ސިވިލް ސަރވަންޓުންގެ މުސާރައިގެ ފަރަގު ނައްތާލަން ނިންމި ކަމެއް ސިވިލް ސަރވިސްއަކަށް ނޭނގޭ
ޕޭ ހާރމަނައިޒް ކުރުމުގެ މަސައްކަތް ފަށަނީ ތައުލީމީ ދާއިރާއިން
ވެލާނާގެ
ސިވިލް ސަރވަންޓުންގެ ޕޭ ހާރމަނައިޒޭޝަންގެ މަސައްކަތްކުރުމަށް ބަޖެޓުގައި ހިމަނާފައިވަނީ ސިވިލް ސަރވިސް ކޮމިޝަނާ މަޝްވަރާ ނުކޮށް ކަމަށް އެ ކޮމިޝަންގެ ރައީސް މުހައްމަދު ނާސިހު ވިދާޅުވެއްޖެއެވެ.
އަންނަ އަހަރަށް ލަފާކުރާ ބަޖެޓު މަޖިލީހަށް ހުށަހަޅުއްވަމުން ފިނޭންސް މިނިސްޓަރ އިބްރާހިމް އަމީރު ވަނީ; މަސައްކަތްތެރިންނަށް ހައްގު އުޖޫރަ ކަށަވަރުކޮށް, ސަރުކާރު މުވައްޒަފުންގެ ތެރެއިން އެއް މަސައްކަތެއް ކުރާ ފަރާތްތަކުގެ މެދުގައި އުޖޫރައިގެ ހަމަހަމަކަން ގާއިމުކުރުމަކީ ސަރުކާރުން އިސްނަގައިގެން ކުރަމުން އަންނަ އެންމެ މުހިންމު އެއް މަސައްކަތްކަން ފާހަގަކުރައްވާފައެވެ. މިކަން ތަންފީޒުކުރުމަށް އަންނަ އަހަރުގެ ބަޖެޓުގައި ހިމަނައިގެން މަސައްކަތްތަކެއް ކުރަން ނިންމަވާފައިވާކަން އެމަނިކުފާނު ފާހަގަކުރެއްވިއެވެ. އެގޮތުން މިކަމަށް ދައުލަތުގެ ބަޖެޓުން ބޮޑު އަދަދެއް ކަނޑައަޅުއްވާފައިވާކަން މިނިސްޓަރ ވަނީ ފާހަގަކުރައްވާފައެވެ.
މިކަމާގުޅިގެން ރާއްޖެއެމްވީން ކުރި ސުވާލަކަށް ޖަވާބުދެއްވަމުން ނާސިހު ވިދާޅުވީ ސިވިލް ސަރވަންޓުންގެ ތެރެއިން އެއް މަސައްކަތެއް ކުރާ ފަރާތްތަކުގެ މެދުގައި އުޖޫރައިގެ ހަމަހަމަކަން ގާއިމުކުރުމަށް ބަޖެޓުގައި ހިމަނާފައިވާއިރު، މިކަން ކުރުމުގެ ކުރިން އެ ކޮމިޝަނާ މަޝްވަރާކޮށްފައިނުވާ ކަމަށެވެ. އެހެންކަމުން މުސާރައިގެ ފަރަގު ހުރީ ކިހާ މުވައްޒަފުންނެއްގެ މެދުގައިތޯ ދަންނަވަން އުނދަގޫކަމަށް ނާސިހު ވިދާޅުވިއެވެ. މިކަމާ ގުޅިގެން ފިނޭންސް މިނިސްޓްރީގެ ބަހެއް ލިބޭގޮތް ވެފައެއް ނުވެއެވެ.
އަންނަ އަހަރަށް ލަފާކުރާ ބަޖެޓު މަޖިލީހަށް ހުށަަޅުއްވަމުން ފިނޭންސް މިނިސްޓަރ އަމީރު ވަނީ އަންނަ އަހަރުން ފެށިގެން އެންމެ ކުޑަ އުޖޫރައިގެ ގޮތުގައި ދެވޭނެ މިންވަރު ނުވަތަ މިނިމަމް ވޭޖް ކަނޑައަޅައި ތަންފީޒުކުރަން ވަނީ ނިންމާފައިވާކަން ފާހަގަކުރައްވާފައެވެ.
އަދި އެއް ފެންވަރެއްގެ، އެއް ކަހަލަ މަސައްކަތް ކުރާ, ސަރުކާރު މުވައްޒަފުންގެ މެދުގައި ހުރި މުސާރައިގެ ފަރަގުތައް ނައްތާލުމުގެ ގޮތުން، އާ ޕޭ ފްރޭމްވާކެއް އެކުލަވާލައި، އަންނަ އަހަރުން ފެށިގެން ޕޭ ހާރމަނައިޒޭޝަން މަރުހަލާތަކަކަށް ބަހާލައިގެން ތަންފީޒުކުރަން ފަށާނެ ކަމަށް މިނިސްޓަރ ވިދާޅުވިއެވެ. މިގޮތުން ޕޭ ހާރމަނައިޒޭޝަން ތަންފީޒުކުރުން ފެށިގެންދާނީ ތައުލީމީ ދާއިރާއިންކަމަށާއި، މި ދެ ކަންތަކަށް އަންނަ އަހަރުގެ ބަޖެޓުގައި 500 މިލިއަން ރުފިޔާ ކަނޑައަޅާފައިވާނެ ކަމަށް މިނިސްޓަރ ވިދާޅުވިއެވެ.
