ނަޞްރުގެ ދުވަހާ ގުޅިގެން ދިދަ އާއި ގާޑް މައުންޓްކުރުމުގެ ރަސްމިއްޔާތު ބާއްވައިފި

ނަޞްރުގެ ދުވަހާ ގުޅިގެން އެމްއެންޑީއެފުން ދިދަ މައުންޓްކުރުމުގެ ރަސްމިއްޔާތު ބާއްވައިފިއެވެ.

ނޮވެންބަރު ތިނެއްގެ ހަނދާނީ ބިނާ ކުރިމަތީގައި ބުދަ ދުވަހުގެ ހެނދުނު ބޭއްވި މި ރަސްމިއްޔާތުގައި ތިނެއް ނޮވެންބަރުގެ ހަނދާނީ ބިނާގައި ދިދަ އާއި ގާޑް މައުންޓްކުރުމުގެ ރަސްމިއްޔާތު ޝަރަފްވެރިކޮށް ދެއްވީ ޑިފެންސް މިނިސްޓަރ އަލްއުސްތާޛާ މާރިޔާ އަޙްމަދު ދީދީއެވެ. މި ރަސްމިއްޔާތުގައި ނޮވެމްބަރ ތިނެއްގައި ޝަހީދުވި ސިފައިންގެ ހަނދާނުގައި ހަމަހިމޭންކަމުގެ ސުކޫތެއް ވަނީ ގެނެސްފައެވެ. އަދި ސިފައިންގެ ޢަޒުމް އާކޮށް ޝަހީދުވި ސިފައިންގެ ހަނދާނުގައި 7 ބަޑީގެ ސަލާމެއް ވަނީ އަރުވާފައެވެ. މީގެ އިތުރުން ދުވަހާ ގުޅޭ ޚާއްސަ ދުޢާއެއް ވެސް ވަނީ ކޮށްފައެވެ.

ދިދަ އާއި ގާޑް މައުންޓްކުރުމުގެ ރަސްމިއްޔާތު އޮތީ، ނަޞްރުގެ ދުވަހާ ގުޅިގެން އިސްލާމީ މަރުކަޒުގައި ޖަމާޢަތުގައި ސިފައިން ކުރި ފަތިސް ނަމާދަށް ފަހުގައެވެ.

ޓެރަރިސްޓް ޖަމާޢަތެއްކަމަށްވާ، ތަމަޅަ ޓައިގަރުންގެ ބަޔަކާ ގުޅިގެން ދިވެހިންގެ ބަޔަކު މާލެއަށް ހަތިޔާރާއެކު އަރައި، ދިވެހިންގެ ތެރެއިން އެތައް ބަޔަކު ޝަހީދުކޮށްލާފައި ވަނީ 1988 ވަނަ އަހަރުގެ ނޮވެމްބަރުމަހުގެ 3 ވަނަ ދުވަހުއެވެ.

ނޮވެމްބަރ 3، ނަޞްރުގެ ދުވަހުގެ ގޮތުގައި ފާހަގަކުރަނީ 1988 ވަނަ އަހަރު ދިވެހިންގެ ބަޔަކު ތަމަޅަ ޓައިގަރުންގެ ބަޔަކާއެކު ރާއްޖެ އަރައި ދިން ޢުދުވާނީ ޙަމަލާއިން ދިވެހިންނަށް ލިބުނު ނަޞްރު ފާހަގަކުރުމުގެ ގޮތުންނެވެ.