6 މޭ 2021 ދުވަހުގެ ރޭ ރައީސް މުޙައްމަދު ނަޝީދަށް އަމާޒުކޮށްދިން ހަމަލާގެ މައްސަލައިގައި ދައުވާ އުފުލާފައިވާ ހއ. މޮޅަދޫ، ބަހާރުގެ، ޢަބްދުﷲ ޢަލީމަނިކާއި، ހއ. ހޯރަފުށި، އަލަނާސިގެ، މުޙައްމަދު ތަސްލީމްގެ މައްސަލައިގެ އަޑުއެހުމެއް އަންގާރަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި މައްސަލަ ކްރިމިނަލް ކޯޓުގައި ބައްލަވަނީ ގާޒީ އަލީ އާދަމްއެވެ. މި މައްސަލައިގައި އަންގާރަ ދުވަހު ކްރިމިނަލް ކޯޓުގައި ކުރިއަށް ގެންދިޔަ އަޑުއެހުމަކީ އެ ދެމީހުންގެ ބަންދާމެދު ގޮތެއް ނިންމުމަށް ބާއްވާފައިވާ އަޑުއެހުމެކެވެ.

މި މައްސަލައިގައި 28 އޮކްޓޯބަރުގައި ބޭއްވި އަޑުއެހުމުގައި އަބްދުﷲ އަލީ މަނިކު އަދި މުޙައްމަދު ތަސްލީމް ވަކީލަކު ބޭނުންވާކަން ފާހަގަކޮށްފައިވާތީ ގާޒީ ވަނީ އެ ދެމީހުންނަށް އެ ފުރުސަތު ދެއްވާފައެވެ. ބަންދުން ދޫކޮށްލައިފިނަމަ މުޖުތަމައުގެ ސަލާމަތަށް ނުރައްކާވެދާނެ ކަމަށް ބަލައި، ވަކީލަކު އައްޔަނު ކުރެވެންދެން ވެސް 5 ދުވަހުގެ މުއްދަތަށް ރިމާންޑު ޖަލެއްގައި ބެހެއްޓުމަށް ގާޒީ އޭރު އަމުރު ކުރެއްވިއެވެ.

މި މައްސަލައިގައި އަންގާރަ ދުވަހު ބޭއްވި އަޑުއެހުމުގައި ގާޒީ ވިދާޅުވީ، ތަސްލީމް ވަކީލަކު އައްޔަނުކޮށްފައިވާ ކަމަށާއި، ނަމަވެސް އަބްދުﷲ އަލީމަނިކު ވަކީލަކު އައްޔަނު ކޮށްފައިވާކަން ކޯޓަށް އަންގާފައި ނުވާ ކަމަށެވެ. ގާޒީ ވަނީ ދެމީހުން ޝަރީއަތް ނިމެންދެން ބަންދު ކުރުމަށް ދައުލަތުން ހުށަހަޅާފައިވާ ހުށަހެޅުމުގެ ބައި ކުރިއަށް ގެންދަވާފައެވެ.

މި އަޑުއެހުމުގައި ވާހަކަ ދައްކަމުން އަބްދުﷲ އަލީ މަނިކު ވަނީ ޝަރުތުތަކާއެކު ދޫކޮށްލުމަށް އެދިފައެވެ. އަދި ދައުވާލިބޭ ތަސްލީމުގެ ފަރާތުން އޭނާގެ ވަކީލު ވަނީ އެމީހުންނަށް ކުރަނީ ކުރަނީ ޓެރަރިސްޓް ޖަމާއަތަކަށް ތާއީދު ކުރުމުގެ ކުށުގައި ކަމަށްވާއިރު، ސާބިތުވެއްޖެނަމަ އަންނަނީ 3 އަހަރާއި 5 އަހަރާ ދެމެދުގެ ޖަލު ޙުކުމެއް ކަމަށެވެ. ވަކީލު ވަނީ އެއީ ޖިނާއީ ބޮޑު ކުށަކަށް ވަނީ ކީއްވެތޯ ސުވާލު ކުރައްވާފައެވެ.

ދިފާއީ ވަކީލު ވިދާޅުވީ، ކްރިމިނަލް ކޯޓުން މީގެ ކުރިން ވެސް މި ދަރަޖައިގެ ކުށެއްގައި ދައުލަތުން އެދިގެން ޝަރުތުތަކާއެކު މީހަކު ދޫކޮށްލާފައިވާ ކަމަށެވެ. ވީއިރު، ވަކި މައްސަލަތަކެއްގައި ދައުލަތުގެ ސްޓޭންޑު ބަދަލުވަނީ ކީއްވެތޯ ވަކީލު ސުވާލު ކުރެއްވިއެވެ. އެ މައްސަލައިގެ އަދަބުތަކުގައި ވެސް މި މައްސަލައާ ތަފާތެއް ނެތްކަން ވަކީލު ފާހަގަކުރެއްވިއެވެ.

