ރާއްޖެއަށް ގަންނަ ބޭހުގެ އަގު ކުޑަކުރުމަށް ދަނީ މަސައްކަތް ކުރަމުން: ސަރުވަޝް
ރާއްޖެ އަށް ގަންނަ ބޭހުގެ އަގު ކުޑަކުރުމަށް މަސައްކަތް ކުރުމުގެ ގޮތުން ބޭރުގެ ބައެއް ޤައުމުތަކާއި މިހާރު ވެސް ވާހަކަތައް ދެކެވެމުންދޭ
ފާމަސީއަކުން ބޭސް ވިއްކަނީ
ރާއްޖެ އަށް ގަންނަ ބޭހުގެ އަގު ކުޑަކުރުމަށް މަސައްކަތް ކުރަމުންދާ ކަމަށް ފިނޭންސް މިނިސްޓްރީގެ ޗީފް ފައިނޭންޝަލް ބަޖެޓް އެގްޒެކްޓިވް އަހްމަދު ސަރުވަޝް ވިދާޅުވެއްޖެއެވެ.
ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އަށް ސަރުކާރުން އަންނަ އަހަރަށް ލަފާކުރާ ބަޖެޓު ކުޑަވުމާއި ގުޅިގެން ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަ ދައްކަވަމުން ސަރުވަޝް ވިދާޅުވީ އެންސްޕާ ބަޖެޓުގައި ހިމެނެނީ ހިންގުމުގެ ޚަރަދާއި ސީދާ ގޮތުން ދެވޭ އެހީތަކާއި އާސަންދަ ކަމަށެވެ.
ސަރުވަޝް ވިދާޅުވީ އެންސްޕާ ބަޖެޓުގައި އެންމެ ބޮޑު ހޭދައެއް ކުރަނީ އާސަންދަ އަށް ކަމަށާއި 1.6 ބިލިއަން ރުފިޔާ އާސަންދަށް ހޭދަވޭ ކަމަށެވެ.
އަންނަ އަހަރަށް ލަފާ ކުރާ ބަޖެޓުގައި އާސަންދައިގެ ޚަރަދު ކުޑަކުރުމުގެ ވިސްނުން ސަރުކާރުން ގެންގުޅެފައިވާކަން ފާހަގަކުރައްވާ ސަރުވަޝް ވިދާޅުވީ ލަފާކުރާ ބަޖެޓްގައި ހިމަނާފައިވާނީ ގާތްގަނޑަކަށް އެއް ބިލިއަން ރުފިޔާ ކަމަށެވެ.
އާސަންދަ އަށް ރާއްޖޭން ބޭރުން ގަންނަ ބޭހުގެ ވޮލިއުމް ޑިސްކައުންޓު ހޯދައިގެން، އަގު ކުޑަކުރުމުގެ ވިސްނުމުގައި އެގޮތަށް ބަޖެޓުގައި ހިމަނާފައިވާނެ ކަމަށް ސަރުވަޝް ވިދާޅުވިއެވެ.
ސަރުވަޝް އިތުރަށް ވިދާޅުވީ ރާއްޖެ އަށް ގަންނަ ބޭހުގެ އަގު ކުޑަކުރުމަށް މަސައްކަތް ކުރުމުގެ ގޮތުން ބޭރުގެ ބައެއް ޤައުމުތަކާއި މިހާރު ވެސް ވާހަކަތައް ދެކެވެމުންދާ ކަމަށެވެ.
އެކަން އެގޮތަށް ކުރެވިއްޖެކަމަށްވާނަމަ އާސަންދަށް ކުރެވޭ ޚަރަދާއި އާސަންދައިން ބޭސްވިއްކާ އަގު ވެސް ވަރަށް ބޮޑުތަނުން ކުޑަވެގެންދާނެ ކަމަށް ވިދާޅުވިއެވެ.
