އެކްޓިވް ކޭސް 1860 ގައި، އިތުރު 143 މީހުން ޕޮޒިޓިވް!
30 މީހަކަށް ހޮސްޕިޓަލްގައި އެޑްމިޓް ކޮށްގެންދަނީ ފަރުވާ ދެމުން
ކޮވިޑް އަށް ޓެސްޓު ކުރުމަށް ސާމްޕަލް ނަގަނީ،
ކޮވިޑް-19ށް އިތުރު 143 ޕޮޒިޓިވްވެ، 119 މީހުން ބަލިން ރަނގަޅުވެއްޖެއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނީ ހޯމަ ދުވަހުގެ އިރުއޮއްސި 6:00ން އަންގާރަ ދުވަހުގެ އިރުއޮއްސި 6:00ށް 3790 ސާމްޕަލެއް ނަގާފައިވާ ކަމަށެވެ. މީގެ ތެރެއިން 143 މީހުން ޕޮޒިޓިވްވެފައިވާ ކަމަށް އެޗްޕީއޭއިން ބުނެއެވެ. އެއީ މާލެ ސަރަހައްދުން 23 މީހުންނާއި، އަތޮޅުތެރޭގެ ރަށްރަށުން 117 މީހުން އަދި ހިންގަމުންދާ ރިސޯޓުތަކުން 3 މީހުންނެވެ.
1860 އެކްޓިވް ކޭސް ހިމެނޭއިރު، 30 މީހަކަށް ހޮސްޕިޓަލްގައި އެޑްމިޓް ކޮށްގެންދަނީ ފަރުވާ ދެމުންނެވެ.
ތަފާސްހިސާބުތައް ދައްކާ ގޮތުން މިހާތަނަށް 88058 މީހުން ބައްޔަށް ޕޮޒިޓިވްވެފައިވެއެވެ. 85942 މީހުން ބަލިން ރަނގަޅުވެފައިވެއެވެ. އަދި 243 މީހުން މިބަލީގައި ވަނީ ނިޔާވެފައެވެ.
މާލެ ސަރަހައްދުގައި ކޮވިޑް-19ށް ޕޮޒިޓިވްވާ ރޭޓް ވަކި މިންވަރެއްގައި ހިފެހެއްޓިފައިވީނަމަވެސް އަތޮޅުތެރޭގެ ރަށްރަށުގައި ބަލި ފެތުރޭ މިންވަރު ވަނީ އިތުރުވެފައެވެ. އެގޮތުން މިހާރު ވެސް ކޮވިޑް-19ގެ ކޭސްތަކާ ގުޅިގެން 25 ރަށެއް ވަނީ މޮނިޓަރިންގެ ހާލަތަށް ގެނެސްފައެވެ.
މީގެ އިތުރުން ބަލިން ރައްކާތެރިވުމަށް އަޅަންޖެހޭ ފިޔަވަޅުތަކަށް ފަރުވާ ކުޑަ ނުކުރުމަށް ކަމާބެހޭ ފަރާތްތަކުން ދަނީ އިލްތިމާސް ކުރަމުންނެވެ. ކޮވިޑް-19 ކުއްލިއަކަށް ފެތުރިގެންދާތީ މާކްސް އެޅުމަށާއި، ތިން ފޫޓުގެ ގައިދުރު ކަމަށް ޚާއްސަ ސަމާލުކަމެއް ދޭން ޖެހެއެވެ.
