ކުރިއަށްއޮތް 3 ދުވަހު މޫސުމަށް ސަމާލުވާން އެދެފި
1 ނޮވެމްބަރު 2021 | ހޯމަ 06:34މޫސުމަށް ސަމާލުވާން އެންގީ ލަންކާ ކައިރީގައި ކޮޅިގަނޑެއް އުފެދިފައިވާތީ
ރާއްޖޭގެ ހުރިހާ ހިސާބަކަށް މިހާރުދަނީ ވިއްސާރަކުރަމުން
ކުރިއަށް އޮތް ތިން ދުވަހު ރާއްޖޭގެ މޫސުން ގޯސްވާނެ ކަމަށް ލަފާކޮށް މޫސުމަށް ސަމާލުވުމަށް މޯލްޑިވްސް މީޓިއޮރޮލޮޖިކަލް ސަރވިސް (މެޓް)ން އެދެފިއެވެ.
މެޓުން ބުނީ ރާއްޖޭގެ އިރުއުތުރުން، ސްރީލަންކާ ކައިރީގައި އުފެދިފައިވާ ކޮޅިގަނޑަކާ ގުޅިގެން ރާއްޖެ ސަރަޙައްދުގައި ވަޔާއި ކަނޑު ގަދަވެ، ބައެއް ރަށްތަކަށް ބޯކޮށް ވާރޭ ވެހޭނެ ކަމަށް ލަފާކުރެވޭ ކަމަށެވެ.
އެހެންކަމުން އާންމުކޮށް ހުރިހާ ފަރާތްތަކުން، އަދި ވަކިން ޚާއްސަކޮށް ކަނޑުދަތުރު ކުރައްވާއިރު މޫސުމަށް ސަމާލުވުމާއެކު ރައްކާތެރިކަމުގެ ފިޔަވަޅުތައް އެޅުއްވުމަށް މެޓުން ވަނީ އިލްތިމާޒް ކުރައްވާފައެވެ.
މިފަހުން ރާއްޖެއަށް ކުރި ގަދަ ވިއްސާރައިގައި ހިތާމަވެރި އެތައް ހާދިސާތަކެއް ހިނގާފައިވެއެވެ. އެހެންކަމުން މިފަދަ ހާދިސާތައް މަދުކުރުމަށް މިހާރު ވަނީ ދިވެހިރާއްޖޭގެ ކަނޑުގެ ސަރަހައްދުގައި ދަތުރުކުރާ އުޅަނދުފަހަރުގެ ސަލާމަތާބެހޭ ގަވާއިދަށް އިސްލާހުތަކެއް ގެނެސްފައެވެ.
