ތިންވަނަ ކުއާޓަރުގައި އެމްޓީސީސީއަށް 56 މިލިއަންގެ ސާފު ފައިދާއެއް!

މިއަހަރުގެ ތިންވަނަ ކުއާޓަރުގައި އެމްޓީސީސީއަށް 56 މިލިއަން ރުފިޔާގެ ފައިދާއެއް ލިބިއްޖެއެވެ.

އެމްޓީސީސީން އާންމުކޮށްފައިވާ އެކުންފުނީގެ ތިންވަނަ ކުއާޓަރުގެ ރިޕޯޓުގައިވާގޮތުން, މިއަހަރުގެ ތިންވަނަ ކުއާޓަރުގައި އެ ކުންފުންޏަށް އާމްދަނީގެ ގޮތުގައި 485 މިލިއަން ރުފިޔާ ވަނީ ލިބިފައެވެ. މިއީ މިއަހަރުގެ ދެވަނަ ކުއާޓަރުގައި ލިބުނު 423.32 މިލިއަން ރުފިޔާގެ އާމްދަނީއަށްވުރެ 14.5 އިންސައްތަ އިތުރު އަދަދެއްކަމަށް އެމްޓީސީސީން ބުނެފައިވެއެވެ.

ތިންވަނަ ކުއާޓަރުގައި އެކުންފުންޏަށް ލިބުނު އާމްދަނީގެ އެންމެ ބޮޑުބައި ހިއްސާކުރަނީ ބިންހިއްކުމާއި، ޓްރޭޑިންގ އެންޑް ޓްރާންސްޕޯޓް ސެގްމެންޓުން ކަމަށް އެމްޓީސީސީން ބުނެފައިވެއެވެ. މީގެތެރެއިންވެސް އެންމެ ބޮޑު ކުރިއެރުމެއް އައިސްފައިވަނީ ޓްރޭޑިންގ އެންޑް ޓްރާންސްޕޯޓް ސެގްމެންޓުން ކަމަަށާއި، މި ސެގްމެންޓުން 67.5 އިންސައްތައިގެ ކުރިއެރުމެއް އައިސްފައިވާކަމަށް އެމްޓީސީސީން ބުނެފައިވެއެވެ.

އެމްޓީސީސީން ބުނީ, ޓެކުހަށް ކެނޑުމުގެ ކުރިން އެ ކުންފުންޏަށް ފައިދާގެ ގޮތުގައި ލިބުނު އަދަދު 70.64 މިލިއަންއަށް އަރާ ކަމަށެވެ. ޓެކުހަށް ކެނޑުމަށްފަހު އެ ކުންފުންޏަށް ފައިދާގެ ގޮތުގައި ލިބުނީ 56 މިލިއަން ރުފިޔާ ކަމަށް އެމްޓީސީސީން ހާމަކޮށްފައިވެއެވެ.

އެމްޓީސީސީން ބުނީ އެ ކުންފުނިން 96 މަޝްރޫއެއްގެ މަސައްކަތް މިއަހަރުތެރޭގައި ފަށާފައިވާކަމަށެވެ. މީގެ ތެރޭގައި އިމާރާތްކުރުމުގެ ބަނދަރުގެ މަސައްކަތްތަކާއި، ބިން ހިއްކުމާއި، މަގުހެދުމުގެ މަސައްކަތްތައް ހިމެނޭކަމަށެވެ.

މީގެ ތެރެއިން 10 މަޝްރޫއެއްގެ މަސައްކަތް މިއަހަރުގެ ތިންވަނަ ކުއާޓަރުގެ ތެރޭގައި ނިންމާލާފައިވާކަމަށް އެމްޓީސީސީން ބުނެފައިވެއެވެ. މި މަސައްކަތްތަކުގެ ތެރޭގައި ހިމެނެނީ ގޮނޑުދޮށް ހިމާޔަތްކުރުމުގެ މަޝްރޫއާއި، މަގު ހެދުމުގެ މަޝްރޫއުގެ އިތުރުން ބަނދަރު ތަރައްގީކުރުމާއި، ބިން ހިއްކުން ފަދަ މަޝްރޫއުތަކެވެ.

އެމްޓީސީސީން ގެންދަނީ ރާއްޖޭގެ އެކި ކަންކޮޅުތަކުގައި ތަރައްގީގެ ގިނަ މަޝްރޫއުތަކެއް ހިންގަމުންނެވެ.