ބޭރު ގައުމުތަކުގެ މީހުންނަށް 20 މަހަށް ފަހު އެމެރިކާގެ ބޯޑަރު ހުޅުވާލަނީ

ވެކްސިން ފުރިހަމަ ކޮށްފައިވާ، ބޭރު ގައުމުތަކުގެ މީހުންނަށް އެމެރިކާގެ ބޯޑަރު 20 މަހަށް ފަހު ހުޅުވާލުމަށް އެ ގައުމުން ނިންމައިފިއެވެ.

ހޯމަ ދުވަހު އެ ގައުމުގެ ބޯޑަރު ހުޅުވުމަށް ނިންމާފައިވާއިރު ބޭރު ގައުމުތަކުގެ މީހުންނަށް ބޯޑަރުތައް ބަންދުކޮށްފައިވަނީ ކުރީގެ ރައީސް ޑޮނަލްޑް ޓްރަމްޕުގެ ވެރިކަމުގައި ކޮވިޑާ ގުޅިގެން އެޅި ފިޔަވަޅުތަކުގެ ސަބަބުންނެވެ.

މި ފިޔަވަޅުތަކުގެ ސަބަބުން އެމެރިކާގައި ދިރިއުޅެމުންދާ އެހެން ގައުމުތަކުގެ މީހުންނަށް އަސަރުކޮށްފައިވާއިރު އޭގެ ތެރޭގައި ޔޫރަޕިއަން ޔޫނިއަންގެ ގައުމުތަކާއި އިނގިރޭސިވިލާތުގެ ގައުމުތަކުން މީހުން ހިމެނެއެވެ. 30 ގައުމަކަށް ވުރެ ގިނަ ގައުމުގެ މީހުންނަަށް މިކަމުގެ އަސަރުކޮށްފައިވާއިރު އާއިލާތަކަށް ދުރުގައި ތިބެން ޖެހުމާއި އެމެރިކާގެ ފަތުރުވެރިކަމުގެ ސިނާއަތަށް ވެސް މިކަމުން ވަނީ އަސަރު ކޮށްފައެވެ.

އެއަރލައިންތަކުން ގަބޫލުކުރާ ގޮތުގައި ބޯޑަރު ހުޅުވާލުމުން ވަރަށް ގިނަ އަދަދެއްގެ ފަތުރުވެރިން އެ ގައުމަށް ޒިޔާރަތް ކުރާނެއެވެ. އެމެރިކާގެ ބޯޑަރު ހުޅުވުމަށް ނިންމާފައިވަނީ ވެކްސިންގެ ދެ ޑޯޒް ފުރިހަމަކޮށްފައިވާ މީހުންނަށާއި ޓެސްޓެއް ފުރިހަމަކޮށްފައިވާ މީހުންގެ އިތުރުން ކޮންޓެކްޓް ޓްރޭސިންގ ހަދާފައިވާ މީހުންނަށެވެ.

ކޮވިޑް ފެތުރުން ކޮންޓްރޯލް ކުރުމުގެ ގޮތުން އެމެރިކާގެ ބޯޑަރު ޗައިނާގެ ފަތުުރުވެރިންނަށް ބަންދުކޮށްފައިވަނީ 2020 ވަނަ އަހަރުއެވެ. އަދި އެއަށްފަހު އެހެން ގައުމުތަކުގެ ފަތުރުވެރިން ވެސް އައުން ވަނީ މަނާކޮށްފައެވެ.

އެމެރިކާގައި ކޮވިޑާ ގުޅިގެން ތަންފީޒު ކޮށްފައިވާ އައު ގާނޫނު ބުނާ ގޮތުން ފަތުރުވެރިން ފުރުމުގެ ކުރިން ވެކްސިންގެ ދެ ޑޯޒް ފުރިހަމަކޮށްފައިވާ ކަމުގެ ހެކި ދައްކަން ޖެހެއެވެ. އަދި ދަތުރުކުރުމުގެ ތިން ދުވަސް ތެރޭގައި ނަގާފައިވާ ނެގެޓިވް ޕީސީއަރް ޓެސްޓްގެ ނަތީޖާ އަކާއި އެމީހެއްގެ ފުރިހަމަ މައުލޫމާތު އަރުވަން ޖެހެއެވެ. މިފަދަ މީހުން ކަރަންޓީނުގެ މުއްދަތު ފުރިހަމަ ކުރާކަށް ނުޖެހޭނެއެވެ.