އަސްކަރީ މަތިންދާބޯޓު ދުއްވުމުގައި، ދިވެހި ސިފައިންގެ ޕައިލެޓުން ހަރަކާތްތެރިވާން ފަށައިފި

އެމްއެންޑީއެފްގެ އަސްކަރީ މަތިންދާބޯޓު ދުއްވުމުގައި، ދިވެހި ސިފައިންގެ ޕައިލެޓުން ހަރަކާތްތެރިވާން ފަށައިފިއެވެ.

ދިވެހި ޕައިލެޓުންނަށް އެއަރކްރާފްޓް ދުއްވޭ ގޮތަށް ހަމަޖައްސައި، އެއްބަސްވުމަކަށް އައިސްފައިވަނީ 2019 ވަނަ އަހަރު ބަދަލުކުރެވުނު ލެޓަރ އޮފް އެކްސްޗޭންޖުގެ ދަށުންނެވެ. އެގޮތުން 5 ޕައިލެޓުން ތަމްރީނުކޮށް، އޭގެ ތެރެއިން 4 ޕައިލެޓުން މިހާރު ވަނީ ތަމްރީނު ފުރިހަމަކޮށްފައެވެ. އަދި ދެ ޕައިލެޓަކު ޑޯނިއަރ ދުއްވުމުގެ ޚިދުމަތަށް ގުޅިފައިވާކަމަށް އެމްއެންޑީއެފުން މައުލޫމާތު ދެއެވެ.

އަންގާރަ ދުވަހު އޮތް ރަސްމިއްޔާތެއްގައި މި ބެޖް ޙަވާލުކޮށްފައިވާ ދެ ޕައިލެޓުންނަކީ އެމްއެންޑީއެފްގެ ފަސްޓް ލެފްޓިނެންޓް އިބްރާހިމް ޝަރީފްއާއި، ލެފްޓިނެންޓް އަހުމަދު އަލީއަށެވެ. މި ދެބޭފުޅުންނަށް ބެޖް ޙަވާލުކޮށްދެއްވީ ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލްއެވެ.

އެކަމާ ގުޅޭގޮތުން ވާހަކަ ދައްކަވަމުން ފަސްޓް ލެފްޓިނެންޓް އިބްރާހިމް ޝަރީފް ވިދާޅުވީ، މި މަސައްކަތް ކުރައްވަނީ ޤައުމީ މަސައްކަތެއްގެ ގޮތުގައި ދެކެވަޑައިގެން، ޤައުމު ދެކެ ލޯބިވާތީ ކަމަށެވެ. އެގޮތުން އެމްއެންޑީއެފްގެ ޕައިލެޓަކަށް ވުމަކީ ލިބޭ ފަޚުރެއްކަމަށް ޝަރީފް ވިދާޅުވިއެވެ.

ޝަރީފް ވިދާޅުވީ، އެމްއެންޑީއެފް އޭވިއޭޝަންގެ ދާއިރާއިން ގިނަ ފުރުސަތުތަކެއް އެބަހުރި ކަމަށެވެ. އެގޮތުން އުޅަނދު ދުއްވުމާއި، އެއަރކްރާފްޓް އިންޖިނިޔަރިންގ އަދި އޭވިއޭޝަން ސަޕޯޓު ދާއިރާއިން ވެސް ފުރުސަތުތައް ފަހިވެފައިވާކަން ޝަރީފް ފާހަގަކުރެއްވިއެވެ. އަދި މިއީ ދެޖިންސުގެ ޒުވާނުން ވެސް ކުރިއަށް ދިއުމަށް ރަނގަޅު ދާއިރާއެއްކަން އޭނާ ފާހަގަކުރެއްވިއެވެ.

