އަފްޣާނިސްތާނުގެ އިންސާނީ ޙާލަތު ގޯސްވެ، އެ ގައުމުގެ އެތައް މިލިއަން ބަޔަކު ގެދޮރު ނެތިއްޖެއެވެ.

ރިޕޯޓްތައް ބުނާ ގޮތުން ކައިބޮއެ އުޅެވޭނެ ގޮތެއް ނެތިގެން ގެދޮރާއި ދިރިއުޅުން ދޫކޮށް، އެތައް ހާސް އާއިލާއެއް ވަނީ ޑައިކޮންޑި، ހެލްމަންޑް އަދި ޕަންޖްޝީރް ވާދީ ދޫކޮށް ގޮސްފައެވެ. ޠާލިބާނުން އަފްޣާނިސްތާނަށް ވެރިވެގަތްފަހުން އަމިއްލަ ގިނަ ވިޔަފާރިތަކާއި، އަފްޣާނިސްތާނުގައި މަސައްކަތްކުރާ ބައިނަލްއަޤްވާމީ ގިނަ އިދާރާތަކެއްގެ މަސައްކަތް ހުއްޓާލާފައިވުމުން، ގިނަ ބަޔަކަށް ވަޒީފާގެ ފުރުސަތު ވަނީ ގެއްލިފައެވެ.

މީގެ ސަބަބުން، ބައިނަލްއަޤްވާމީ ދުނިޔެއާ އެކަހެރިވެފައި އޮތް އަފްޣާނިސްތާނުގެ އާއްމު ރައްޔިތުންނަށް ދަނީ ގިނަ ދަތިތަކާ ކުރިމަތިވަމުންނެވެ. މީގެ އިތުރުން އަފްޣާން ސަރުކާރު ވެއްޓުމާ ގުޅިގެން ޕަބްލިކް ސެކްޓަރ ވެސް ވަނީ ބޮއްސުންލާފައެވެ. ހަމައެއާއެކު ތަކެތި އިމްޕޯޓްކުރުމަށް ހުރަސްތައް ކުރިމަތިވެ، ކާބޯތަކެތި ހޯދުމަށް ބޮޑެތި ދަތިތަކާ އަފްޣާން ރައްޔިތުން ދަނީ ކުރިމަތިލަމުންނެވެ.

ހަރުދަނާ އިޤްތިޞާދެއް ބިނާކުރުމަށް ބޭނުންވާ މުހިއްމު ކަންތައްތައްކަމަށްވާ ދަތުރުފަތުރާއި، ސަރަހައްދީ ވިޔަފާރި އަދި ބޭރުގެ އިންވެސްޓްމަންޓްތައް އެއްކޮށް ހުއްޓުމަކަށް އައިސްފައި އޮތުމުން، އަފްޣާނިސްތާނުގެ ހާލަތު އަވަސް މުސްތަގްބަލެއްގައި ރަނގަޅުވާނެކަމަކަށް ނުބެލެވެއެވެ. މިކަންތައް އިތުރަށް ގޯސްވެފައިވަނީ ވަޒީފާ ނެތް މީހުންގެ އަދަދު ގިނަވެ، ބަނޑުހައިހޫނުކަމުގައި މީހުން މަރުވެ، ކޮވިޑް-19 ވެސް ހުއްޓުވޭނެ ގޮތެއް ނެތް ހިސާބަށް އަފްޣާނިސްތާނުގެ ޙާލަތު ދިޔުމުންނެވެ.

ކާބުލްގައި އޮތް ޠާލިބާން ސަރުކާރަށް މި މައްސަލަތަކަށް ގެނެވޭނެ ހައްލެއް ހޯދިފައިނުވާއިރު، ސަރަހައްދީ އަދި ބައިނަލްއަގްވާމީ ފަރާތްތަކުގެ އެހީތެރިކަން ނެތި އަފްޣާނިސްތާނަށް ދެން ހިންދަމާނުލެވޭނެކަމަށް އެންމެން ވެސް ގަބޫލުކުރެއެވެ.