ކޮވިޑްގެ ހާލަތުން ލިބުނު ފިލާވަޅާއެކު، އިޖްތިމާއީ ކަންކަމަށް ބަޖެޓުގައި ރިއާޔަތްކުރެވިފައިވާނެ – އެންސްޕާ
4 ނޮވެމްބަރު 2021 | ބުރާސްފަތި 13:50މަސައްކަތް އަލުން ރޭވިގެން، ނެޝަނަލް ރިކަވަރީ އެންޑް ރިޒިލިއަންސްއަށް ފޯކަސް ކުރެވިގެން އާ މަސައްކަތްތަކެއް ސަރުކާރުން ކުރެވުނު
އެންސްޕާގެ ޗީފް އެގްޒެކެޓިވް އޮފިސަރ އިސްމާޢީލް ޢައްޒާމް ވަޖީހު
ކޮވިޑްގެ ހާލަތާގުޅިގެން ލިބުނު ތަޖްރިބާއާއި ފިލާވަޅުގެ މައްޗަށް ރިއާޔަތްކުރެވިގެން, އަންނަ އަހަރަށް ދައުލަތުން ހުށަހެޅި ބަޖެޓުގައި އިޖްތިމާތީ ކަންކަމަށް ބޮޑުބައެއް ހިމެނިފައިވާނެކަމަށް ނެޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ)ގެ ޗީފް އެގްޒެކެޓިވް އޮފިސަރ އިސްމާޢީލް ޢައްޒާމް ވަޖީހު ވިދާޅުވެއްޖެއެވެ.
ރާއްޖެޓީވީގެ ބަޖެޓް 2022 ޕްރޮގްރާމުގައި ވާހަކަދައްކަވަމުން ޢައްޒާމް ވިދާޅުވީ ކޮވިޑްގެ ހާލަތަކީ ވަރަށް ބޮޑު ލަރނިންގ އެކްސްޕީރިއެންސެއް ކަމަށެވެ. އަދި މިކަމާގުޅިގެން ސަރުކާރުން ކުރި މަސައްކަތުގެ ތެރޭގައި ވަރަށް އަވަސް ފުރުސަތެއްގެ ތެރޭގައި, އޭރު ސްޓްރެޓެޖިކް އެކްޝަން ޕްލޭންގެ ދަށުން ކުރަމުން ދިޔަ މަސައްކަތް އަލުން ރޭވިގެން ނެޝަނަލް ރިކަވަރީ އެންޑް ރިޒިލިއަންސްއަށް ފޯކަސް ކުރެވިގެން އާ މަސައްކަތްތަކެއް ސަރުކާރުން ކުރެވުނު ކަމަށެވެ.
އޭގެ ތެރޭގައި ވަރަށް ބޮޑު އިސްކަމެއް ދެވިގެން, މިފަދަ ކަންތައްތަކަށް ކުރިއަށް އޮތްތާގައިވެސް މުއައްސަސާތަކުން ތައްޔާރީ ހާލަތްތަކުގައި ތިބޭނީ ކިހިނެއްތޯ ބެލިފައިވާނެ ކަމަށެވެ.
ޢައްޒާމް ވިދާޅުވީ ސޯޝަލް ޕްރޮޓެކްޝަން ފްރޭމްވޯކް އަލުން ރިވައިޒް ކުރުމަށް ވޯރލްޑް ބޭންކުގެ އެހީއާއެކު މަސައްކަތްތަކެއް އެބަ ކުރެވޭ ކަމަށެވެ. އަދި މިއީ ރާއްޖޭގައި އަލަށް ކުރެވިގެންދާ ކަމެއް ކަމަށާއި، ބައެއް އާ ދާއިރާތައް މީގެ ތެރޭގައި ހިމެނިގެންދާނެ ކަމަށެވެ.
ޢައްޒާމް ވިދާޅުވީ މި ފްރޭމްވޯރކުގެ ތެރޭގައި, ގުޅިގެން ސަރުކާރުގެ މުއައްސަސާތަކުން ކުރާ މަސައްކަތްތައް މީގެ ތެރޭގައި ހިމެނޭނެ ކަމަށެވެ. އަދި ސޯޝަލް ސެކްޓަރގެ ރިވިއުއެއްވެސް ތައްޔާރު ކުރެވެމުންދާ ކަމަށާއި، ސޯޝަލް ސެކްޓަރއިން މި ކަންތައްތަކަށް އިޖާބަދޭނީ ކިހިނެއްތޯއާއި ރިވިއުކުރާނީ ކިހިނެއްތޯ ބެލުމަށް ސޯޝަލްސެކްޓަރގެ ރިވިއުއެއް ޔުނިސެފާއި ޔޫއެންޑީޕީން ކަމާއި ގުޅުންހުރި މުއައްސަސާތަކުންނާއި ޖެންޑަރ މިނިސްޓްރީން ކުރިއަށް ގެންދާ ކަމަށެވެ.
