ޓިކެޓް ކޮންފޯމް ކުރުމަށްފަހު، ފުރަން ނާންނަ މީހުން އަތުން މޯލްޑިވިއަނުން ފީއެއް ނަގަނީ

ޓިކެޓް ކޮންފޯމްކޮށްފައި، ފުރަން ނާންނަ މީހުން އަތުން މޯލްޑިވިއަނުން ފީއެއް ނަގަން ނިންމައިފިއެވެ.

އެ ކުންފުނިން ބުނީ ވަރަށް ގިނަ ކަސްޓަމަރުން ފްލައިޓުން ޓިކެޓް ނެގުމަށްފަހު، ފުރަން އޮންނަ ދުވަހާއި ގަޑިއަށް އެއަރޕޯޓަށް ނާންނަ ކަމަށެވެ. އަދި ފަހުން ފްލައިޓްގެ ގަޑި ބަދަލުކޮށްދިނުމަށް އެދި ހުށަހަޅާ ކަމަށެވެ. އެކަމުގެ ސަބަބުން ދަތުރުކުރާ އެހެން ކަސްޓަމަރުންނަށް ވެސް ދަތިތަކާއި ކުރިމަތިވާ ކަމަށް މޯލްޑިވިއަނުން ބުންޏެވެ.

މިފަދަ ކަސްޓަމަރުންގެ އަތުން ނަގާނީ 80 ރުފިޔާ އާއި 200 ރުފިޔާއާ ދޭތެރޭގެ އަދަދެއް ފީއެއް ކަމަށް ވަނީ ބުނެފައެވެ.

މޯލްޑިވިއަނުން އިތުރަށް ބުނީ ފާއިތުވެދިޔަ ހަތް މަސް ދުވަހުގެ ތެރޭގައި 16،500 މީހުން އެގޮތަށް ކަންތައްތައް ކޮށްފައިވާ ކަމަށާއި އެއީ އެވަރެޖްކޮށް ބަލާނަމަ 2350 ސީޓް ކަމަށެވެ.

ކުރިއަށް ބަންދު ދުވަސްތައް އޮތުމުން ވަރަށް ގިނަ މީހުން ދަތުރުކުރާނެކަން ފާހަގަކޮށް މޯލްޑިވިއަނުން ބުނީ އެގޮތަށް ކަސްޓަމަރުން އަމަލުކުރާނަމަ ދެން ދަތުރުކުރަން ތިބި މީހުންނަށް ވެސް ދަތިވާނެ ކަމަށެވެ.

މޯލްޑިވިއަނުން ދަނީ މާލެ ހިމެނޭހެން ރާއްޖޭގެ 16 އެއަރޕޯޓަކަށް ދަތުރުތައް ބާއްވަމުންނެވެ.

މޯލްޑިވިއަނުން ވަނީ އެކުންފުނީގެ 21 ވަނަ އަހަރީ ދުވަސް މެއި މަހުގެ 13 ވަނަ ދުވަހު ފާހަގަކޮށްފައެވެ. 2000 ވަނަ އަހަރު އުފެދުނު އައިލެންޑް އޭވިއޭޝަންގެ ދަށުން އުދުހޭ ފްލައިޓްތަކުގެ ނަން މޯލްޑިވިއަނަށް ބަދަލުކުރީ 2008 ވަނަ އަހަރުގެ ތެރޭގައެވެ. އެ ކުންފުނިން ވަނީ މިދިޔަ 21 އަހަރު ދުވަހުގެ ތެރޭގައި ގިނަ ކާމިޔާބީތަކެއް ހާސިލުކޮށްފައެވެ.