހާ ހޮސްޕިޓަލަށް ގެންދިޔަ ނަމަވެސް، އޭނާގެ ހަށިގަނޑުން ދަން ޖެހިފައި ހުރިކަމުގެ ނިޝާނެއް ފެންނަން ނެތުމުންކަމަށް މައުލޫމާތު ލިބެއެވެ.

މި މައްސަލަ ފުލުހުން ގެންދަނީ އިތުރަށް ތަހުގީގު ކުރަމުންނެވެ.