އޭގެ އިތުރުން، ލެފްޓިނެންޓް އަހުމަދު އަލީ ވިދާޅުވީ، އެމްއެންޑީއެފްގެ ޑޯނިއަރ ބޭނުންކޮށްގެން ކުރިއަށްގެންދާ ކޮންމެ އޮޕަރޭޝަނެއް ވެސް ހިންގޭނީ އެމްއެންޑީއެފްގެ ޗެއިން އޮފް ކޮމާންޑުގެ ދަށުން އެކުލަވާލެވިފައިވާ ނިޒާމެއްގެ ތެރެއިން، އެ އިދާރާގެ ފުރިހަމަ ކޮންޓްރޯލްގެ ދަށުންކަމަށެވެ.

މީގެ އިތުރުން ވެސް އެއަރޮނޮޓިކަލް އިންޖިނިޔަރިންގ ދާއިރާއިން 10 ސިފައިން ތަމްރީނުކޮށްފައިވާއިރު، އެމްއެންޑީއެފްގެ ޕައިލެޓުންނާއި އިންޖިނިޔަރުން ތަމްރީނު ކުރުމަށް ވެސް އައިލެންޑް އޭވިއޭޝަނާއެކު 2019 ވަނަ އަހަރު ވަނީ އެމްއޯޔޫއެއް ގާއިމުކޮށްފައެވެ. އަދި މި އެމްއޯޔޫގެ ދަށުން 7 ސިފައިން މިހާރު ވެސް އެއަރކްރާފްޓް މެއިންޓެނަންސް ދާއިރާއިން އަމަލީ ތަޖުރިބާ ހޯދަމުންދާކަމަށް އެމްއެންޑީއެފުން މައުލޫމާތު ދެއެވެ.

އޭގެ އިތުރުން ވެސް 3 ޕައިލެޓެއްގެ ތަމްރީނު ފެށުމުގެ މަސައްކަތް މިހާރު ދަނީ ކުރަމުންނެވެ.

އެމްއެންޑީއެފްގެ އެއަރ ވިންގ އުފައްދާފައިވަނީ 22 އޯގަސްޓު 2009 ގައެވެ. އަދި އިންޑިއާ ސަރުކާރުގެ އެހީގައި ހެލިކޮޕްޓަރެއް ގެންނަވައި، އެމްއެންޑީއެފް ސަދަރން އޭރިއާ ކޮމާންޑް، ގަމުގައި، އަދި ދެވަނަ ހެލިކޮޕްޓަރ އެމްއެންޑީއެފް ސެންޓްރަލް އޭރިއާ ކޮމާންޑް ލ. ކައްދޫގައި ޤާއިމުކުރިއެވެ.

އަދި 2020 ވަނަ އަހަރު އެމްއެންޑީއެފް ނޮދަރން އޭރިއާ ކޮމާންޑް ހދ. ހަނިމާދޫގައި ވެސް ޑޯނިއަރ އެއަރކްރާފްޓެއް ވަނީ ޤާއިމުކޮށްފައެވެ. އެމްއެންޑީއެފުން މައުލޫމާތު ދޭ ގޮތުގައި މި އެއަރކްރާފްޓަކީ ކަނޑުގެ ސަރަޙައްދުގެ ސަރވައިލެންސްއާއި މީހުން ސަލާމަތް ކުރުމުގެ އޮޕަަރޭޝަންތަކާއި، ސިއްޙީ ކަންކަމުގައި މީހުން އެއްތަނުން އަނެއް ތަނަށް ގެންދިއުން ފަދަ ކަންކަމަށް ބޭނުންކުރާ އުޅަނދެކެވެ. އެގޮތުން މި އުޅަނދުގައި އެންމެ ޒަމާނީ ރާޑަރާއި، ސެންސަރ ފަދަ ޒަމާނީ އާލާތްތައް ހިމެނިފައިވާކަން އެމްއެންޑީއެފުން ފާހަގަކުރެއެވެ.

