ގަރލް ޕަވަރޑް ޕްރޮގްރާމުގައި ބައިވެރިވުމުގެ ފުރުސަތު ހުޅުވާލައިފި
3 ނޮވެމްބަރު 2021 | ބުދަ 19:00ޕްރޮގްރާމުގައި ބައިވެރިވުމުގެ ފުރުސަތު ލިބޭނީ އެންމެ ފުރަތަމަ ފޯމު ހުށައަޅާ 20 ކުދިންނަށް
ހައުންސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)
ގަރލް ޕަވަރޑް ޕްރޮގްރާމުގައި ބައިވެރިވުމުގެ ފުރުސަތު ހުޅުވާލައިފިއެވެ.
ހައުސިންގ ޑިވެލޮޕްމަންޓް ކޯޕަރޭޝަނުން ބުނީ ގަރލް ޕަވަރޑް 2021އަކީ ހައުސިންގ ޑިވެލޮޕްމަންޓް ކޯޕަރޭޝަންގެ އިސްނެގުމުގެ މަތިން, ވިމެން އިން ޓެކް މޯލްޑިވްސްއާ ގުޅިގެން, ޓެކްނޮލޮޖީގެ ދާއިރާއަށް ވަނުމަށް ޒުވާން އަންހެން ކުދިންނަށް ހިތްވަރު ދިނުމަށާއި ޓެކްނޮލޮޖީގެ ބޭނުންކޮށްގެން ސްމާރޓްސިޓީއަށް ގެނެވޭ ބަދަލުތަކަށް އަހުލުވެރިކުރުވައި ޝައުގުވެރިކަން އިތުރުކުރުމުގެ މަގުސަދުގައި ހިންގާ ޕްރޮގްރާމެއް ކަމަށެވެ.
ހުޅުމާލޭގެ ސްކޫލްތަކުގައި ކިޔަވާ ގްރޭޑް 6 އަދި 7ގެ އަންހެން ކުދިންނަށް އަމާޒުކޮށްގެން ކުރިޔަށް ގެންދިޔުމަށް ހަމަޖެހިފައިވާ މި ޕްރޮގްރާމަކީ ބްލޮކް ކޯޑިންގ ބޭނުންކޮށްގެން ކޮންޓެންޓް ތައްޔާރުކުރުމާއި މެޝިން ލަރނިންގ ޕްރޮގްރާމެކެވެ.
މި ޕްރޮގްރާމް ކުރިޔަށް ގެންދިޔުމަށް ހަމަޖެހިފައިވަނީ 8 ނޮވެމްބަރުން 6 ޑިސެމްބަރ 2021އާ ހަމަޔަށް, އޮންލައިންކޮށެވެ. މި ޕްރޮގްރާމްގައި ބައިވެރިވުމަށް ޝައުގުވެރިވާ ކުދިން 7 ނޮވެމްބަރ 2021 ވަނަ ދުވަހުގެ 15:00ގެ ކުރިން އޮންލައިންކޮށް ފޯމް ހުށައެޅުމަށް އެ ކޯޕަރޭޝަނުން ވަނީ އެދިފައެވެ.
މި ޕްރޮގްރާމްގެ ޝަރުތު ފުރިހަމަވާ ކުދިންގެ ތެރެއިން އެންމެ ފުރަތަމަ ފޯމު ހުށައަޅާ 20 ކުދިންނަށް ޕްރޮގްރާމްގައި ބައިވެރިވުމުގެ ފުރުސަތު ދެވޭނެ ކަމަށް އެޗްޑީސީން ބުންޏެވެ.