ދިފާއީ ވަކީލު ފާހަގަ ކުރެއްވި ކަންކަމާއި ގުޅޭގޮތުން ދައުލަތުގެ ވަކީލު ވިދާޅުވީ، ޖިނާއީ ބޮޑު ކުށެއް ކަމުގައި ޖިނާއީ އިޖުރާއަތުގެ ޤާނޫނުގެ 22 ވަނަ މާއްދާގައި ބަޔާންކޮށްފައިވާ ކުށުގެ ބާވަތްތަކުގެ ތެރޭގައި ޓެރަރިޒަމާ ގުޅޭ މައްސަލަތައް ހިމެނޭ ކަމަށެވެ. އަދި ކްރިމިނަލް ކޯޓުން މީގެ ކުރިން ނިންމާފައިވާ މައްސަލައިގައި ޙާލަތާއި ވަށައިގެންވާ ކަންކަން މުޅިން ތަފާތުކަން ފާހަގަ ކުރައްވައި ދައުލަތުން ވަނީ އެމީހުން ޝަރީއަތް ނިމެންދެން ބަންދު ކުރުމަށް އެދިލައްވާފައެވެ.

ދައުލަތުގެ ވަކީލާ ވަނީ އެ މައްސަލައިގައި ދައުވާލިބޭ ފަރާތް ޝަރުތުތަކާއެކު ދޫކޮށްލީ ދައުލަތުން އެދިގެން ނޫންކަން ފާހަގަ ކުރައްވައި، އެއީ ޝަރީއަތުން ނިންމެވި ނިންމެވުމެއްކަމަށް ވިދާޅުވެފައެވެ. ދިފާއީ ވަކީލު ވަނީ އެ މަޖިލީހުގައި ދައުލަތުން އެކަމަށް އިންކާރުކޮށްފައި ނުވާ ކަމަށާއި، ހަނު ހުރުމުން ބެލެވެނީ އެކަމަށް ދައުލަތުންވެސް އެއްބަސްވާކަން ކަމަށެވެ. އަދި ފަހުން އެ ނިންމުން ދައުލަތުން އިސްތިއުނާފުވެސް ކޮށްފައިނުވާކަން ވަކީލު ފާހަގަ ކުރެއްވިއެވެ.

މި މައްސަލައިގައި ދެފަރާތުން ފާހަގަކުރި ކަންކަމަށް ރިއާޔަތް ކުރައްވައި މައްސަލަ ބައްލަވާ ގާޒީ އަލީ އާދަމް ވިދާޅުވީ، ދައުލަތުން ދެ މައްސަލައިގައި ތަފާތު ގޮތަކަށް އަމަލު ކުރައްވާކަމަށް ދިފާއުން ބުނި ނަމަވެސް އެއީ ތަފާތު ދެ ޙާލަތެއްގެ މައްސަލައެއްކަން ދައުލަތުން ހުށައަޅާފައިވާ ކަމަށެވެ. ގާޒީ އަލީ އާދަމް ވަނީ މިއީ ޖިނާއީ ބޮޑު ކުށެއްކަން ޝަރީއަތަށްވެސް ޤަބޫލު ކުރެވޭކަން ފާހަގަ ކުރައްވައި، ދެމީހުންގެވެސް މިބަޥާތުގެ މައްސަލައިގެ ހިސްޓަރީ އޮތްކަމަށް ވިދާޅުވެ، އަދި ހެއްކަށް ނުފޫޒު ފޯރުވުމާއި، މުޖުތަމައުގެ ސަލާމަތަށް ނުރައްކާ އޮތްކަން ޤަބޫލު ކުރެވޭކަމަށް ވިދާޅުވެ، ދެމީހުން ޝަރީއަތް ނިމެންދެން ބަންދު ކުރުމަށް ނިންމަވާފައެވެ.

ޙަމަލާއާ ގުޅޭ މައުލޫމާތު އާންމު ކުރަމުން މީގެ ކުރިން ފުލުހުން ބުނެފައިވާ ގޮތުގައި ހއ. ހޯރަފުށީ، އަލަނާސިގޭ މުޙައްމަދު ތަސްލީމް ހައްޔަރުކުރީ އައްޑޫ ސިޓީންނެވެ.

މިހާތަނަށް ބެލި ބެލުމުން އޭނާއަކީ ހަމަލާ ދިނުމުގައި އެންމެ އިސްކޮށް އުޅުނު މީހުންގެ ތެރެއިން އެކަކު ކަމަށް ފުލުހުން މައުލޫމާތު ދެއެވެ. އަދި އޭނާއަކީ ރައީސް ނަޝީދު އަވަހާރަކޮށްލަން ޖެހޭކަމަށް ބުނެ އެ ޝުއޫރު ފާޅު ކޮށްފައިވާ މީހެއްކަން ފާހަގަކޮށްފައިވެއެވެ.

އޭގެ އިތުރުން، އަލިމަނިކަކީ 2007 ވަނަ އަހަރު އއ. ހިމަންދޫގައި ހިންގި ތަޅާފޮޅުމުގައި ބައިވެރިވި މައްސަލާގައި 10 އަހަރަށް ޖަލަށްލާފައިވާ މީހެކެވެ. ޖަލުގައި ހުއްޓާ އޭނާ ފިލައިގެން ގޮސް އުޅެނިކޮށް ވެސް ހައްުޔަރުކޮށްފައިވެއެވެ.