ސަރުވަޝް މިހެން ވިދާޅުވެފައިވާއިރު މެކްސިމަމް ރީޓެއިލް ޕްރައިޒް ނުވަތަ ބޭސް ވިއްކޭނެ އެންމެ މަތީ އަގު ކަނޑައެޅުން މާރޗް މަހަށް ސަރުކާރުން ފަސްކޮށްފައިވާއިރު އެކަމަށް އަދި މިހާތަނަށް އަމަލުކޮށްފައެއް ނުވެއެވެ.
މި އަހަރުން ފެށިގެން ޑޮކްޓަރީ ބޭސް ވިއްކޭނެ އެންމެ މަތީ އަގު ނުވަތަ މެކްސިމަމް ރީޓެއިލް ޕްރައިސް (އެމްއާރުޕީ) ކަނޑައަޅަން ވަނީ ނިންމީ އިޖުތިމާއީ ސިއްހީ އިންޝުއަރެންސްގެ ގައުމީ ނިޒާމު، އާސަންދަ އަށް ކުރާ ހޭދަ ކުޑަކުރުމަށެވެ. އާސަންދައިގެ ތަފާސް ހިސާބުތައް ދައްކާ ގޮތުން މިދިޔަ އަހަރު އެކަނިވެސް ފާމަސީތަކަށް ބޭހަށް 800 މިލިއަނަށްވުރެ ގިނަ ރުފިޔާ ޚަރަދު ކުރިއެވެ.
ބޭހުގެ އަގު ކޮންޓްރޯލް ކުރުމަށް ކުރިން ނިންމުމާ ގުޅިގެން ހެލްތު މިނިސްޓްރީން އެއިރު ބުނެފައިވަނީ ބޭސް ގަންނަ އަގަށް އެފްއޯބީ ނުވަތަ ކޮސްޓް ޕްރައިޒް އަށް ބޮޑުވެގެން ލެވޭނީ 100ގެ މާކްއަޕެއް ކަމަށެވެ. މިގޮތުން ދިވެހިރާއްޖެ އަށް އިމްޕޯޓްކޮށް ވިއްކާ ހުރިހާ ބޭސްތަކަށް މެކްސިމަމް ރިޓެއިލް ޕްރައިޒް ކަނޑައެޅުމަށް ވަނީ ހަމަޖެހިފައެވެ.
އެމްއާރްޕީ ކަނޑައެޅުމުގެ މައިގަނޑު މަގުސަދަކީ އަމިއްލަ ފަރުދުންގެ ޖީބުން ބޭހަށް ކުރާ ޚަރަދު ކުޑަކޮށް އިޖުތިމާއީ ސިއްހީ އިންޝުއަރެންސްގެ ގައުމީ ނިޒާމު (އާސަންދަ)ގެ ތެރެއިން ބޭހަށް ކުރާ ހޭދަ އިތުރުވަމުންދާ މިންވަރު ދެމެހެއްޓިނި މިންގަނޑެއްގައި ހިފެހެއްޓުމެވެ. ފިސްކަލް ޕޮލިސީގެ ނަޒަރުން ބަލާއިރު އެމްއާރްޕީ ކަނޑައެޅުން މުހިއްމުވާ މައިގަނޑު ސަބަބަކީ އާސަންދަ ނިޒާމުގެ ތެރެއިން ދައުލަތުން އެއް ކަމަކަށް އެންމެބޮޑު ޚަރަދެއްކުރަމުން އަންނަނީ ބޭހަށް ކަމަށްވާތީއެވެ.
އެގޮތުން ރާއްޖޭގައި ބޭހުގެ އަގު ކޮންޓްރޯލެއްނެތި ބޮޑުވަމުން ދިއުމުގެ ސަބަބުން އާސަންދައަށާއި ބޭސްފަރުވާގެ އެހެނިހެން ޚިދުމަތް ދިނުމަށް ދައުލަތުގެ ހޮސްޕިޓަލުތަކުން ކުރާ ޚަރަދު އިތުރުވެ، ދައުލަތުން އެހެން ޚިދުމަތްތަކަށް ބަޖެޓުން ދެވޭ ޖާގަ ހަނިވެގެންދާކަމަށް ސަރުކާރުން ބުނެއެވެ.
