ޕިކްނިކް އައިލެންޑުގެ ބަންޑް ވޯލް ޖަހަން ފަށައިފި

ޕިކްނިކް އައިލެންޑް ތަރައްގީކުރުމުގެ މަސައްކަތުގެ ތެރެއިން މިހާރު ކުރިއަށްގެންދަނީ ބަންޑް ވޯލް ޖެހުމުގެ މަސައްކަތް ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އިން ބުނެފިއެވެ.

މާލެ ސަރަހައްދުގައި ދިރިއުޅޭ ރައްޔިތުން ދަތުރު ދިއުމަށް ޚާއްސަކޮށްފައިވާ ކުޑަގިރި ޕިކްނިކް އައިލެންޑުގެ މަސައްކަތް ކުރިއަށްދިޔަ ހިސާބު ބައްލަވާލެއްވުމަށްފަހު މީޑިއާތަކަށް މައުލޫމާތުދެއްވަމުން މި ޕްރޮޖެކްޓުގެ އެގްޒެކެޓިވް މެނޭޖަރ އިބްރާހީމް ޙަސަން ވިދާޅުވީ, މިހާރު ކުރިއަށްދަނީ ބަންޑް ވޯލް ޖެހުމުގެ މަސައްކަތް ކަމަށެވެ. ބަންޑް ވޯލްއަކީ ރަށް ހިއްކުމުގެ ކުރިން, ދަށުން ވެލި ދެމުން ހުއްޓުވަން އަޅާ އެއްޗެކެވެ.

Advertisement

އިބްރާހީމް ވިދާޅުވީ, މިހާރު މަސައްކަތް ކުރަމުންދަނީ އެންމެ އެސްކަވޭޓަރަކާއެކު ކަމަށެވެ. ދެ ދުވަހެއް ތެރޭގައި އިތުރު އެސްކަވޭޓަރެއް ގެންގޮސް, ބަންޑް ވޯލްގެ މަސައްކަތް ނިންމާލެވޭނެ ކަމަށެވެ. އަދި މިމަހުގެ ތެރޭގައި, މަހާޖައްރާފު ބޭނުންކޮށްގެން ރަށަށް ފަސް އެޅުމުގެ މަސައްކަތް ކުރާނެ ކަމަށް އިބްރާހީމް ވިދާޅުވިއެވެ.

މި މަސައްކަތުގެ ތެރެއިން, ރަށަށް ފަސް އަޅައި ހިއްކުމުގެ އިތުރުން, ގޮނޑުދޮށް ހިމާޔަތްކުރުމާއި ނެރެއް ކެނޑުމުގެ މަސައްކަތް ކުރިއަށްދާކަމަށް އޭނާ ވިދާޅުވިއެވެ. އެގޮތުން 8 ހެކްޓަރުގެ ސަރަހައްދެއް ހިއްކައި، 397.27 މީޓަރުގެ ސަރަހައްދަކަށް ބޭރުތޮށި ލުމާއި، 428.32 މީޓަރުގެ ސަރަހައްދެއްގައި ރިވެޓްމެންޓް ޖެހުމުގެ މަސައްކަތް ކުރިއަށްދާނެ ކަމަށް އެމްޓީސީސީން މައުލޫމާތުދެއެވެ.

މި މަސައްކަތް އަންނަ އަހަރުގެ މާޗް މަހުގެ ނިޔަލަށް ނިންމައި، އޭޕްރީލް މަހު އާންމުންނަށް ހުޅުވާލުމަށް ސަރުކާރުން ވަނީ އަމާޒު ހިފާފައެވެ. މިއީ 41.48 މިލިއަން ރުފިޔާގެ މަޝްރޫއެކެވެ.

މިވަގުތު މާލެ ސަރަހައްދުގައި ދިރިއުޅޭ ރައްޔިތުން ޕިކްނިކް ދިއުމަށް ޚާއްސަ ރަށެއް ކަނޑައަޅާފައިނުވާއިރު، ކުޑަގިރި ފަޅުގައި ޕިކްނިކް އައިލެންޑެއް ތަރައްގީކުރެވުމުން, މި ރަށަކީ މާލެ ސަރަހައްދުގައި ދިރިއުޅޭ ރައްޔިތުން ޕިކްނިކް ދިއުމަށް މާލެއާ ދުރުނޫން ސަރަހައްދަކުން ކަނޑައެޅޭ ރަށެއްކަމުގައި ވެގެންދާނެއެވެ.

ކ. ކުޑަގިރި ފަޅުގައި ޕިކްނިކް އައިލެންޑެއް ތަރައްގީކުރުމުގެ މަސައްކަތް ސަރުކާރުން އެމްޓީސީސީއާ ހަވާލުކޮށްފައިވަނީ މިއަހަރުގެ ސެޕްޓެމްބަރު 1 ވަނަ ދުވަހުއެވެ.