މިއީ އިންޑިއާ ސަރުކާރުގެ ހިލޭ އެހީގެ ދަށުން ދިވެހިރާއްޖެއަށް ހަދިޔާކުރުމަށް ފުރަތަމަ މަޝްވަރާ ކުރެވުނު އުޅަނދުތަކެއް ނަމަވެސް، މި އުޅަނދުތައް އޮޕަރޭޓް ކުރުމާއި މެއިންޓެނަންސްއަށް ދެމެހެއްޓެނިވި ގޮތެއްގައި ބޮޑު ހޭދައެއް ކުރަންޖެހޭކަން އެމްއެންޑީއެފުން ފާހަގަކުރެއެވެ. އެއާއެކު އުޅަނދުތައް ބޭނުން ކުރަމުންދަނީ އިންޑިއާ ސަރުކާރުން ރާއްޖޭގެ ދިފާއީ ބާރުގެ ނަން މައްޗަށް ބަދަލުކޮށް، ޤައުމީ ދިފާއީ ބާރުގެ ލޯގޯ ޖަހައި، އެމްއެންޑީއެފްގެ ކޮމާންޑާއި ކޮންޓްރޯލްގެ ދަށުން އޮޕަރޭޓް ކުރާ އުޅަނދުތަކެއްގެ ގޮތުގައިކަމަށް އެމްއެންޑީއެފުން މައުލޫމާތު ދެއެވެ.

އޭގެ އިތުރުން، މިހާރު އުޅަނދުގެ މެއިންޓެނަންސް މަސައްކަތްތަކާއި، ސްޕެއަރ، އަދި ތެޔޮ އެޅުން ފަދަ ހުރިހާ ޚަރަދެއް ބަލަހައްޓަމުން ގެންދަނީ އިންޑިއާ ސަރުކާރުގެ ހިލޭ އެހީގެ ދަށުންނެވެ. އަދި މި އުޅަނދުތައް ބަލައްޓަމުންދަނީ ރާއްޖޭގެ ކަނޑުގެ ސަރަޙައްދު ބެލެހެއްޓުމާއި، ރާއްޖޭގެ މަސްކަނޑުތަކުން ޤަވާއިދާ ޚިލާފަށް މަސްވެރިކަން ކުރާ ފަރާތްތައް މޮނިޓަރކޮށް، ރާއްޖޭގެ ކަނޑުގެ ސަރަޙައްދު ބޭނުންކޮށްގެން ކުރާ ޑްރަގް ވިޔަފާރިއާއި އެނޫންވެސް މަނާ ވިޔަފާރިތަކާއި، އިންސާނީ ވަގުފާރި ފަދަ ކަންކަން ހުއްޓުވުމުގެ އިތުރުން، ކަނޑުމަތީގައި ހާލުގައި ޖެހޭ ފަރާތްތަކަށް އެހީތެރިކަން ފޯރުކޮށްދިނުން ފަދަ އޮޕަރޭޝަންތަކަށެވެ.

އެމްއެންޑީއެފުން މައުލޫމާތު ދޭ ގޮތުގައި 2010 ވަނަ އަހަރުން ފެށިގެން 2021 ވަނަ އަހަރުގެ އޮކްޓޯބަރު މަހާ ހަމައަށް 363 ބަލިމީހުން އުފުލުމަށް ޑޯނިއަރ އެއަރކްރާފްޓް ބޭނުންކޮށްފައިވެއެވެ. އަދި ކަނޑުމަތީގައި ހާލުގައި ޖެހުނު މީހުންގެ ފުރާނަޔާއި މުދާ ރައްކާތެރި ކުރުމަށް ޚާއްސަކޮށްގެން 77 އޮޕަރޭޝަނެއް ހިންގާފައިވެއެވެ. އަދި 121 ސަރވައިލެންސް އޮޕަރޭޝަންސް ހިންގައި، ގިނަ އަދަދެެއްގެ މަސްތުވާތަކެތި ވެސް އަތުލައިގެންފައިވެއެވެ.