މަޖިލީހުގެ ސިޔާސީ ޕާޓީތަކުގެ ދަފްތަރަށް އައި ބަދަލުތަކާއެކު މަޖިލީހުގެ ދާއިމީ ކޮމިޓީތަކަށް ބަދަލު ގެނެސްފިއެވެ.
މަޖިލީހުގެ ދަފްތަރުގައި އަލަށް ހިމެނުނު ސިޔާސީ ޕާޓީއަކީ މޯލްޑިވްސް ނޭޝަނަލް ޕާޓީ (އެމްއެޕީ)އެވެ. މަޖިލީހުގެ ސިޔާސީ ޕާޓީތަކުގެ ދަފްތަރުގައި މޯލްޑިވްސް ނޭޝަނަލް ޕާޓީ (އެމްއެންޕީ) ހިމެނުމާ ގުޅިގެން މަޖިލީހުގެ ބައެއް ދާއިމީ ކޮމެޓީތަކުގައި މެމްބަރުން ހިމެނި ވަޑައިގަންނަވާ ނިސްބަތަށް ގެނައި ބަދަލު ވަނީ މަޖިލީހުން ފާސްކޮށްފައެވެ.
މަޖިލީހުގައި މެމްބަރުން ބެހިފައިވާގޮތަކީ:
- އެމްޑީޕީ – 65 މެމްބަރުން
- ޕީޕީއެމް – 6 މެމްބަރުން
- ޖުމްހޫރީ ޕާޓީ – 3 މެމްބަރުން
- ޕީއެންސީ – 3 މެމްބަރުން
- އެމްއެންޕީ – 3 މެމްބަރުން
- އެމްޑީއޭ – 2 މެމްބަރުން
- މިނިވަން – 5 މެމްބަރުން
ކޮމެޓީތަކަށް ގެނައި ބަދަލުތަކުގެ ތެރޭގައި ޚާރިޖީ ގުޅުންތަކުގެ ކޮމެޓީ އަދި ސްޓޭޓް އޯންޑް އެންޓަރޕްރައިސަސް ކޮމިޓީގައި އެމްއެންޕީގެ މެމްބަރެއްގެ ގޮތުގައި ދަނގެތި ދާއިރާގެ މެމްބަރު މުހައްމަދު ނާޒިމް ވަނީ ކަނޑައަޅާފައެވެ. މާލިއްޔަތު ކޮމެޓީ އަދި ސަރުކާރުގެ މަސްއޫލިއްޔަތު އަދާ ކުރާ މިންވަރު ބަލާ ކޮމެޓީގައި އެމްއެންޕީގެ ފަރާތުން ތިމަރަފުށީ ދާއިރާގެ މެމްބަރުން އަބްދުﷲ ރިޔާޒު ވަނީ ކަނޑައަޅާފައެވެ. މީގެ އިތުރުން ސަލާމަތީ ޚިދުމަތްތަކާ ބެހޭ ކޮމެޓީ އާއި މިނިވަން މުވައްސަސާ ކޮމެޓީ އަދި ހިއުމަން ރައިޓް ޖެންޑާ ކޮމެޓީގައި އެމްއެންޕީގެ ފަރާތުން ވިލިމާލެ ދާއިރާގެ މެމްބަރު އަހުމަދު އުޝާމް ހިމެނުއްވުމަށް ވަނީ ނިންމަވާފައެވެ.
މިބަދަލުތަކާއެކު ޚާރިޖީ ގުޅުންތަކުގެ ކޮމިޓީއަށް ވަކި ޕާޓީއަކަށް ނިސްބަތް ނުވާ ތުލުސްދޫ ދާއިރާގެ މެމްބަރު އިބްރާހިމް ނަސީމް ވަނީ ކަނޑައަޅާފައެވެ. މީގެ އިތުރުން ސަލާމަތީ ޚިދުމަތްތަކާބެހޭ ކޮމިޓީއަށް އެމްޑީޕީގެ އިތުރު މެންބަރަކު ވަނީ ކަނޑައަޅާފައެވެ. އެމްޑީޕީގެ ފަރާތުން ކޮމެޓީއަށް ކަނޑައެޅުއްވީ ތުޅާދޫ ދާއިރާގެ މެމްބަރު ހިސާން ހުސައިނެވެ.
