އަފްޣާނިސްތާނުގައި އަންހެނުން ކުޅިވަރު ކުޅުމުގެ ހުއްދަ ދިނުމަށް އެގައުމުގެ އެތުލީޓުން ގޮވާލައިފި
5 ނޮވެމްބަރު 2021 | ހުކުރު 03:00އަންހެން ކުޅުންތެރިންނަށް ފަރިތަކުރުމުގެ ހުއްދަ ވަނީ ދީފައި
އަފްޣާނިސްތާނުގެ އަންހެން އެތުލީޓަކު، ޠާލިބާން ސަރުކާރުން ވަނީ އަންހެނުންނަށް ކުޅިވަރު ނުކުޅެވޭނެ ކަމަށް ބުނެފައި
އަފްޣާނިސްތާނުގައި އަންހެނުންނަށް ކުޅިވަރު ކުޅުމުގެ ހުއްދަ ދިނުމަށް ވެރިކަން ކުރާ ޠާލިބާނުންގެ ކިބައިން އެގައުމުގެ އެތުލީޓުން އެދިއްޖެއެވެ.
ރިޕޯޓްތައް ބުނާ ގޮތުން އަފްޣާނިސްތާނުގެ އަންހެން އެތުލީޓުން އިސްވެ، ވެރިކަން ކުރާ ޠާލިބާން ސަރުކާރާވަނީ ބައްދަލުކޮށްފައެވެ. އަދި މި ބައްދަލުވުމުގައި އަންހެން ކުޅުންތެރިން ބައިވެރިވާ ކުޅިވަރު މުބާރާތްތައް ބޭއްވުމުގެ ހުއްދަ ދިނުމަށް ވަނީ އެދިފައެވެ.
އަފްޣާނިސްތާނުގެ މާޝަލް އާޓްސް ޗެމްޕިއަން އުމުރުން 17 އަހަރުގެ ގަދްރާ ޚާން ބުނީ ކުރިއެކޭ އެއްގޮތަށް އަންހެނުންނަށް މިހާރުވެސް ކުޅިވަރު ހަރަކާތްތައް ފަރިތަކުރުމުގެ ހުއްދަ ޠާލިބާން ސަރުކާރުން ދީފައިވާ ކަމަށާއި، އެކަމަކު ކުޅިވަރު ހަރަކާތްތައް ފަރިތަކުރުމަށްވުރެ ކުރިއެކޭ އެއްގޮތަށް މުބާރާތްތަކުގައި އަންހެން އެތުލީޓުންނަށް ބައިވެރިވެވޭން ޖެހޭނެ ކަމަށެވެ. އަދި ކުޅިވަރަކީ ކަސްރަތެއް ކަމަށާއި، ސިއްހީ ގޮތުންނާއި މެންޓަލީ ބެލިކަމުގައިވިޔަސް ކުޅިވަރުން ގެއްލުމެއް ނެތް ކަމަށެވެ.
ޠާލިބާނުންނާއެކު ބޭއްވި ބައްދަލުވުމުގައި ބައިވެރިވި އެތުލީޓަކު ނަން ހާމަނުކުރުމަށް އެދި ބުނީ، ޠާލިބާން ސަރުކާރުން ކުޅިވަރަށް މާކަބޮޑު އަހަންމިއްޔަތު ކަމެއް ނުދޭ ކަމަށާއި، ޚާއްސަކޮށް އަންހެން އެތުލީޓުންނަށް ޠާލިބާން ސަރުކާރާއެކު ކުރިއެރުމެއް ނެތް ކަމަށެވެ. މީގެ އިތުރުން އޭނާ ބުނީ ކުޅިވަރަކީ ކޮންމެ ދީނަކުން ވެސް ހުއްދަކުރާ ކަމެއް ކަމަށާއި، އިސްލާމްދީނުގައި ވެސް އެކަން އޮތީ އެގޮތަށް ކަމަށެވެ. އަދި އަންހެނުން ކުޅިވަރު ކުޅުން މައްސަލައަކަށް ވާންވީ ސަބަބެއް ނެތް ކަމަށާއި، އިންސާނީ ހައްގުތަކާ ބެހޭ ޖަމާއަތްތަކާއި، އެކުވެރި ދައުލަތުން މި މައްސަލަ ބަލަން ޖެހޭ ކަމަށެވެ.
އަންހެން ކުޅިވަރު އެތުލީޓުން ޠާލިބާނުންނާ ބައްދަލުކޮށްފައި މިވަނީ މިދިޔަ މަހު ޠާލިބާނުން އަފްޣާނިސްތާނުގެ މިނިސްޓްރީ އޮފް ވުމެން އެފެއާޒަށް އަންހެނުން ވަނުން މަނާ ކޮށްފައި ވަނިކޮށެވެ.
