ދިވެހިންނަށްވުރެ ބިދޭސީންގެ އާބާދީ އިތުރުވެއްޖެނަމަ އެއީ ގައުމީ ސަލާމަތަށް އޮތް ނުރައްކަލެއް: މިނިސްޓަރު މާރިޔާ
ހިއުމަން ޓްރެފިކިންގ މައްސަލަތަކަށް ވެސް ޚާއްސަ ސަމާލުކަމެއްދޭ
ބިދޭސީންތަކެއް ކުރި މުޒާހަރާއެއް ކޮންޓްރޯލް ކުރުމަށް ފުލުހުން ހަރަކާތްތެރިވަނީ
ދިވެހިންނަށްވުރެ ބިދޭސީންގެ އާބާދީ އިތުރުވެއްޖެނަމަ އެއީ ގައުމީ ސަލާމަތަށް އޮތް ނުރައްކަލެއް ކަމަށް ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެއެވެ.
ރާއްޖެޓީވީގެ ފަށާއިރު ޕްރޮގްރާމްގައި މިނިސްޓަރު މާރިޔާ ވިދާޅުވީ; ބިދޭސީން ވަކި ވަރަކަށް ވުރެ ގިނަވެއްޖެނަމަ ގައުމުގެ ސަލާމަތަށް ނުރައްކާވާފަދަ ކަމެއް ވެސް ހިނގާފައިވާނެ ކަމަށް ވިސްނަންޖެހޭ ކަމަށާއި، އަބަދުވެސް އެމައްސަލައާ ގުޅޭ މަޝްވަރާތައް ކުރެވޭ ކަމަށެވެ.
ބިދޭސީންގެ މައްސަލަ ހައްލު ކުރުމަށް މިސަރުކާރުން ގިނަ މަސައްކަތްތަކެއް ކުރާކަން ފާހަގަކުރައްވައި މިނިސްޓަރު މާރިޔާ ވިދާޅުވީ, ކޮވިޑް-19ގެ ޕެންޑަމިކްއާ ގުޅިގެން ބިދޭސީން އެމީހުންގެ ގައުމަށް ފޮނުމުގެ ގިނަ މަސައްކަތް ކުރި ކަމަށެވެ. އެގޮތުން ފްލައިޓް ޗާޓަރު ކޮށްގެންނާއި، ކަނޑުމަގުން ވެސް ބޮޑެތި މަނަވަރުތަކުގައި މީހުން ގެންދިޔަ ކަމަށް މިނިސްޓަރު މާރިޔާ ވިދާޅުވިއެވެ.
މިނިސްޓަރު މާރިޔާ ވިދާޅުވީ ހިއުމަން ޓްރެފިކިންގެ މައްސަލަތަކަށް ވެސް ޚާއްސަ ސަމާލުކަމެއްދީގެން މަސައްކަތްތައް ކުރިއަށް ގެންދާ ކަމަށެވެ.
މިނިސްޓަރު މާރިޔާ ވިދާޅުވީ ގަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލު ކުރުމުގައި ރައްޔިތުންގެ ދައުރު ވެސް ވަރަށް ބޮޑު ކަމަށެވެ. އެގޮތުން އެފަދަ މީހުންނާ މަސައްކަތްތައް ހަވާލުނުކޮށް އެފަދަ ފުރުސަތުތައް ބަންދު ކުރުމުން ވެސް މައްސަލައަށް ބޮޑު ހައްލެއް ލިބިގެންދާނެ ކަމަށް މިނިސްޓަރު މާރިޔާ ވިދާޅުވިއެވެ.
ގަވައިދާ ޚިލާފަށް ރާއްޖޭގައި މަސައްކަތްކުރަމުންދާ ބިދޭސީން ގަވާއިދަށް ފެއްތުމަށް އިކޮނޮމިކް މިނިސްޓްރީން ފެށި ރެގިއުލޭޝަން ޕްރޮގްރާމަށް އަލިއަޅުއްވާލައްވައި މިނިސްޓަރު މާރިޔާ ވިދާޅުވީ, އެ ޕްރޮގްރާމްއަކީ ވެސް ވަރަށް ކާމިޔާބު ޕްރޮގްރާމެއް ކަމަށާއި، މި ދުވަސްވަރަށް އެމަސައްކަތް މަޑު ޖެހިފައި އޮތް ނަމަވެސް އެ މަސައްކަތްތައް ކުރިއަށްދާނެ ކަމަށެވެ.
ރެގިއުލަރައިޒް ކުރަން ފެށި މަސައްކަތުގައި 43،000 މީހުން ރަޖިސްޓްރީ ކޮށްފައިވާއިރު, ކޮވިޑާހެދި މީހުން ގެނެސްގެން އެކަން ކުރުން މަޑު ޖެހިފައި އޮތް ކަމަށް އިކޮނޮމިކް މިނިސްޓްރީން ވަނީ ބުނެފައެވެ. ރަޖިސްޓަރ ކުރި މީހުންގެ ތެރެއިން 8،938 މީހުން, އަމިއްއަށް އެދިގެން ފުރުވާލާފައިވާއިރު, 2020 ވަނަ އަހަރުގައި 15،000 މީހުން އަމިއްލައަށް ފުރައިގެން ދިޔައެވެ. ހަމައެއާއެކު 2021ގައި 3،000 މީހުން ފުރައިގެން ދިޔުމާއެކު ޖުމްލަ 27،000 މީހުން މިހާރު ފުރައިގެން ގޮސްފައިވާ ކަމަށް ވެސް އިކޮނޮމިކް މިނިސްޓްރީން ވަނީ ބުނެފައެވެ.
ރާއްޖޭގައި 281،000 ބިދޭސީން އެބަތިބި ކަމަށް ތަފާތު ހޯދުންތަކުން ދައްކައެވެ. މިއީ ރާއްޖެ ފަދަ ކުޑަ ގައުމަކާ އަޅާބަލާއިރު ނިސްބަތުން ބޮޑު އަދަދެކެވެ.
