ބަޔަކު ބޭނުންވާ ގޮތުގެ މައްޗަށް ސަރުކާރުން އިތުރަށް އިސްކުރަން އޮތިއްޔާ، އޮންނާނީ އެންމެންގެ ލާބަ – ރައީސް
ވަކި ފަރުދެއް، ވަކި ރަށެއް ފަރަގުނުކޮށް، ސަރުކާރުން ދޭންޖެހޭ ޚިދުމަތް ހަމަހަމަކަމާއެކު ފޯރުކޮށްދޭނެ
ރައީސް، ރަސްދޫ ރައްޔިތުންނާއި ބައްދަލުކުރެއްވުމުގެ ތެރެއިން
ބަޔަކު ބޭނުންވާ ގޮތުގެ މައްޗަށް ސަރުކާރުން އިތުރަށް އިސްކުރަން އޮތިއްޔާ އޮންނާނެ އެއްޗަކީ އެންމެންގެ ލާބަ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
ރައީސް މިހެން ވިދާޅުވީ 54 ވަނަ ޖުމްހޫރީދުވަހުގެ މުނާސަބާގައި ބޭއްވި ހަފުލާގައި ގައުމާ މުޚާތަބު ކުރައްވައި ވާހަކަފުޅުދައްކަވަމުންނެވެ. ރައީސް ވިދާޅުވީ ވަކި ފަރުދެއް، ވަކި ރަށެއް ފަރަގުނުކޮށް، ސަރުކާރުން ދޭންޖެހޭ ޚިދުމަތް ހަމަހަމަކަމާއެކު ފޯރުކޮށްދިނުމަކީ އިޖްތިމާއީ އިންސާފު ކަމަށެވެ. އަދި ވޭތުވެދިޔަ 3 އަހަރު ސަރުކާރުން މަސައްކަތްކޮށްފައިވާނީ އެ ހަމަ ހިފެހެއްޓުމަށް ކަމަށާއި، ސަބަބަކީ ޖުމްހޫރިއްޔަތަކީ ހުރިހާ އެންމެން އެކުވީމާ ކިޔާނަމަކަށްވާތީ ކަމަށެވެ. އަދި އެއީ ރައްޔިތުންގެ ވެރިކަމުގެ އެންމެ އަސާސީ ސިފަކަމަށް އެމަނިކުފާނު ވިދާޅުވިއެވެ.
ފާއިތުވި 3 އަހަރަކީ މުޅިގައުމުގެ މަސްލަހަތާއި އެންމެންގެ ލާބައާއި ގައުމިއްޔަތުގެ ރުކުންތަކުގައި، ބަދަލުނުވާނެ އަދި ގުޑުވާ ނުލެވޭނެ ކަންކަމުގައި ސަރުކާރު ހިންގުމުގައި ވަރަށް ބޮޑު އިސްކަމެއް ދިން 3 އަހަރު ކަމަށެވެ. ދާދި ފަހުން އެމަނިކުފާނު އަރިއަތޮޅުގައިވެސް ވިދާޅުވިފަދައިން، ރަނގަޅަށް ކުރަން ޖެހޭ ކަމެއް އޮތިއްޔާ ސަރުކާރަށް އެކަން ފާހަގަކޮށް ދެއްވުމަށް ވަނީ އެދިވަޑައިގަންނަވާފައެވެ.
ރައީސް ވިދާޅުވީ އެކަކު ދެކޭ ރަނގަޅު އެއީ އަނެކާއަށް ގޯހަކަށް ވެދާނެ ކަމަށެވެ. އެހެން ނަމަވެސް، ޖުމްހޫރިއްޔަތޭ ކިޔަނީ އެހުރިހާ ބައިތަކެއް އެކުވެ އެމުނުމުން ކަމަށާއި، ހުރިހާ ރައްޔިތުންގެ އަޑު ސަރުކާރުން އަހަންޖެހޭކަމަށާއި، އަދި އަހައި އެކަމަށް ރިއާޔަތްކުރާނެ ކަމަށެވެ. ސަރުކާރުގެ ނިންމުމުގެ ތިލަފަތް އަބަދުވެސް ބުރަވާނީ ރައްޔިތުން އެދޭގޮތަށް ކަމަށާއި، އެންމެނަށް ލާބައާއި މަންފާ ހުރިގޮތަށް ކަމަށް ރައީސް ވިދާޅުވިއެވެ.
ރައީސް ވިދާޅުވީ ކައުންސިލް ތަކަށް ގާނޫނީ ބޮޑެތި ބާރާއި، އިޚްތިޔާރާއި، އިމްތިޔާޒުތައް މިއަދު ދެވިފައިވާ ކަމަށެވެ. އަދި ކައުންސިލް ބައްދަލުވުންތަކާއި، ޖަޒީރާ ހޮޅުއަށީގެ ޒަރީއާއިން، ރައްޔިތުންގެ ބަސް، ކަންކަމުގައި އެބަ ހޯދޭ ކަމަށާއި، ނިންމުންތަކުގެ މަރުހަލާގައި އެބައްދަލުވުންތަކަށް ރިއާޔަތްކުރެވޭ ކަމަށެވެ.
ރައީސް ވިދާޅުވީ މިއީ ޖުމްހޫރިއްޔަތުގެ ހަގީގީ ބައިވެރިވުން ހިންގުމުގެ ތެރެއަށް ފޭދިގެންދާ ކަމެއް ކަމަށެވެ. ނަމަވެސް ލާމަރުކަޒީ ނިޒާމަކީ، ވަކިވަކިވެ ބައިބައިވުމަށް ހުޅުވޭ ދޮރަކަށް ވެގެންނުވާނެ ކަމަށެވެ. އަދި ލާމަރުކަޒީ މިފެށުން ކުރިއަށް އޮތީ ފައްކާވެ ފުރިހަމަވަމުން ދިއުން ކަމަށް ރައީސް ވިދާޅުވިއެވެ.
